Codi Foster

Hollivudun məşhur aktrisalarından olan Alişa Kristian Codi Foster 1962-ci ilin 19 noyabrında ABŞ-nin Kaliforniya ştatının, Los-Anceles şəhərində anadan olub. Codi aktrisalıq fəaliyyətinə hələ üç yaşında olarkən reklam çarxlarına və teleseriallara çəkilməklə başlayıb. 1970-ci illərdə isə "Volt Disney" studiyasının bir neçə filmlərində çəkilib. Aktrisanın böyük kinoda ilk rolu "Napoleon və Samanta" (1972) filmi ilə başlayır. 1974-cü ildə rejissor Martin Skorsezenin "Alisa artıq burada yaşamır" filmində rol alır. Daha sonra isə elə bu rejissorun "Taksi sürücüsü" (1976) filmində yüngül həyat tərzli yeniyetməni canlandıran aktrisa 14 yaşında ilk dəfə Oskar-a nominant olur. Məhz bu filmdən sonra onu uzun müddət izləyən Con Hinkli adlı bir şəxs sonradan 1981-ci ildə ABŞ prezidenti Ronald Reyqanı öldürməyə cəhd etmişdir. O, bu addımıyla Codi Fosterin xoşuna gəlmək istədiyini bildirmişdir. Xatırladaq ki bu filmin ssenarisinə əsasən filmdə Travis Bickle-ı oynayan Robert De Niro da prezidentliyə namizədə sui qəsd edir. 1985-ci ildə Jodie "ədəbi tənqid" ixtisası üzrə Yel Universitetini bitirir. Aktrisa böyük kinoya 1988-ci ildə "The Accused" filmində oynadığı baş rolla qayıdır və bu rolu ona "Oskar" gətirir. Üstündən üç il keçdikdən sonra "Quzuların səssizliyi" (1991) filmində ifa etdiyi rola görə ikinci dəfə "Oskar"-a layiq görülür. 1995-ci ildə "Nell" filmindəki roluna görə Jodie yenidən bu mükafata nominant olur, amma bu dəfə heykəlcik başqa aktrisanın qisməti olur. Amma hər halda dünya kinosu tarixində yalnız Codi Foster və Hillari Svenk 30 yaşınadək iki "Oskar" qazanmış aktrisalardır. Codi daha sonralar "Maverik" (1994), "Kontakt" (1997), "Anna və kral" (1999), rejissor Deyvid Finçerin "Panika otağı" (2002), "Flightplan" (2005), "Inside Man" (2006), "The Brave One" (2007), "Nimin Adası" (2008) kimi filmlərdə və 2011-ci ildə ekranlara çıxan, özünün də rejissoru olduğu "Qunduz" filmində rol almışdır. "17744 Jodiefoster" asteroidi aktrisanın şərəfinə belə adlandırılıb. Foster fransızca sərbəst danışır və bəzi filmləri fransız dilinə özü dublyaj edir. Codi Foster 2014-cü ilin aprelində qadın fotoqrafçı Aleksandra Hedisonla ailə həyatı qurmuşdur.

1. Alisa artıq burada yaşamır (film, 1974) / Alice Doesn't Live Here Anymore
2. Quzuların səssizliyi (film, 1991) / The Silence of the Lambs
3. Anna və kral (film, 1999) / Anna and the King

•   Vikianbarda Jodie Foster ilə əlaqədar mediafayllar var
• Codi Foster — IMDb səhifəsi
• Jodie-Online.net Arxivləşdirilib 2017-09-17 at the Wayback Machine (ing.)
• TV and Movie Trivia Tribute: Jodie Foster  (ing.)
• Cudi Foster Rusiya fan sartında Arxivləşdirilib 2014-05-14 at the Wayback Machine