DOST Agentliyi

DOST Agentliyi Azərbaycan Respublikası Prezidentinin 9 avqust 2018-ci il tarixli 229 saylı Fərmanına^[3] əsasən yaradılıb.

Azərbaycan Respublikası Prezidentinin Dayanıqlı və Operativ Sosial Təminat Agentliyinin (DOST) fəaliyyətinin təmin edilməsi haqqında 10 dekabr 2018-ci il tarixli 387 saylı Fərmanına^[4] əsasən DOST Agentliyin Nizamnaməsi, Strukturu, "DOST" mərkəzlərində göstərilən xidmətlərin siyahısı və xidmətlərin göstərilmə Qaydası təsdiq edilib.

9 may 2019-cu il tarixdə Azərbaycan Respublikasının Prezidenti İlham Əliyev və Birinci vitse-prezidenti Mehriban Əliyevanın iştirakı ilə DOST Agentliyinin və 1 saylı Bakı DOST Mərkəzinin açılışı^[5] həyata keçirilib.

24 dekabr 2019-cu il tarixdə Azərbaycan Respublikasının Prezidenti İlham Əliyevin iştirakı ilə 2 saylı Bakı DOST Mərkəzinin açılışı^[6] həyata keçirilib.

19 may 2020-ci il tarixdə Azərbaycan Respublikasının Prezidenti İlham Əliyev və Birinci vitse-prezidenti Mehriban Əliyevanın iştirakı ilə 3 saylı Bakı DOST Mərkəzinin açılışı^[7] həyata keçirilib.

30 mart 2021-ci il tarixdə Azərbaycan Respublikasının Prezidenti İlham Əliyevin iştirakı ilə 4 saylı Bakı DOST Mərkəzinin açılışı^[8] həyata keçirilib.

14 iyul 2021-ci il tarixdə Azərbaycan Respublikasının Prezidenti İlham Əliyevin iştirakı ilə Abşeron DOST Mərkəzinin açılışı^[9] həyata keçirilib.

22 oktyabr 2021-ci il tarixdə Azərbaycan Respublikasının Prezidenti İlham Əliyev, Birinci vitse-prezidenti Mehriban Əliyeva və Heydər Əliyev Fondunun vitse-prezidenti Leyla Əliyevanın iştirakı ilə Bakıda DOST İnklüziv İnkişaf və Yaradıcılıq Mərkəzinin açılışı^[10] həyata keçirilib.

27 may 2022-ci il tarixdə Zəngilanda “Ağıllı kənd” layihəsi üzrə ilk “Smart DOST” məntəqəsi istifadəyə verilib.

28 dekabr 2022-ci ildə Azərbaycan Respublikasının Prezidenti İlham Əliyevin iştirakı ilə 5 saylı Bakı DOST Mərkəzinin açılışı^[11] olub.

7 avqust 2023-cü ildə Azərbaycan Respublikasının Prezidenti İlham Əliyevin iştirakı ilə Bərdədə Qarabağ Regional DOST Mərkəzinin və Qarabağ Regional Peşə Hazırlığı Mərkəzinin açılışı^[12] olub.

05 iyul 2024-cü il tarixdə Azərbaycan Respublikasının Prezidenti İlham Əliyevin iştirakı ilə Qarabağ Regional DOST Mərkəzinin Şuşa filialının açılışı^[13] olub.

25 avqust 2025-ci il tarixdə Qarabağ Regional DOST Mərkəzinin Kəlbəcərdə DOST məntəqəsi fəaliyyətə başlayıb.^[14]

27 noyabr 2025-ci il tarixində Qarabağ Regional DOST Mərkəzinin Füzuli DOST məntəqəsi fəaliyyətə başlayıb.^[15]

Agentlik öz fəaliyyətində mütərəqqi korporativ idarəetmə standartlarını tətbiq edir. Agentliyin idarəetmə orqanları Müşahidə Şurası və İdarə Heyətindən ibarətdir. Agentliyin Müşahidə Şurası Agentliyə ümumi rəhbərliyi və nəzarəti həyata keçirir. İctimai əsaslarla fəaliyyət göstərən Şura müstəqil qərar qəbul etmək hüququna malikdir. 7 üzvdən ibarət olan Şuranın tərkibi aşağıdakı kimidir:

• Azərbaycan Respublikasının əmək və əhalinin sosial müdafiəsi naziri;
• Azərbaycan Respublikasının Birinci vitse-prezidentinin köməkçisi;
• Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri;
• Azərbaycan Respublikasının Kiçik və Orta Biznesin İnkişafı Dövlət Agentliyinin İdarə Heyətinin sədri;
• Azərbaycan Həmkarlar İttifaqları Konfederasiyasının sədri;
• Azərbaycan Respublikası Sahibkarlar (İşəgötürənlər) Milli Konfederasiyasının Prezidenti;
• Azərbaycan Respublikasının Əmək və Əhalinin Sosial Müdafiəsi Nazirliyinin bir nümayəndəsi.

Müşahidə Şurasının sədri Azərbaycan Respublikasının əmək və əhalinin sosial müdafiəsi naziridir.

Agentliyin fəaliyyətinə cari rəhbərliyi İdarə Heyəti həyata keçirir. İdarə Heyəti Müşahidə Şurasının sədri tərəfindən vəzifəyə təyin və vəzifədən azad edilən 5 üzvdən – İdarə Heyətinin sədri və dörd müavinindən ibarətdir.

Agentlikdə İdarə Heyətinə tabe olan 9 departament fəaliyyət göstərir.^[16]

DOST Agentliyi tərəfindən müxtəlif istiqamətlərdəki fəaliyyətlərin koordinasiya edilməsi məqsədilə aşağıdakı təsərrüfat cəmiyyətləri təsis edilib:

