Cəfər Mehdi oğlu Cəfərov (22 dekabr 1904, Bakı – 8 dekabr 1968, Bakı) —pedaqoq, dilçi, tərcüməçi. Alman dili üzrə dərsliklərin və lüğətlərin həmmüəllifi, fonetika sahəsində bir sıra elmi və metodiki əsərlərin müəllifidir.
| Cəfər Cəfərov | |
|---|---|
| Doğum tarixi | 22 dekabr 1904 |
| Doğum yeri | |
| Vəfat tarixi | 8 dekabr 1968 (63 yaşında) |
| Vəfat yeri | |
| Elm sahəsi | alman dili |
Cəfər Mehdi oğlu Cəfərov 22 dekabr 1904-cü ildə Bakı şəhərində hərbçi ailəsində anadan olmuşdur. 1912–1917-ci illərdə Bakı şəhərində A. P. Yemilyanov adına gimnaziyada, 1918–1920-ci illərdə isə Bakı şəhəri IV kişi gimnaziyasında təhsil almışdır. Orta təhsilini başa vurduqdan sonra Azərbaycan Politexnik İnstitutunun Mühəndislik fakültəsinə daxil olmuş, lakin təhsilini yarımçıq qoyaraq Almaniyada davam etdirmişdir. 1922-ci ildə Almaniyanın Berlin Universitetinin nəzdində fəaliyyət göstərən Alman Dilinin Tədrisi İnstitutuna qəbul olunmuşdur.[1] İnstitutda təhsilini başa vurduqdan sonra Berlin Kommersiya İnstitutunda ali təhsilini davam etdirmiş və 1926/27-ci illərdə oranı bitirmişdir.[2]
1927-ci ildə hərbi xidmətə çağırılmışdır. 1937-ci ildə Təkminləşdirmə İnstitutunun nəzdində fəaliyyət göstərən xarici dil müəllimlərinin hazırlanması üzrə kursu bitirmişdir. Həmin ildən V. İ. Lenin adına Azərbaycan Pedaqoji İnstitutunun Xarici dillər fakültəsində pedaqoji fəaliyyətə başlamışdır. 1941–1943-cü illərdə Böyük Vətən Müharibəsində iştirak etmiş, 1943-cü ildən etibarən yenidən pedaqoji fəaliyyətini davam etdirmişdir. 1948-ci ildən Azərbaycan Pedaqoji Xarici İnstitutunun Praktik Alman Dili kafedrasında baş müəllim, həmin ildə Alman dili fakültəsinin dekanı, 1949-cu ildən isə Alman Dilinin Fonetikası kafedrasının müdiri vəzifələrində çalışmışdır. Fonetikanın nəzəri və metodiki məsələlərinə dair 22 elmi məqalənin müəllifidir. Alman dili üzrə bir sıra dərsliklərin həmmüəllifi, “Almanca–Azərbaycanca lüğət”in redaktoru və həmmüəllifi olmuş, müxtəlif tərcümə əsərləri hazırlamışdır.[2]
1956-cı ildə İnstitutda Texniki vasitələrin tədrisi laboratoriyası, 1950-ci ildə isə onun təşəbbüsü ilə Xarici dillərin fonetikası kafedrası yaradılıb.[3] İnstitutun ictimai həyatında aktiv fəaliyyət göstərən C. Cəfərov eyni zamanda dilmanclıq fəaliyyəti ilə də məşğul olub.[4]
Əmək və müharibə veteranı Cəfər Cəfərov "Şərəf nişanı" ordeni, "Böyük Vətən Müharibəsində göstərdiyi şücaətə görə", "Əmək fəaliyyətindəki xidmətlərinə görə", "Əmək veteranı" medalları ilə təltif olunub, Azərbaycan SSRİ-nin əməkdar müəllimi fəxri adına layiq görülüb, çoxlu sayda təşəkkürnamələri var.[2][4]
- ↑ Manafov, Namaz. "Giriş əvəzi" (PDF). Kredo. 2021-05-19. 2.
- ↑ 1 2 3 "Azərbaycan Universitetində tanınmış alimin xatirəsi anılıb". azertag.az (az.). İstifadə tarixi: 2025-04-17.
- ↑ "İngilis dilinin fonetikası kafedrası - ADU". adu.edu.az. İstifadə tarixi: 2025-04-17.
- ↑ 1 2 "525-ci qəzet - ADU-da görkəmli alim Cəfər Cəfərovun xatirəsi anılıb". 525.az. İstifadə tarixi: 2025-04-17.