Elnurə Məmmədova

Elnurə Məmmədova 2 yanvar 2002-ci ildə Tovuz rayonunun Köhnəqala kəndində anadan olub. 2013-cü ildə güləşlə məşğul olmağa başlayıb. Ağahüseyn Mustafayevin rəhbərliyi altında məşq edir.

Elnurə Məmmədovanın beynəlxalq səviyyədə debütü 2017-ci ilin iyulunda Bosniya və Herseqovinanın Sarayevo şəhərində baş tutan yeniyetmələr arasında Avropa Çempionatına təsadüf edib. Həmin turniri o, 14-cü pillədə başa vurdu. 2018-ci ildə bu səfər KYRM-da baş tutan analoji turniri 8-ci pillədə başa vuran Məmmədova bir il sonra, 2019-cu ildə İtaliyada analoji turnirin bürünc medalına sahib oldu. 2019-cu ilin iyulunda Elnurə Məmmədova həm də Avropa Gənclər Yay Olimpiya Festivalını gümüş medalla başa vurdu, ardınca isə iyulda Bolqarıstanda yeniyetmələr arasında Dünya Çempionatını onuncu pillədə tamamladı.

2021-ci il Məmmədova üçün bir qədər uğursuz oldu. İyunda Almaniyada gənclər arasında Avropa Çempionatını 8-ci, avqustda isə Rusiyada gənclər arasında Dünya Çempionatını 12-ci pillədə başa vuran Məmmədova noyabrda Serbiyada U23 Dünya Çempionatında 8-ci pillədə qərarlaşdı.

Elnurə Məmmədova üçün ən uğurlu mövsümlərdən biri 2022-ci ilə təsadüf edib. O, martda Bolqarıstanda baş tutan 23 yaşlılar arasında Avropa Çempionatının final görüşündə məğlub olaraq turniri gümüş medalla başa vurdu. İyunda isə Məmmədova Roma şəhərində (İtaliya) baş tutan 20 yaşlılar arasında Avropa Çempionatında bütün rəqibləri üzərində qələbə qazanaraq turnirin qalibi oldu. Ardınca avqustda Konya şəhərində İslam Həmrəyliyi Oyunlarının bürünc medalına sahib olan Məmmədova noyabrda İspaniyada 23 yaşlılar arasında Dünya Çempionatını yeddinci pillədə tamamladı.

Elnurə Məmmədova 2023-cü ilə uğursuz başladı. Fevralda Xorvatiyada Zagreb Open beynəlxalq turnirini 12-ci pillədə başa vurdu, apreldə isə yenə də Xorvatiyada baş tutan Avropa Çempionatında medalın bir addımlığında məğlub olaraq turniri beşinci pillədə tamamladı. Ardınca iyunda o, İstanbul şəhərində Yasar Dogu, Vehbi Emre & Hamit Kaplan beynəlxalq turnirində bütün rəqibləri üzərində qələbə qazanaraq turnirin qalibi oldu. Sentyabrda Serbiyada Dünya Çempionatlarında debüt edən Elnurə Məmmədova ilin sonunda Tirana şəhərində (Albaniya) baş tutan 23 yaşlılar arasında Dünya Çempionatının bürünc medalına sahib oldu.

2024-cü ildə Məmmədovanın birinci turniri apreldə Azərbaycanda baş tutan Avropa Olimpiya Təsnifat Turniri oldu. Həmin turnirdə o, uğursuz çıxış etdi və 12-ci pillədə qərarlaşaraq olimpiya lisenziyasına sahib ola bilmədi. Mayda Elnurə Məmmədova Azərbaycanın ev sahibliyində baş tutan 23 yaşlılar arasında Avropa Çempionatının final görüşündə məğlub olaraq turniri gümüş medalla başa vurdu. Həmin ilin sonunda o, Albaniyada U23 Dünya Çempionatında da çıxış etsə də, uğurlu nəticə əldə edə bilmədi və turniri 14-cü pillədə tamamladı.

2025-ci ilə Xorvatiyada baş tutan Zagreb Open beynəlxalq turniri ilə start verən Elnurə Məmmədova həmin turnirdə medalın bir addımlığında məğlub olaraq turniri beşinci pillədə tamamladı. Martda isə Məmmədova Tirana şəhərinin ev sahibliyində baş tutan 23 yaşlılar arasında Avropa Çempionatında bütün rəqibləri üzərində qələbə qazanaraq turnirin qalibi oldu. Məmmədova apreldə Bratislava şəhərində Avropa Çempionatını onuncu pillədə başa vurdu.