• DOST İş Mərkəzi^[17] – DOST Agentliyinin təsis etdiyi Məhdud Məsuliyyətli Cəmiyyətidir. Mərkəz, Azərbaycan Respublikasının Qanunu ilə müəyyən edilmiş formada haqqı ödənilən ictimai işlərin təşkili ilə əlaqədar işsiz şəxslərin işə qəbulu, ictimai işlərə göndərilməsi və əməkhaqlarının maliyyələşdirilməsi, ictimai işlərin təşkili yolu ilə sosial xidmətlərin göstərilməsi, ərazilərin ekoloji bərpası (ictimai əhəmiyyətli yerlərdə yaşıllaşdırma işləri, meşə zolaqlarının salınması, parklara və ictimai yerlərə qulluq), təmir, bərpa, abadlıq işlərinin və mənzil-kommunal və s. xidmətlərin görülməsi ilə bağlı dövlət siyasətinin və tənzimləmənin həyata keçirilməsi sahəsində fəaliyyət göstərir.
• DOST İnklüziv İnkişaf və Yaradıcılıq Mərkəzi^[18] – DOST Agentliyinin Müşahidə Şurasının 5 oktyabr 2021-ci il tarixli, 3 saylı qərarı ilə təsis edilmiş Məhdud Məsuliyyətli Cəmiyyətidir. Mərkəz, əlilliyi olan şəxslərin, o cümlədən müharibə əlillərinin, şəhid ailəsi üzvlərinin, eləcə də sosial cəhətdən həssas qrupların yaradıcı potensialının, istedadlarının, digər bacarıqlarının ortaya çıxarılmasına və inkişafına dəstək vermək məqsədilə fəaliyyət göstərir.
• DOST Rəqəmsal İnnovasiyalar Mərkəzi^[19] – DOST Agentliyinin Müşahidə Şurasının 17 dekabr 2021-ci il tarixli 4 nömrəli qərarı ilə təsis edilmiş Məhdud Məsuliyyətli Cəmiyyətidir. Mərkəz, Əmək və Əhalinin Sosial Müdafiəsi Nazirliyinin strukturuna daxil olan qurumların və strukturuna daxil olmayan tabeliyində olan qurumların informasiya-kommunikasiya məsələlərinin vahid şəkildə idarə edilməsi, Nazirliyin informasiya texnologiyaları siyasətinin müəyyənləşdirilməsi, dövlət və qeyri-dövlət qurumlarının informasiya bazaları ilə qarşılıqlı inteqrasiyası, elektron xidmətlərin təşkili və dayanıqlılığının təmin edilməsi, informasiya sistemlərinə dəstəyin göstərilməsi və inkişaf etdirilməsi, informasiya sistemlərinin səmərəli və təhlükəsiz işinin təmin edilməsi və bu sahədə idarəetmə sisteminin təkmilləşdirilməsi istiqamətində fəaliyyət göstərir.
• DOST İnfrastruktur Mərkəzi^[20] – DOST Agentliyinin Müşahidə Şurasının 24 iyun 2022-ci il tarixli 2 nömrəli qərarı ilə təsis edilmiş Məhdud Məsuliyyətli Cəmiyyətidir. Mərkəz, Əmək və Əhalinin Sosial Müdafiəsi Nazirliyinin strukturuna daxil olan qurumların və strukturuna daxil olmayan tabeliyində olan qurumların inzibati binalarının tikintisinin təmin edilməsi, bu istiqamətdə ilkin layihələndirilmə, layihə-smeta sənədlərinin hazırlanmasına nəzarət, zəruri rəylərin alınması, tikinti prosesinə cəlb olunmuş podratçı təşkilatlarla koordinasiyanın təşkili və nəzarət, ümumilikdə tikinti planına uyğun olaraq işlərin vaxtında aparılmasının və tikintisi başa çatmış yeni inzibati binaların istismara verilməsinin təşkili istiqamətində fəaliyyət göstərir.
• DOST Çağrı Mərkəzi 142^[21] – vətəndaşların mərkəzlərə getmədən internet və ya telefon vasitəsilə bütün xidmət növləri, tələb edilən sənədlər barədə məlumat almaq, ƏƏSMN-nin və "DOST" mərkəzlərinin fəaliyyəti ilə bağlı təkliflər bildirmək imkanı yaratmaqla təmsil etdiyi dövlət orqanının səlahiyyətlərinə aid olan sual xarakterli müraciətlər daxil olduqda, onların birbaşa cavablandırılmasını və şikayət (ərizə, təklif, məlumat) xarakterli müraciətlər daxil olduqda isə onları qeydiyyata almaqla araşdırılaraq cavablandırılması üçün aidiyyəti struktur vahidinə göndərilməsini təmin edir.

DOST Agentliyi ("DOST" mərkəzləri vasitəsilə) “Bir pəncərə" prinsipi əsasında ƏƏSMN-nin tabeliyində olan və ya strukturuna daxil olan qurumların (Dövlət Sosial Müdafiə Fondu, Sosial Xidmətlər Agentliyi, Tibbi-Sosial Ekspertiza və Reabilitasiya üzrə Dövlət Agentliyi, Dövlət Məşğulluq Agentliyi, Dövlət Əmək Müfəttişliyi Xidməti) fəaliyyəti ilə bağlı xidmətlərə çıxışı təmin edir. Əlavə olaraq, “DOST” mərkəzlərində Vahid Əlaqələndirmə Mərkəzi (VƏM)^[22] vasitəsilə Azərbaycan Respublikasının ərazi bütövlüyünün bərpa edilməsi və ərazilərin işğaldan azad olunması uğrunda aparılan hərbi əməliyyatlar zamanı şəhid olmuş şəxslərin ailə üzvlərinə, müharibə ilə əlaqədar xəsarət almış hərbi qulluqçulara və əlilliyi müəyyən edilmiş şəxslərə 6 dövlət qurumunun (Azərbaycan Respublikasının Əmək və Əhalinin Sosial Müdafiəsi Nazirliyi, Müdafiə Nazirliyi, Səhiyyə Nazirliyi, Səfərbərlik və Hərbi Xidmətə Çağırış üzrə Dövlət Xidməti, yerli icra hakimiyyəti orqanları, İcbari Tibbi Sığorta üzrə Dövlət Agentliyinin) əmək, məşğulluq, sosial müdafiə, tibbi-sosial ekspertiza, reabilitasiya, müalicə, müayinə, eləcə də digər fəaliyyət istiqamətləri üzrə xidmətlər göstərilir.

