Ryoko Kui tərəfindən yaradılmış "Delicious in Dungeon" manqa seriyasına bir çox personaj daxildir. Zindanların və müxtəlif irqlərin mövcud olduğu fentezi dünyasında macəraçı qruplar ekspedisiyalar təşkil edərək bir adada yerləşən zindanı kəşf etməyə çalışırlar. Onlar zindanın xəzinəsi olduğuna inanılan müəmmalı Qızıl Krallığı tapmaq ümidindədirlər.
Seriyanın əsas personajları "uzun adam" (insan) Layos Toden və onun öndərlik etdiyi macəraçı qrupdur. Hekayə onların bir zindan ekspedisiyası zamanı qırmızı əjdahaya məğlub olması ilə başlayır. Qrupun uzun adam sehrbazı Falin Toden son anda teleportasiya sehrindən istifadə edərək qrupun digər üzvlərini xilas edə bilir, lakin özü əjdaha tərəfindən yeyilir. Qrupun üzvləri – Falinin qardaşı Layos, yarımboy tələ ustası Çilçak Tims və elf sehrbaz Marsil Donato zindana yenidən enmək və Falini tapıb diriltmə sehri ilə xilas etmək istəyirlər. Lakin ləvazimatlarının çoxu zindanda qaldığı üçün bu missiya onlar üçün çətin görünür. Bu zaman Layos zindanda yaşayan bədheybətləri ovlamağı və yeməyi təklif edir. Onlar zindanın başlanğıcında bədheybətləri bişirmək üzrə mütəxəssisə çevrilmiş cırtdan Senşi ilə tanış olurlar. Senşi onların komandasına qoşulmağa razı olur. Onlar səyahətləri boyunca müxtəlif bədheybətlər qarşılaşırlar və onlardan yeməklər bişirirlər. Macəralarına davam edərkən zindan fəth etməyə gələn uzun adam Kabrunun komandası ilə, zindanı araşdıran qnom Tansunun komandası ilə, Falini xilas etməyə gələn Şuronun komandası ilə, zindanın yaradıcısı olan Sissel ilə və zindanın səbəb olacağı fəlakəti dayandırmaq istəyən elflərdən ibarət xüsusi komanda Bülbüllər ilə qarşılaşırlar.
Qərb fentezisinə üstünlük verən müəllif Ryoko Kui seriya üçün elf, ork, cırtdan, qnom, kobold, insan, yarımboy kimi müxtəlif irqlərdən olan personajlar yaratmışdır. Kobold personajlarının sefəh görünməməsi üçün onların üzlərini standart it cinslərinə görə yox, çaqqal, canavar və Afrika çöl itinə yaxın formada dizayn etmişdir. Onun ilkin ork dizaynları insan görünüşünə malik idi, lakin o, bunu darıxdırıcı hesab etmiş və onları yenidən dizayn etmişdir. Kui irqlərin bir-birindən asanlıqla fərqlənməsi üçün hər irqin üzvlərinə özünəməxsus xüsusiyyətlər vermişdir.[1] Bülbüllər komandasının formasını dizayn edərkən formanın uniseks görünməsinə çalışmışdır.[2]
Kui əvvəlcə personajların soyadlarını vermək istəməmişdir. Lakin hekayə irəlilədikcə redaktor personajları artırmasını istəmişdir.[3]
- Layos Toden (ライオス・トーデン, Rayosu Toden?)
- Səsləndirən: Kentaro Kumaqay
- Bacısı Falini xilas etmək üçün macəraçı komandası ilə zindana enən "uzun adam" (トールマン, toruman?). Layos güclü döyüşçüdür və komandanın lideridir. Qılınc döyüşündə mütəxəssis olsa da, sadə sehrləri də bacarır. Yaşadığı dünyanın təqviminə əsasən 488-ci ildə doğulub. Layosun bədheybətlərə və onlardan hazırlanan yeməklərə qarşı böyük marağı var, lakin bədheybətlərin insanlar üçün təhlükəli olduğunun fərqindədir. Bədheybətlərin rəsmlərini çəkməyi sevir, yaxşı basilisk və it təqlidi etməyi bacarır. Uşaq olanda bədheybətlər üzrə mütəxəssis olmaq istəsə də, akademiyaya girə bilməmiş və hərbiyə daxil olmuşdur. Hərbidən ayrıldıqdan sonra indiki macəraçı komandasını qurmuşdur.[4]
- Anime adaptasiyasının rejissoru Yoşihiro Miyacimanın sözlərinə görə Layosu səsləndirəcək aktyoru tapmaq çətin idi, çünki Layosun "qəribəliyini təbii şəkildə səsləndirəcək" şəxs axtarırdılar. Layosun səsi üçün son üç namizəd qalanda onlar Kentaro Kumaqaya üstünlük vermişdirlər. Çünki istehsalçı heyət bir-birini yaxşı tanıyan yox, macəra davam etdikcə bir-birilərini tanıyan personajlar haqqında anime çəkmək istəyirdilər və Kumaqayın dinləmələr zamanı digər seyyularla yaxınlıq etməməsi onların diqqətini cəlb etmişdir.[5] Kumaqay bir müsahibəsində bildirmişdir ki, dinləmələrə qatılmazdan öncə bütün manqa seriyasını oxumuşdur. O, Layosu canlandırarkən ən çox onun səmimi duyğularını bəyənmişdir.[6] Kumaqay bildirmişdir ki, Layos kimi onun da kiçik qardaşı var və personajı səsləndirərkən özünü böyük qardaş kimi hiss etməyə çalışmışdır.[7]
- Marsil Donato (マルシル・ドナトー, Marişuru Donato?)
