Cəhənnəm maşını (film, 2022)

Brüs Koqbern — tənqidçilər tərəfindən müxtəlif rəylər almış məşhur Cəhənnəm maşını adlı kitabın müəllifidir. O özünü cəmiyyətdən təcrid etmiş olsa da, bir fanatının ona fasiləsiz olaraq məktublar göndərməyə başlaması ilə gizləndiyi yerdən çıxmağa məcbur olur.^[2] Koqbern 25 ildir ki, Amerikanın cənub-qərb hissəsində təcrid olunmuş bir formada yaşayır. 1981-ci ildə Tennessi ştatının Noksvil şəhərində yerləşən bir universitetdə baş vermiş və 13 nəfərin öldüyü atışmadan sonra o bu həyatı seçmişdir. Çünki bu cinayəti etmiş həmin gənc etdiyi cinayətinə bəraət qazandırmaq üçün bütün məsuliyyəti Koqbernin bu kitabının üstünə ataraq ona bu əmrin sözügedən kitab tərəfindən verildiyini iddia etmişdir.

İllər sonra Koqbernin poçt qutusuna "Uilyam Dükent" adlı bir yazıçıdan məktublar gəlməyə başlayır — o, Koqbernə ondan müsahibə almaq istədiyini bildirir. Koqbernin evində telefon olmadığına görə ən yaxın məntəqədə yerləşən telefon köşkünə getmək üçün ona 45 dəqiqə vaxt lazım olur. Burada isə o, Dükentə əsəbi bir halda səsli təhdidlərlə dolu olan mesajlar verərək ondan yazdığı bu məktubları dayandırmasını tələb edir. Bundan sonra onun paranoyası daha da artır, alkoqol istifadəsi isə nəzarətdən çıxır.

Nəhayət, Koqbern saxta bir adla cinayətkarla həbsxanada görüşə gedir. Amma bu səfər gözlənilməz nəticə verir — qatil onun gəlişinin kitab tərəfindən ona əvvəlcədən xəbər verildiyini bildirir, daha sonra isə qatil həbsxanadan qaçmağı bacarır və birbaşa Koqbernin yaşadığı evə gəlir. Onların arasında ölüm-dirim mübarizəsi gedir və Koqbern onu çətinliklə də olsa öldürməyi bacarır.

Lakin hekayənin sonunda hər şey dəyişir: məlum olur ki, Cəhənnəm maşını kitabını əslində Koqbern deyil, onun müəllim işlədiyi dövrdəki tələbələrindən biri (Elayci Baret) yazmışdır. Həmin tələbə əsəri başa çatdırdıqdan sonra psixi pozğunluq keçirərək özünü yandırıb intihar etməyə cəhd etmişdir. Ailəsinin də həmin tələbəyə olan süni həyat dəstəyini dayandırdığını bildikdən sonra Koqbern, kitabı oğurlayaraq öz adı ilə nəşr etdirmişdir.

Filmin sonunda həmin tələbə yenidən üzə çıxır və Koqbernlə bir binada üz-üzə gəlir. Həmin tələbə burada çox mürəkkəb bir mexanizm yaratmışdı. Onun məqsədi bu binanı yandırmaq, yanğın zamanı isə özü ilə bərabər keçmiş müəllimini də öldürmək idi. Lakin Koqbern alovun içindən sağ çıxmağa nail olur və bütün həqiqətləri yazdığı məktubu bir poçt qutusuna salmağı bacarır.

• Qay Pirs — Brüs Koqbern
• Elis İv — Laura Hiqqins
• Aleks Pettifer — Duayt Taffort
• Ceremi Devis — Elayci Baret

Filmin çəkilişləri beş həftə ərzində Portuqaliyanın Alqarve şəhərində, Portuqaliyanın Moviebox Studiosunda və Lole şəhəri və onun ətrafındakı yerlərdə aparılmışdır. Paramount Pictures 2021-ci ilin oktyabr ayında Cəhənnəm maşını filminin dünya üzrə hüquqlarını əldə etmişdir.^[3] Filmi icraçı prodüser Cek Kristianın “Filmology Finance” maliyyə şirkəti maliyyələşdirmişdir.^[1]

Rotten Tomatoes saytında 13 tənqidçinin 46%-i filmə müsbət rəy vermiş və filmin orta reytinqi 5,5/10 olmuşdur.^[4]

Cult Following saytından Evan Qlidou (ing. Ewan Gleadow) Qay Pirsin "nəhayət, ulduzunu bir az daha gücləndirəcək bir performansda rahatlıq və keyfiyyət əldə etmiş olduğunu" əsas gətirərək film haqqında müsbət rəy bildirmişdir.^[5]

• Cəhənnəm maşını — Internet Movie Database saytında