"DOST" mərkəzləri və filialları vasitəsilə əhaliyə məşğulluq, əmək münasibətləri, əmək pensiyası və sosial müavinətlər, Azərbaycan Respublikası Prezidentinin təqaüdləri, əlillik və “Hərbi vəzifə və hərbi xidmət haqqında” Azərbaycan Respublikası Qanununun 15.3-cü maddəsinə uyğun olaraq yekun tibbi müayinənin aparılması, sosial sığorta və sosial xidmətlər istiqamətində, həmçinin bank və notariat xidmətləri kimi funksional yardımçı xidmətlər də daxil olmaqla 13 istiqamət^[23] üzrə, o cümlədən Vahid Əlaqələndirmə Mərkəzləri^[24] çərçivəsində ümumilikdə 160^[25] xidmət göstərilir:

• Əmək münasibətləri — 5 xidmət
• Əlillik və “Hərbi vəzifə və hərbi xidmət haqqında” Azərbaycan Respublikası Qanununun 15.3-cü maddəsinə uyğun olaraq yekun tibbi müayinənin aparılması — 9 xidmət
• Məşğulluq — 15 xidmət
• Əmək pensiyaları — 18 xidmət
• Sosial müavinətlər, ünvanlı dövlət sosial yardım və təqaüdlər — 48 xidmət

• Övladlığagötürmə sahəsində və valideyn himayəsindən məhrum olmuş uşaqlara göstərilən xidmətlər — 5 xidmət
• Dövlət sosial sığorta sistemində fərdi uçot — 4 xidmət
• Dövlət icbari şəxsi sığorta — 5 xidmət
• Sosial xidmətlər — 23 xidmət
• Funksional yardımçı xidmətlər — 10 xidmət
• Vahid Əlaqələndirmə Mərkəzində 6 quruma aid — 18 xidmət.

Bütün "DOST" mərkəzləri^[26] üzrə iş qrafiki

İş günləri (bayram günləri və ümumxalq hüzn günü istisna olmaqla): Bazar ertəsi — cümə: 09:00–18:00;

Qeyri iş günləri: Şənbə və bazar

"DOST" mərkəzlərinin sayının 14-ə çatdırılması, həmçinin 64 filialının istifadəyə verilməsi nəzərdə tutulur. Bununla da "DOST" xidmətləri bütün Azərbaycan əhalisi üçün əlçatan olacaqdır.

"DOST Rəqəmsal İnnovasiyalar Mərkəzi" Məhdud Məsuliyyətli Cəmiyyəti Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat Agentliyinin Müşahidə Şurasının 2021-ci il 17 dekabr tarixli Qərarı ilə təsis edilib.^[27]

Qurum Əmək və Əhalinin Sosial Müdafiəsi Nazirliyinin strukturuna daxil olan qurumların və strukturuna daxil olmayan tabeliyində olan qurumların informasiya-kommunikasiya məsələlərinin vahid şəkildə idarə edilməsi, Nazirliyin informasiya texnologiyaları siyasətinin müəyyənləşdirilməsi, dövlət və qeyri-dövlət qurumlarının informasiya bazaları ilə qarşılıqlı inteqrasiyası, elektron xidmətlərin təşkili və dayanıqlılığının təmin edilməsi, informasiya sistemlərinə dəstəyin göstərilməsi və inkişaf etdirilməsi, informasiya sistemlərinin səmərəli və təhlükəsiz işinin təmin edilməsi və bu sahədə idarəetmə sisteminin təkmilləşdirilməsi istiqamətində fəaliyyət göstərir.

Bunlarla yanaşı Mərkəz tərəfindən Əmək və Əhalinin Sosial Müdafiəsi Nazirliyinin və Nazirliyin tabeliyindəki qurumların fəaliyyət istiqamətlərinə uyğun olaraq əmək, məşğulluq, sosial müdafiə və sosial təminat sahələrində informasiya texnologiyalarının tətbiqi ilə bağlı səmərəli tədbirlər görülür.

İllər üzrə müraciətlərin sayı:

*2025-ci ilin 11 ayının nəticələrinə əsasən

DOST Agentliyində könüllülük fəaliyyəti "Gənc DOST", "Gümüşü DOST", "İnklüziv DOST", "Distant DOST", "Korporativ DOST" altproqramları üzrə təşkil edilib.^[28]

Gənc DOST

Altproqram 16–29 yaş aralığında olan gənclərin sosial və ictimai faydalı fəaliyyətə cəlb olunması, işgüzar bilik və bacarıqların mənimsənilməsi və inkişafı, asudə vaxtlarının səmərəli təşkili məqsədilə yaradılıb.

Gümüşü DOST

"Könüllü DOST" proqramı və "Üçüncü Bahar" layihəsinin birgə təşkilatçılığı ilə "Gümüşü DOST" altproqramı pensiya yaşına çatmış şəxslərin (50+yaş) aktiv həyat tərzinin təmin olunması və asudə vaxtlarının səmərəli təşkilinə dəstək məqsədilə yaradılıb.

İnklüziv DOST

Altproqram DOST İnklüziv İnkişaf və Yaradıcılıq Mərkəzində əlilliyi olan şəxslərə, şəhid ailəsi üzvlərinə, müharibə veteranları və onların ailə üzvlərinə, həssas qrupdan olan uşaq və yeniyetmələrə, valideyn himayəsindən məhrum olmuş uşaqlara mərkəz daxilində zəruri dəstəyin göstərilməsi, irimiqyaslı tədbirlərdə qonaqların qarşılanması və yola salınması və digər bu istiqamətlərdə olan işləri tənzimləyir.

Distant DOST

Altproqramda təhsil, təlim, tədqiqat, ictimaiyyətlə əlaqələr, konsaltinq və digər sahələr üzrə verilən tapşırıqların onlayn qaydada icrasına şərait yaradılıb. Eyni zamanda fiziki məhdudiyyətli və əlilliyi olan şəxslərin yaşayış ünvanını tərk etmədən altproqramda iştirak etməsilə onların cəmiyyətə sosial inteqrasiyasısına, ictimai-sosial məsuliyyətliliyin artırılmasına, fərdi inkişafına şərait yaradılıb.

Korporativ DOST

Sahəvi təlimlər, mentor fəaliyyəti, sosial layihələr və tədbirlərin təşkili, ekoloji və digər uyğun sahələr üzrə fəaliyyət göstərən və ictimai-sosial məsuliyyətlilik çərçivəsində əməkdaşlıq etməkdə maraqlı olan özəl, ictimai, dövlət və digər təşkilatlar altproqrama cəlb olunub.

DigiDOST

“DigiDOST” altproqramının iştirakçıları DOST Rəqəmsal İnnovasiyalar Mərkəzinin fəaliyyət sahələrində uyğun sorğuların cavablandırılması, məlumat bazaları ilə iş, proseslərin təkmilləşdirilməsi, rəqəmsal savadlılığın artırılması və s. istiqamətlərdə fəaliyyət göstərəməsini hədəfləyib.

TeleDOST

“TeleDOST” altproqramı çərçivəsində isə DOST TV-də xəbər xülasələrinin hazırlanması, müxtəlif veriliş və layihələrin təşkili, vətəndaş müraciətlərin araşdırılması və s. istiqamətlər üzrə könüllülər cəlb edilir.

