Cahandar Bayoğlu

Cahandar Bayoğlu Qərbi Azərbaycanın Amasiya rayonunun Ağbaba-Şörəyel mahalının Qaraçanta kəndində anadan olub. 1971-ci ildə Qaraçanta orta məktəbində təhsil almağa başlayıb, 1981-ci ildə məktəbi bitirib. 1982-ci ildə Azərbaycan İnşaat Mühəndisləri Universitetində ali təhsil alıb. 1989-cu ildə İnşaat Mühəndisləri İnstitutunu “inşaat mühəndisi” ixtisası üzrə bitirib. 1983–1985-ci illərdə hərbi xidmətdə olub.^{[4] [5]}

1987-ci ildən Elçibəylə tanışlığı ilə Milli azadlıq hərəkatının başlanmasında fəal iştirak edib. 1989-cu ildə Azərbaycan Xalq Cəbhəsinin üzvü olaraq AXC-nin təsis konfransının səlahiyətli nümayəndəsi, AXC-nin Yasamal və Nəsimi rayon təşkilatlarının idarə heyətinin üzvü olub.

1994-cü ildən Bütöv Azərbaycan ideyasının təşkilatlanmasında təşkilatçılardan biri olub. 1998-ci ildə qurulan Bütöv Azərbaycan Birliyinin (BAB) təbliğatdan sorumlu rəhbəri vəzifəsinə təyinat alıb. 2000-ci ildən partiya mənsubiyyətinə son verərək Bütöv Azərbaycan davasında mücadiləsini davam etdirib.

2002-ci ildə Güney Azərbaycan Müdafiə Komitəsinin qurucu başqanı olub. 2006-cı ildən özəl biznes fəaliyyəti ilə məşğul olub. 2018-ci ildə Birləşik Azərbaycan Yurdları (BAY) Ocaqlarının qurucu başqanı olub. 19 fevral 2020-ci ildə məsləkdaşları ilə birlikdə Turan Partiyasını qurub və partiyanın qurucu başqanı olaraq fəaliyyətinə davam edib. 2023-cü ildə Turan Partiyasınında qurucu üzvlərindən olduğu Turan Hərəkatının qurucu başqanı olaraq fəaliyyət göstərməyə başlayıb. Hazırda da Turan Hərəkatının başqanı olaraq ictimai-siyasi fəaliyyətlə məşğuldur.^[6]

Sonrakı illərdə “Atatürk və Türk kimliyi”, “Şah Xətayi–Sultan Səlim” beynəlxalq simpoziumlarının təşkilatçılarından olub. Uluslararası Türk Dünyası ödül törəninin təşkilatçılarından biri olaraq Türk Dünyası aydınlarının Bakıda toplantısını gerçəkləşdirib. Türk Dünyası sənətçilərinin iştirakı ilə Bakı şəhərində Türklük Şöləninin gerçəkləşməsinin təşkilatçılarından olub.

2014-cü ildə Ankara Hacettepe Universitetinin gerçəkləşdirdiyi uluslararası Oğuzlar Simpoziumunda “Oğuzlar və Türk kimliyi” mövzusunda elmi məqaləylə çıxış edib. Elə həmin il Amerika Birləşmiş Ştatları Dövlət Departamentinin təşkil etdiyi Ortadoğu masasında dinləmələrə qatılıb və Nyu-York şəhərində BMT TŞ Azərbaycan nümayəndəliyini ziyarət edib.

2014-cü ilin noyabr ayında Saka Yakutyada Yakutsk Dövlət Universitetində Qarabağ mövzusunda Azərbaycan həqiqətləri ilə bağlı konfransda çıxış edib. 2015-ci ildə Doğu Türküstana səfər edərək Türk dünyasının ən nəhəng alim və dövlət adamı Mahmud Kaşğarinin və Qaraxanlı dövlətinin vəziri, böyük fikir adamı Yusif Xas Hacibin məqbərələrini ziyarət edib. Ayrı-ayrı zamanlarda Dünya Azərbaycanlıları diasporunun təşkilatlanması məqsədilə konqreslərə qatılıb.

Regional və beynəlxalq siyasətlə bağlı onlarla elmi-siyasi məqalənin müəllifidir. Müxtəlif televiziya proqramlarında bu mövzularda dəfələrlə çıxış edib.

Evlidir, iki övladı var.