- Səsləndirən: Sayaka Senbonqi
- Layosun macəraçı komandasının yarı-elf sehrbazı. İqradsil ağacının nəslindən gələn köklə hazırladığı Ambroziya adlı əsası ilə müxəlif sehrlərdən istifadə edir. Falinin yaxın dostudur. Onlar birlikdə Sehr Akademiyasında təhsil alıblar. Yaşadığı dünyanın təqviminə əsasən 464-cü ildə doğulub. Marsilin anası elf, atası isə uzun adamdır. Lakin Marsil bu faktı ətrafındakılardan gizlətməyə çalışır. Atası təbii səbəblərdən öldükdən sonra anası bir qnomla evlənmişdir. Uşaq olanda Marsilin Pipi adlı ev heyvanı da ölmüşdür. Bu səbəbdən Marsilin əsas məqsədlərindən biri irqlər arasındakı ömür müddəti fərqini aradan qaldırmaqdır. Marsil gizli şəkildə qədim sehr öyrənir. Marsil ciddi şəxsiyyətə malikdir və tez-tez Çilçak ilə mübahisə edir. Layosdan fərqli olaraq bədheybətlərdən hazırlanmış yeməkləri yeməyə həvəsli deyil.[4]
- Sayaka Senbonqi bildirmişdir ki, Marsil zindan yeməklərini sevmədiyi üçün personajı səsləndirərkən zindan yeməklərinin real həyatdakı qarşılıqlarını ağlında təsəvvür etməyə çalışmışdır. O, ən çox zarafat səhnələrində çətinlik çəkmişdir, çünki "personajına sadiq qalmalı idi".[7]
- Çilçak Tims (チルチャック・ティムズ, Çiruçakku Timuzu?)
- Səsləndirən: Asuna Tomari
- Layosun macəraçı komandasının "yarımboy" (ハーフフット, hafufutto?) tələ ustası. O, gizli yolları aşkarlamaq və tələləri sıradan çıxarmaq üzrə mütəxəssisdir. Hiss orqanları, xüsusilə də, eşitmə qabiliyyəti çox yaxşıdır. O, öz işinə çox ciddi yanaşır və işinə qarışılmasından xoşu gəlmir. Tələləri zərərləşdirmək üçün istifadə etdiyi alətlərə diqqətlə qulluq edir. Sarkastik ifadələrdən istifadə etməyi sevir və bəzən sərt danışır. Çilçak uşaq kimi görünsə də, əslində yetkin şəxsdir. Yaşadığı dünyanın təqviminə əsasən 485-ci ildə doğulub. Həyat yoldaşı və üç qızı var,[a] lakin həyat yoldaşı onu tərk edib. Tələləri zərərləşdirmək əsas işi olduğu üçün çəkisinə diqqət yetirir və kökəlməməyə çalışır. Atası çox içməkdən ölsə də, Çilçak içməyi çox sevir.[4]
- Manqa seriyası serializasiya olunmağa başlayanda personajın ilkin adı Nulçak (ヌルチャック?) olsa da, birinci tankobon cildində Çilçak olaraq dəyişdirilmişdir.[4] Kui manqanın üçüncü fəsilinə qədər Çilçakı boz saçlarla təsvir etmişdir.[2]
- Senşi (センシ, Senşi?)
- Səsləndirən: Hiroşi Naka
- Zindanda yaşayan bədheybətlərdən yemək bişirməkdə ustalaşmış cırtdan döyüşçü. O, Qırmızı əjdahanı bişirmək ümidi ilə Layosun macəraçı komandasına qoşulur və komanda üçün aşpazlıq edir. Senşi zindanın ekologiyasına böyük əhəmiyyət verir və özünü onun bir parçası hesab edir. Onun 120-dən çox yaşı var və 76 ildir ki, zindanda yaşayır. Uşaq olanda valideynlərini itirmiş Senşi Qillin tərəfindən himayəyə götürülmüş və onun mədənçilər komandası ilə zindana çatmışdır. Aclıq səbəbilə bütün yoldaşları ölməyə başlamış və Qillin yeməsi ona qriffin əti gətirmişdir. Senşi həmin ətin həqiqətən qriffin əti, yoxsa digər yoldaşlarından birinin əti olduğunu bilməmişdir. Yaşadığı bu təcrübə onun bədheybət mətbəxinə maraq göstərməsinə səbəb olmuşdur. Orklarla yaşadığı vaxt ilk dəfə bədheybət əti yemişdir. Senşinin bıçağı mitrildən, qazanı isə adamantindən hazırlanıb və çox dözümlüdür. O, Qillinə məxsus dəbilqəni taxır.[4]
- Kui personajın hekayədə aktiv rol oynamasını istədiyi üçün ona yaponca "döyüşçü" mənasına gələn "Senşi" adını vermişdir.[3]
- İzutsumi (イヅツミ, İzutsumi?)