DOST Agentliyi fəaliyyətinin keyfiyyətini, şəffaflığını və idarəetmə səmərəliliyini beynəlxalq tələblərə uyğun təşkil etmək məqsədilə 2021-ci ilin əvvəlindən aşağıdakı standartların tətbiqinə başlamışdır:

• "ISO 9001: 2015"^[29] – Keyfiyyət idarəetmə sistemi.Tələblər;
• "ISO 10002: 2018"^[30] – Keyfiyyəti idarəetmə – Müştəri məmnuniyyəti – Təşkilatda şikayətlərin idarə edilməsi üzrə rəhbərlik;
• "ISO 26000: 2010"^[31] – Sosial məsuliyyət üzrə rəhbərlik;
• "ISO 37001: 2016"^[32] – Rüşvətxorluğa qarşı idarəetmə sistemləri – Təlimatlarla birgə tələblər.

Bu standartların vahid çərçivədə tətbiqi məqsədilə Agentlikdə İnteqrəedilmiş Menecment Sistemi (IMS) yaradılmışdırStandartların inteqrasiyası Agentliyin fəaliyyətində bir sıra əsas məqsədlərə xidmət etmişdir. Belə ki, xidmətlərin keyfiyyət meyarları üzrə idarə olunması və proseslərin ölçülə bilən indikatorlarla tənzimlənməsi (ISO 9001), vətəndaş müraciətlərinə baxılmasında operativlik və şəffaflığın artırılması (ISO 10002), sosial məsuliyyət prinsiplərinin təşkilati idarəetməyə sistemli şəkildə inteqrasiyası (ISO 26000), korrupsiya risklərinin azaldılması və etik davranışın gücləndirilməsi (ISO 37001) təmin edilmişdir. Nəticədə Agentlik üzrə xidmətlərin vahidləşdirilmiş qaydada göstərilməsi, hesabatlılığın yüksəldilməsi və vətəndaş məmnuniyyətinin artırılması üçün dayanıqlı idarəetmə mexanizmi formalaşdırılmışdır.

Tətbiq mərhələsi tamamlandıqdan sonra, 2022-ci ilin yanvar ayında Agentlikdə UKAS akkreditasiyasına malik LRQA (Lloyd’s Register Quality Assurance) tərəfindən beynəlxalq audit keçirilmişdir. Audit nəticəsində DOST Agentliyinin İnteqrəedilmiş Menecment Sisteminin qeyd olunan standartların tələblərinə tam uyğunluğu təsdiqlənmiş və 2022-ci ilin fevral ayında Agentliyə ISO 9001:2015, ISO 10002:2018, ISO 26000:2010 və ISO 37001:2016 üzrə beynəlxalq sertifikatlar təqdim edilmişdir..^[33]

DOST Agentliyi “Tanınma və inkişaf” şüarı ilə beynəlxalq əlaqələrini 4 əsas istiqamət üzrə formalaşdırır. Bu istiqamətlər Agentliyin sosial xidmətlər sahəsində beynəlxalq mövqeyinin gücləndirilməsi və institusional inkişafının dəstəklənməsinə yönəlib:

1. DOST modelinin beynəlxalq platformalarda tanıdılması

Agentliyin innovativ xidmət konsepsiyasının beynəlxalq tədbirlərdə, konfranslarda və çoxtərəfli əməkdaşlıq platformalarında təqdim olunması, eləcə də modelin müxtəlif ölkələrdə tətbiq imkanlarının artırılması.

2. Beynəlxalq tərəfdaşlıq şəbəkəsinin genişləndirilməsi

Sosial müdafiə və sosial xidmətlər sahəsində fəaliyyət göstərən beynəlxalq təşkilatlar, ekspert şəbəkələri və donor qurumları ilə əməkdaşlıq əlaqələrinin inkişaf etdirilməsi və yeni strateji tərəfdaşlıqların qurulması.

3. Birgə layihələrin təşviqi və həyata keçirilməsi

Sosial müdafiə, xidmət keyfiyyəti, rəqəmsallaşma və inklüzivlik istiqamətlərində beynəlxalq təşkilatlarla birgə layihələrin hazırlanması və icrası.

4. Beynəlxalq təcrübənin mənimsənilməsi və institusional inkişafın dəstəklənməsi

Qabaqcıl beynəlxalq təcrübənin öyrənilməsi, bu təcrübənin DOST modelinə inteqrasiya edilməsi və Agentliyin idarəetmə, xidmət keyfiyyəti və rəqəmsallaşma sahələrində institusional inkişafının gücləndirilməsi.^[34]

Birləşmiş Millətlər Təşkilatının Əhali Fondu (BMTƏF - UNFPA) ^[35] ilə əməkdaşlıq.

Azərbaycan Respublikası Əmək və Əhalinin Sosial Müdafiəsi Nazirliyi və BMTƏF-in birgə layihəsi olan "Bütün yaşlar üçün cəmiyyətin qurulması: Fəal yaşlanma yolu ilə Azərbaycanda yaşlıların rifahının təmin edilməsi"nin 3-cü komponenti DOST Agentliyi tərəfindən həyata keçirilib. Layihə çərçivəsində reallaşan fəaliyyətlər yaşlı insanların yeni sosial təşəbbüslərə cəlb olunmasına və yeni sosial xidmətlərin təşkil olunmasına əsaslanır:

• Yaşlı insanlar üçün sosial müdafiə və sosial təminatın bütün sahələri ilə bağlı məsləhət xidmətləri göstərmək, onları yeni texnologiyalardan səmərəli istifadə barədə maarifləndirmək və səlahiyyətləndirmək, uzunmüddətli qayğı imkanları və xidmətləri barədə ən yeni, etibarlı və qərəzsiz məlumatlara malik olmalarını təmin etmək;
• Yaşlıların təşkilati və intellektual yaddaşına əsaslanaraq onların məsləhət xidmətlərindən yararlanmaq.

Layihə çərçivəsində 19000-dən çox iştirakçı əhatə olunub, 65+ yaş kateqoriyasına aid 46 nəfər müxtəlif interaktiv formatlarda (video dərslər, vebinarlar) öz təcrübələrini bölüşüb. Tam kursu bitirən 1000-dən çox gənc sertifikatla təltif edilib, həmçinin 1050 nəfər yaşlı şəxs İnformasiya və Kommunikasiya Texnologiyaları sahəsində savadlılıq təlimlərinə cəlb olunub.

