Corce Otaşeviç

Corce Otaşeviç 1 dekabr 1959-cu ildə keçmiş Yuqoslaviyanın (indiki Serbiya) Ujitse şəhərində anadan olmuşdur. Belqrad Universitetinin Filologiya fakültəsini bitirmişdir. Onun buraxılış işi semiotika üzrə “Tapmacalar işarə sistemi kimi” mövzusunda olmuşdur. Bu, universitet tarixində müəllif tapmacalarına (krossvordlar, rebuslar, anaqramlar və s.) əsaslanan ilk araşdırmadır. Magistratura və doktorantura təhsilini də həmin fakültədə almışdır. Çoxlu sayda elmi əsərləri çap olunmuşdur. Filologiya elmləri doktorudur.^[1]

Corce Otaşeviç Belqrad çempionu və cüdo üzrə Serbiyanın vitse-çempionu olmuşdur. O, bir müddət rok qrupunda orqan ifa etmiş və “Nebo” adlı məşhur mahnının müəllifi olmuşdur.^[2]

Otaşeviç Serbiya Elmlər və İncəsənət Akademiyasının Serb Dili İnstitutunda çalışır. Həmin institutun nəşr etdiyi “Linqvistik aktual hadisələr” (Lingvističke aktuelnosti) və “Ədəbiyyat icmalı” (Književni pregled) jurnallarının baş redaktorudur.

O, Serbiyanın aparıcı özəl nəşriyyatlarından biri olan “Alma" nəşriyyatının (Izdavačka kuća Alma) təsisçisi və direktorudur. Hal-hazırda Belqradda yaşayır.

Otaşeviç yaradıcılığa 24 fevral 1978-ci ildə “Enigma” dərgisində dərc olunmuş tapmacalarla başlamışdır.

Aforizmlərdən ibarət “Kreditlə qətl” (2002), “Zəfər tağında boşluq” (2010), “Dolma quşlarının cıvıltısı” (2020), “Seçilmiş aforizmlər” (2021) kimi kitabların müəllifidir. “Plastik çiçəklər necə qoxuyur” (2001), “Daha yaxşı gələcəyin xronikası” (2003), “Seçilmiş hekayələr” (2008), “Paxıllıq və digər pis vərdişlər” (2018) və “Seçmə hekayələr” (2020) və başqa hekayə topluları nəşr etdirmişdir.

İndiyədək altmışa yaxın lüğət, dərs vəsaiti, dərslik və monoqrafiya çap etdirmişdir. Səksənə yaxın antologiya, kitab tərtibatı, aforizmlər və hekayələr toplusu hazırlamışdır. Onun əsərləri dəfələrlə yerli və xarici antologiya və kolleksiyalara daxil edilmişdir. Əsasən aforizmlər, satirik və lirik hekayələr yazır.

Xarici dillərin tədrisində tapmacaların rolu mövzusunda bir sıra beynəlxalq konfranslarda çıxış etmişdir. Yeddinci və səkkizinci siniflər üçün rus dili dərslikləri ilə yanaşı tapmaca topluları, altıncı sinif üçün ingilis dili tapmaca toplusu, eləcə də serb dilini xarici dil kimi öyrənənlər üçün müxtəlif materiallar hazırlamışdır.

Əsərləri ingilis, rus, makedon, polyak, slovak, italyan, rumın, bask və digər dillərə tərcümə olunmuşdur. Bir neçə nüfuzlu ədəbi mükafata layiq görülmüşdür.

• Kako miriše plastično cveće (Plastik çiçəklər necə qoxuyur, qısa hekayələr), 2001
• Ubistvo na kredit (Kreditlə qətl, aforizmlər), 2002
• Hronika bolje budućnosti (Daha yaxşı gələcəyin xronikası, qısa hekayələr), 2003
• Izabrane priče (Seçilmiş hekayələr), 2008
• Tematski rečnik srpskog jezika (Serb dilinin tematik lüğəti), Belqrad, 2020
• Glosar novijih reči (Son sözlərin lüğəti), 2022

• Интервју са Ђорђем Оташевићем
• Ђорђе Оташевић - Издавачка кућа Алма