- Səsləndirən: Mitsuho Kambe
- Pişik-qız görünüşünə malik olan uzun adam. Onun ruhu Şərq torpaqlarında yaşayan Böyük Pişik adlı bədheybətlə insanın qarışığından ibarətdir. Yaşadığı dünyanın təqviminə əsasən 497-ci ildə Va adasında doğulub və valideynlərindən qoparılaraq "pişik qız"a çevrilib. O, "pişik qız" kimi sərgiyə qoyulmuş və Şuronun atası tərəfindən satın alınmışdır. Ona Asebi (アセビ?) adı verilmiş və Nakamoto iqamətgahında yaşamağa başlamışdır. Mayzuru onun baxıcısı olmuşdur. Zindan macərasına Şuronun komandasında başlasa da, lənətinə çarə tapmaq üçün Layosun komandasına qoşulur. İzutsumi öz istədiyini etməyi sevən, müstəqil və ərköyün şəxsiyyətə malikdir. Böyük Pişiyin ruhuna malik olduğu üçün çox çevik və sürətli döyüşçüdür.[4]
- Falin Toden (ファリン・トーデン, Farin Toden?)
- Səsləndirən: Saori Hayami
- Layosun kiçik bacısı və onun orijinal komandasının sehrbazı. Qırmızı əjdaha tərəfindən yeyildiyi üçün Layos və yoldaşları onu diriltmək üçün zindana qayıdırlar. Falin və Marsil yaxın dostdurlar, birlikdə Sehr Akademiyasında təhsil alıblar. Lakin Falin ondan fərqli olaraq ekzorsizm, gücləndirmə və bərpa sehrlərində güclüdür. Marsil qədim sehrdən istifadə edərək onu diriltməyi bacarsa da, ruhu Qırmızı əjdaha ilə birləşir və Sissle tərəfindən Falin ximeraya çevrilir. Falin də qardaşı Layos kimi bədheybətlərə böyük maraq göstərir. Yaşadığı dünyanın təqviminə əsasən 491-ci ildə doğulub. Uşaqlıqdan etibarən müəmmalı bacarıqlara malik olduğu üçün 10 yaşında Sehr Akademiyasına göndərilmişdir. Layosun orijinal komandasında olanda Şuro ona evlilik təklifi etmişdir, lakin Falinin ona qarşı hisləri yoxdur. Falin mehriban və sakit şəxsiyyətə malikdir.
- ↑ Qızlarının adları Meycek, Fullertom və Pakpettidir.
- ↑ Daydream Hour 2 (yaponca). Kadokawa. 15 avqust 2017. ISBN 978-4-04-734128-9. İstifadə tarixi: 16 may 2025.
- ↑ 1 2 Daydream Hour 3 (yaponca). Kadokawa. 15 may 2020. ISBN 978-4-04-736121-8. İstifadə tarixi: 16 may 2025.
- ↑ 1 2 "食事も、人間関係も、「苦手なもの」だったから『ダンジョン飯』を描けた。ゲームの影響と共に掘り下げる、九井諒子の「好きと嫌いの活かし方」とは【ゲーム世代の作家たち】". Defaminicogamer.jp (yaponca). 9 avqust 2024. İstifadə tarixi: 16 may 2025.
- ↑ 1 2 3 4 5 6 ダンジョン飯 ワールドガイド 冒険者バイブル (ハルタコミックス) (yaponca). Kadokawa. 13 fevral 2021. səh. 176. ISBN 978-4047362758. İstifadə tarixi: 16 may 2025.
- ↑ "あふれる原作愛を作品に昇華！ TVアニメ『ダンジョン飯』監督・宮島善博インタビュー①". Fabri.jp (yaponca). 22 dekabr 2023. İstifadə tarixi: 17 may 2025.
- ↑ "Interview with Kentaro Kumagai (Laios from Delicious in Dungeon)". UK Anime Network (ingiliscə). 1 mart 2024. İstifadə tarixi: 17 may 2025.
- ↑ 1 2 "Delicious in Dungeon Roundtable Interview w/ Kentaro Kumagai & Sayaka Sembongi @ Anime Expo 2023". The-O Network (ingiliscə). İstifadə tarixi: 17 may 2025.