Birləşmiş Millətlər Təşkilatının İnkişaf Proqramı (BMTİP - UNDP)^[36] ilə əməkdaşlıq

BMTİP-in Azərbaycan ofisi ilə birgə 4 saylı Bakı DOST Mərkəzində Azərbaycanın ilk "İnklüziv İncəsənət Məktəbi" yaradılıb. Layihə bir-biri ilə əlaqəli fəaliyyətlər vasitəsilə Dağlıq Qarabağ müharibəsi veteranlarına və əlilliyi olan qadınlara xüsusi diqqət yetirməklə, hüquqlarının təmin edilməsi, ləyaqətinin dəyərləndirilməsi, inklüzivliyin və əlçatanlığın təmin edilməsi üzrə hökumətin təşəbbüslərinə dəstək vermək məqsədi daşıyır. Layihənin davamlılığını təmin etmək üçün Mərkəz vasitəsilə təşkilati və informasiya dəstəyi göstərilir, əlilliyi olan şəxslərə yardım məqsədilə könüllülər səfərbər olunur, təmizlik, texniki xidmət, elektrik təminatı, təhlükəsizlik və internet xərcləri qarşılanır.

Ümumdünya Səhiyyə Təşkilatı (ÜST - WHO) ilə əməkdaşlıq^[37]

DOST Agentliyi və ÜST arasında əməkdaşlıq 2022-ci ildə COVID-19-un yüksək riskli dövründə qabaqlayıcı maarifləndirmə tədbirlərini həyata keçirmək məqsədilə qurulub. “Mən seçirəm” maarifləndirmə kampaniyası çərçivəsində ÜST ilə sıx koordinasiya şəraitində birgə kommunikasiya paketi hazırlanıb və tətbiq edilib. ÜST Agentliyin kommunikasiya platformalarına uyğunlaşdırılmış poster dizaynlarının tam paketini hazırlayıb.

Əlçatanlığı təmin etmək üçün vətəndaşların, xüsusilə də yüksək risk qruplarının COVID-19 barədə vaxtında məlumatlandırılmasını dəstəkləmək məqsədilə Agentliyin rəqəmsal platformalarında vebsayt formatında 1 poster, sosial media formatında isə 2 poster paketi dərc olunub.

DOST mərkəzlərinə müraciət edən yaşlı vətəndaşların məlumatlara əlçatanlığını gücləndirmək üçün ÜST tərəfindən məlumat materialları çap edilərək təmin edilib. Bu materiallar üç əsas kateqoriyaya aiddir: 12 giriş roll-upları (6 DOST mərkəzində quraşdırılıb); mərkəzlərə gələn 60+ yaşlı vətəndaşların sayına proporsional olaraq ümumilikdə təxminən 37 500 broşür paylanıb; hər bir mərkəzdə 18 ədəd daxili A3 poster yerləşdirilib.

Bu əməkdaşlıq sağlamlıq haqqında ictimai məlumatlandırmanı gücləndirərək və həssas əhali qruplarına əlçatanlığı artıraraq ÜST–DOST tərəfdaşlığının maarifləndirmə və ictimaiyyətlə əlaqələr sahəsində uğurlu nümunəsini nümayiş etdirib.

BMT-nin Uşaq Fondu (BMTUF - UNICEF) ilə əməkdaşlıq^[38]

DOST Agentliyi, BMTUF və Dövlət Məşğulluq Agentliyinin birgə əməkdaşlığı ilə 2023–2024-cü illərdə “Əlilliyi olan gənclərin sosial-iqtisadi fəallığına dəstək” layihəsi həyata keçirilib. Layihə BMTUF-un Azərbaycan üzrə “2021-2025-ci illər üçün ölkə proqramı” və BMTUF Azərbaycan ilə Əmək və Əhalinin Sosial Müdafiəsi Nazirliyi arasında imzalanmış “Sosial müdafiə və uşaq müdafiəsi üzrə 2023-2024-cü illər üçün dövri fəaliyyət planı”na əsasən icra edilib.

Layihənin məqsədi gənclərin sosial-emosional, rəqəmsal və iş həyatına keçidi üçün zəruri bacarıqlarının inkişafı, uğurlu şəxslərin təcrübə və iş imkanlarından yararlanması və məşğulluq imkanlarının artırılması, eləcə də dövlət və özəl müəssisələrlə əməkdaşlıq əlaqələrinin qurulması və əlilliklə bağlı mənfi davranış və strereotiplərin dəyişdirilməsi olub.

Layihə 3 əsas mərhələdən ibarət olub:

1.   İlkin seçim mərhələsi – əlilliyi olan gənclərin layihəyə cəlb edilməsi və potensial iştirakçıların müəyyən edilməsi.

2.   Təlim və mentor dəstəyi mərhələsi – iştirakçıların peşə bacarıqlarının inkişafı məqsədilə təlimlər, mentor dəstəyi və şəbəkələşmə görüşlərinin keçirilməsi.

3.   İşəgötürənlərlə əməkdaşlıq və məşğulluq imkanlarının artırılması – iştirakçıların işəgötürənlərlə görüşləri, müsahibələr və təcrübə proqramlarının təşkili vasitəsilə məşğulluq imkanlarının artırılması.

Layihə çərçivəsində 53 universitet, 50 holdinq və digər şirkətlərin iştirakı təmin edilib, ümumilikdə 360 əlilliyi olan tələbə layihəyə cəlb olunub. Layihə nəticəsində 89 tələbə işəgötürənlərlə görüşüb, 53 tələbə iş müsahibələrinə dəvət olunub və 17 tələbə “Coursera” sertifikatları ilə təmin edilib.

Bu layihə, təhsil müəssisələri və işəgötürənlərlə birgə həyata keçirilən sosial-iqtisadi fəaliyyətin önəmli nümunələrindən biridir. Əlilliyi olan gənclərin sosial-iqtisadi fəallığını dəstəkləmək məqsədilə görülən işlər inklüziv və bərabər imkanlara əsaslanan bir cəmiyyətin formalaşmasına dəstək olur və bu gənclərin cəmiyyətdə daha aktiv rol oynamalarını təmin edir.

Beynəlxalq Əmək Təşkilatı (BƏT - ILO) ilə əməkdaşlıq

DOST Agentliyi və BƏT-in yerli nümayəndələri və xarici mütəxəssisləri arasında 2020-ci ilin sentyabr ayından etibarən əməkdaşlığa başlanılıb, bir sıra görüşlər və tədbirlərdə birgə iştirak edilib. Əməkdaşlıq “DOST xidmətlərinin ekspert qiymətləndirilməsi” (peer-review) və mediasiya xidmətlərinin təşkili sahələrini, həmçinin hüquqi və normativ bazanın hazırlanması, münaqişələrin həll mexanizmlərinin gücləndirilməsi, potensialın artırılması və beynəlxalq həmkarlar arasında təcrübə mübadiləsi sahələrini əhatə edir.

21 sentyabr 2022-ci il tarixində DOST Agentliyi və Mediasiya Şurası əmək bazarı ilə bağlı mediasiya xidmətlərinin DOST mərkəzləri vasitəsilə təqdim olunması üçün Anlaşma Memorandumu imzalayıb.^[39] Əməkdaşlıq həmçinin 2022–2026-cı illər üçün Layiqli İş Ölkəsi Proqramına^[40] daxil edilib və müntəzəm ekspert səfərləri və beynəlxalq vasitəçilik şəbəkələri ilə əlaqələr vasitəsilə davam etdirilib.

Agentliyin məlumat bazası və xidmət prosedurları BƏT ekspertləri tərəfindən nəzərdən keçirilib və DOST modeli inklüziv, vətəndaş mərkəzli sosial xidmətlərin təqdimatında beynəlxalq nümunə kimi qiymətləndirilib.

Avropa Sosial Şəbəkəsi (ASŞ - ESN)^[41] ilə əməkdaşlıq

DOST Agentliyi 2021-ci ildən ASŞ-nin üzvüdür.^[42] ASŞ-nin missiyası inkişaf etmiş siyasət və təcrübə yolu ilə insanlara və icmalara fayda gətirmək üçün səhiyyə, təhsil, məşğulluq və sosial inklüzivlik ilə ictimai sosial xidmətlər sahəsində məlumat mübadiləsini inkişaf etdirməkdir.

2023-cü ildən Agentliyin İdarə Heyətinin sədri Fərid Məmmədov 3 il müddətinə ASŞ-nin Himayədarlar Şurasının üzvü seçilib.

DOST Agentliyi sosial xidmətlərin təşkili, innovasiyalar, xidmət keyfiyyəti və inklüzivlik sahələrində həyata keçirdiyi təşəbbüslərlə ASŞ tərəfindən yüksək qiymətləndirilib və 2021-ci^[43] və 2024-cü^[44] illərdə “Avropa Sosial Xidmətlər Mükafatı”nın qalibi seçilib.

Agentlik 2021-ci ildən etibarən sosial təminat və sosial xidmətlərin inkişafı məqsədilə ASŞ tərəfindən təşkil edilən illik Avropa Sosial Xidmətlər Konfransında, eləcə də müxtəlif seminarlarda, panel müzakirələrində və texniki proqramlarda fəal iştirak edib. Bu fəaliyyətlər nəticəsində DOST modeli Avropa sosial xidmət ekosistemində tanıdılıb, ölkələrarası təcrübə mübadiləsi genişləndirilib və sosial siyasət sahəsində qlobal müzakirələrdə Azərbaycan təcrübəsi təqdim edilib.

Beynəlxalq Sosial Təminat Assosiasiyası (BSTA — ISSA) ilə əməkdaşlıq

DOST Agentliyi 2023-cü ildən BSTA-nın üzvüdür. Bu əməkdaşlıq Agentliyin sosial təminat, xidmət keyfiyyəti, idarəetmə, rəqəmsal innovasiyalar və sosial müdafiə sahələrində beynəlxalq təcrübəyə inteqrasiya olunmasına və qabaqcıl standartların tətbiqinə şərait yaradır.

Agentlik BSTA-nın təşkil etdiyi Avropa Regional Sosial Təminat Forumları, Dünya Sosial Təhlükəsizlik Forumu, eləcə də müxtəlif seminar, konfrans və texniki proqramlarda müntəzəm iştirak edir. Agentliyin xidmət keyfiyyəti, innovativ idarəetmə, vətəndaş məmnuniyyəti və inklüzivlik sahəsində həyata keçirdiyi təşəbbüslər BSTA tərəfindən bir sıra beynəlxalq mükafat və tanınmalarla qiymətləndirilib. Belə ki, Agentlik BSTA-nın Tanınma Proqramı çərçivəsində 2022–2025-ci il və 2025–2028-ci illəri əhatə edən 3 illik dövr üzrə Xidmət Keyfiyyəti üzrə “Mükəmməllik Sertifikat”larını əldə edib. Bundan əlavə, müxtəlif xidmət sahələri üzrə bir neçə keyfiyyət sertifikatı və digər tanınmalarla təltif olunub.

DOST Agentliyinin İdarə Heyətinin sədri Fərid Məmmədov 2024-cü ilin may ayından BSTA-nın Siyasi Təhlil və Sosial Tədqiqatlar üzrə Texniki Komissiyasının vitse-prezidenti kimi fəaliyyət göstərir və 2026–2028-ci illər üçün isə BSTA-nın Sosial Təminat Siyasətinin Təhlili və Araşdırılması üzrə Texniki Komissiyasının sədri seçilib.

BSTA ilə tərəfdaşlıq DOST modelinin beynəlxalq səviyyədə tanıdılmasını, digər ölkələrlə təcrübə mübadiləsini və sosial xidmətlərin təkmilləşdirilməsi üzrə qlobal təşəbbüslərdə iştirak imkanlarının genişlənməsini təmin edən əsas əməkdaşlıq istiqamətlərindən biridir.^[45]

• 21.01.2021 — DOST Agentliyi ilə ADA Universiteti arasında qarşılıqlı səmərəli əlaqələrin qurulması məqsədilə Anlaşma Memorandumu imzalanıb.^[46] İmzalanmış sənədi əsas götürərək Universitetin və Agentliyin mövcud infrastrukturundan və mütəxəssis bazasından istifadə edərək dövlət sektoru ilə Universitet arasında əlaqələrin inkişaf etdirilməsinə töhfə vermək məqsədilə təlim və tədris, təcrübə, tədqiqat, beynəlxalq tanınma və birgə layihələrin icrası istiqamətində işlər həyata keçirilir.
• ·03.12.2021 – Azərbaycan Respublikası İqtisadiyyat Nazirliyinin tabeliyində “Kiçik və Orta Biznesin İnkişafı Agentliyi” publik hüquqi şəxs, Əmək və Əhalinin Sosial Müdafiəsi Nazirliyi yanında “Dövlət Məşğulluq Agentliyi” publik hüquqi şəxs, Əmək və Əhalinin Sosial Müdafiəsi Nazirliyinin tabeliyində “Dayanıqlı və Operativ Sosial Təminat Agentliyi” publik hüquqi şəxs, “Azərsu” ASC, “Bakı Mühəndislik Universiteti” publik hüquqi şəxs, “FORİELLA” MMC və “Əlil Sahibkarlar Təşkilatı” İctimai Birliyi arasında “Əlil sahibkarlara dəstək” layihəsi üzrə əməkdaşlığa dair Anlaşma Memorandumu imzalanıb.^[47] Memorandum sağlamlıq imkanları məhdud və həssas sosial qruplara aid şəxslərin cəmiyyətə inteqrasiyası (gender bərabərliyi nəzərə alınmaqla əlilliyi olan şəxslərin reabilitasiyası, məşğulluq qabiliyyətlərinin qarşılanması və əmək bazarında rəqabətədavamlı fəaliyyəti üçün vacib olan maarifləndirilmə, hüquqi dəstək, peşə hazırlığının yüksəldilməsi) və sosial sahibkarlıq fəaliyyətinə təşviq etmək üzrə birgə fəaliyyətə dair qarşılıqlı əməkdaşlığı tənzimləyir.  
• 16.03.2022 — DOST Agentliyi ilə Azərbaycan Kooperasiya Universiteti arasında birgə əməkdaşlığa dair Anlaşma memorandumu imzalanıb.^[48] Memoranduma əsasən, tərəflər qarşılıqlı təcrübə mübadiləsi, birgə proqramların təşkili, tələbələrin dövlət xidmətləri sahəsində bilik və bacarıqlarının formalaşdırılması istiqamətində razılığa gəliblər. Memorandum innovativ təşəbbüslərin həyata keçirilməsini, araşdırma, statistika və təhlillərin aparılmasını və digər oxşar məsələlər üzrə birgə fəaliyyətin təşkilini də əhatə edir.
• 01.04.2022 — DOST Agentliyi ilə Bakı Dövlət Universiteti arasında birgə əməkdaşlığa dair Anlaşma memorandumu imzalanıb.^[49] Memorandumda birgə əməkdaşlıq platformasının hazırlanması, dövlət xidmətləri sahəsində innovativ və yüksək texnologiyalara əsaslanan həll yollarının tapılması ilə bağlı maddələr əksini tapıb. Razılaşma çərçivəsində Bakı Dövlət Universitetinin bakalavr və magistr tələbələrinin müxtəlif könüllü və təcrübə proqramlarında iştirakı təmin edilir. Agentliyin müvafiq əməkdaşları da universitetin tədris-innovasiya infrastrukturundan yararlanacaq, DOST könüllüləri isə universitetin gənclər üçün təşkil edilən təlim proqramlarında iştirak edirlər.
• 18.05.2022 – DOST Agentliyi ilə Azərbaycan Turizm və Menecment Universiteti (ATMU) arasında birgə əməkdaşlığa dair Anlaşma memorandumu imzalanıb.^[50] Memoranduma əsasən, tərəflər qarşılıqlı təcrübə mübadiləsi, birgə proqramların təşkili, tələbələrin dövlət xidmətləri sahəsində bilik və bacarıqlarının formalaşdırılması istiqamətində razılığa gəliblər. Memorandum innovativ təşəbbüslərin həyata keçirilməsini, araşdırma, statistika və təhlillərin aparılmasını və digər məsələlər üzrə birgə fəaliyyətin təşkilini də əhatə edir. Razılaşma çərçivəsində Azərbaycan Turizm və Menecment Universitetinin bakalavr və magistr tələbələrinin müxtəlif könüllü və təcrübə proqramlarında iştirakı təmin ediləcək. Bununla yanaşı, Agentliyin əməkdaşları da universitetin tədris-innovasiya infrastrukturundan yararlanacaq, DOST könüllüləri isə universitetin gənclər üçün təşkil edilən təlim proqramlarında iştirak edəcəklər.
• 23.08.2022 – DOST Agentliyi ilə Təhsil Tələbə Krediti Fondu arasında birgə əməkdaşlığa dair Anlaşma memorandumu imzalanıb^[51] Memoranduma əsasən, tərəflər təhsil tələbə krediti alan tələbələrin müvafiq sahədə könüllü və təcrübə proqramlarında iştirakının dəstəklənməsi, Agentliyin işində elmi-tədqiqat işlərinin və innovasiyaların tətbiqinin genişləndirilməsi, birgə layihələrin həyata keçirilməsi və s. istiqamətlərdə razılığa gəliblər.
• 21.09.2022 — DOST Agentliyi ilə Mediasiya Şurası arasında anlaşma memorandumu imzalanıb. Memoranduma əsasən, ilkin mərhələdə DOST mərkəzləri vasitəsilə əmək münasibətlərindən irəli gələn mübahisələr üzrə mediasiya xidmətlərinə çıxışın təmin olunması nəzərdə tutulub.
• 02.11.2022 – DOST Agentliyi ilə Azərbaycan Əmək və Sosial Münasibətlər Akademiyası arasında Anlaşma memorandumu imzalanıb.^[52] Memoranduma əsasən, tərəflər qarşılıqlı təcrübə mübadiləsi, birgə proqramların təşkili, tələbələrin sosial xidmətlər sahəsində bilik və bacarıqlarının formalaşdırılması istiqamətində əməkdaşlıqla bağlı razılığa gəliblər. Memorandum innovativ təşəbbüslərin həyata keçirilməsini, araşdırma, statistika və təhlillərin aparılmasını və digər məsələlər üzrə birgə fəaliyyətin təşkilini də əhatə edir. Razılaşma çərçivəsində Azərbaycan Əmək və Sosial Münasibətlər Akademiyasının bakalavr və magistr tələbələrinin müxtəlif könüllü və təcrübə proqramlarında iştirakı təmin ediləcək. Bununla yanaşı, Agentliyin əməkdaşlarının və Universitetin müəllim və tələbələrinin birgə təlim proqramlarında iştirakı barədə razılıq əldə olunub.
• 07.12.2022 – DOST Agentliyi ilə Azərbaycan Memarlıq və İnşaat Universiteti (AZMİU) arasında birgə əməkdaşlığa dair Anlaşma memorandumu imzalanıb.^[53] Memoranduma əsasən, tərəflər qarşılıqlı təcrübə mübadiləsi, birgə proqramların təşkili, tələbələrin dövlət xidmətləri sahəsində bilik və bacarıqlarının formalaşdırılması istiqamətində razılığa gəliblər. Memorandum innovativ təşəbbüslərin həyata keçirilməsini, araşdırma, statistika və təhlillərin aparılmasını və digər məsələlər üzrə birgə fəaliyyətin təşkilini də əhatə edir. Razılaşma çərçivəsində Azərbaycan Memarlıq və İnşaat Universiteti bakalavr və magistr tələbələrinin müxtəlif könüllü proqramlarında iştirakı təmin ediləcək. Bununla yanaşı, Agentliyin əməkdaşları da universitetin tədris-innovasiya infrastrukturundan yararlanacaq, DOST könüllüləri isə universitetin gənclər üçün təşkil edilən təlim proqramlarında iştirak edəcəklər.
• 24.06.2023 – DOST Agentliyi ilə Azərbaycan Banklar Assosiasiyası (ABA) arasında birgə əməkdaşlıq haqqında Anlaşma memorandumu imzalanıb.^[54] Memoranduma əsasən, tərəflər praktiki əlaqələrin genişləndirilməsi, qarşılıqlı təcrübə mübadiləsi, birgə proqramların təşkili, innovativ təşəbbüslərin həyata keçirilməsi, korporativ sosial məsuliyyət sahəsində əməkdaşlığın qurulması, sosial sahədə maarifləndirilmə və s. məsələlər barədə birgə əməkdaşlıqla bağlı razılığa gəliblər. Razılaşma çərçivəsində əlilliyi olan şəxslərin bank xidmətlərinə əlçatanlığının təmin edilməsi istiqamətində birgə tədbirlərin görülməsi, Assosiasiya üzvlərinin əməkdaşları üçün əlilliyi olan şəxslərə münasibətdə xüsusi yanaşmanın formalaşdırılması və təkmilləşdirilməsi məqsədi ilə müvafiq sahələrə aid seminarlar, konfranslar, təlimlərin keçirilməsi, birgə əməkdaşlıq proqramlarına könüllülərin cəlb edilməsi və s. istiqamətdə razılıq əldə olunub.

DOST Agentliyi sosial xidmətlərin təşkili, rəqəmsal transformasiya, xidmət keyfiyyəti və könüllülük fəaliyyəti sahəsində 36 beynəlxalq mükafat və tanınma əldə edib. Bunlardan ən nüfuzluları aşağıdakılardır:^[55]

Beynəlxalq Sosial Təminat Assosiasiyası

• Ən yaxşı təcrübə mükafatı (2022)

-        “DOST: 65 yaşdan yuxarı vətəndaşlar üçün sosial dəstək” – qalib

-        “Ləyaqətli və bərabərhüquqlu həyat” – fərqlənmə sertifikatı

-        “Vətəndaş məmnunluğu monitorinqi sistemi” – fərqlənmə sertifikatı

• Ən yaxşı təcrübə mükafatı (2024)

-       “DOST İndeks: Əməliyyat idarəetməsində qərarların qəbulu üçün dəstək aləti” – fərqlənmə sertifikatı

-       “DOST Çağrı Mərkəzi: Transformasiya strategiyası–reallıq, uyğunluq və şəffaflıq” – fərqlənmə sertifikatı

-       “DOST Könüllülük proqramı” – fərqlənmə sertifikatı

-       “DOST xidmətləri: Evdə sosial xidmət hər yerdə xidmətinizdə” – fərqlənmə sertifikatı

• “Xidmət keyfiyyəti üzrə Mükəmməllik sertifikatı” (2022-25, 2025-28) – qalib

• “Video Festival” (2025) 

-       “Dulusçu” videosu – fərqlənmə sertifikatı

Avropa Sosial Xidmətlər Mükafatları

• 2020-ci il

-        “Hüquq və ləyaqətlə yaşanan həyat həyatın özündən daha üstündür”– finalçı sertifikatı

• 2021-ci il

-        “DOST: Dayanıqlı sosial xidmətlər üçün smart model” – qalib

-        “DOST Könüllülər komandası” – finalçı sertifikatı  

• 2022-ci il

-        “DOST İndeks: Hökumət-vətəndaş xidmətləri üçün xüsusi biznes analitika” – finalçı sertifikatı

• 2023-cü il

-        “Gümüşü DOST – Bütün yaşlara hörmətlə”– finalçı sertifikatı

• 2024-cü il

-        “DOST Agentliyi: Azərbaycanda əlilliyi olan və digər risk qruplarına aid şəxslər üçün veb əlçatanlığın təmin edilməsi” – qalib

• 2025-ci il

-        “DOST: Vətəndaş yönümlü, rəqəmsal innovasiya ilə sosial transformasiya” – finalçı sertifikatı

-        “Sosial xidmətlər sahəsində liderlik – Fərid Məmmədov” – finalçı sertifikatı

Brandon Hall Qrup

• 2024-cü il

– “Könüllü DOST proqramı” – qızıl mükafat

• 2025-ci il

    – “DOST VOLT: Sabahın könüllüləri” – qızıl mükafat

Digər beynəlxalq tanınmalar

-        Customer Contact Week (2025):

“DOST CareCall”  – finalçı sertifikatı

-        Association for Project Management (APM) (2025):

“Tələbələrin Akselerasiya Proqramı - Əlilliyi olan gənclərin sosial-iqtisadi fəallığına dəstək” və “DOST Agentliyi” – finalçı sertifikatı

-        WSIS – İnformasiya Cəmiyyəti üzrə Ümumdünya Sammiti (2024):

Aktiv qocalmanın təşviqi layihəsi  – finalçı sertifikatı

-        “We Are Together” beynəlxalq mükafatı (2023):

“Könüllü DOST” – finalçı sertifikatı

-        Global HR Summit (2023):

“Könüllü DOST” – qalib

-        Goodwill Meridian (2020):

“DOST TALKS” layihəsi – qalib

"DOST" mərkəzlərində göstərilən xidmətlərin keyfiyyətinin daha da yüksəldilməsi məqsədilə vətəndaş məmnunluğunun ölçülməsi həyata keçirilir. Məmnunluğun ölçülməsində NPS (Net Promoter Score) və CSAT (Customer Satisfaction) kimi geniş yayılmış, qabaqcıl yanaşmalardan istifadə edilir.

Vətəndaşların "DOST" mərkəzlərindən məmnunluq səviyyəsi 98,7%, DOST Çağrı Mərkəzi 142-dən məmnunluq səviyyəsi isə 95%-dir.^[56]