Bunşokan (文翔館?) – Yaponiyanın Yamaqata prefekturasının Yamaqata şəhərində yerləşən tikili. Erkən Tayşo dövrünə aid Qərb memarlıq üslubunun əhəmiyyətli nümunələrindən biridir. Tikili kompleksi keçmiş prefektura ofisi və assambleya binası olmaqla iki əsas binadan ibarətdir. Bunşokan ictimaiyyətə açıqdır və burada konsertlər, tamaşalar, sərgilər və yerli tədbirlər keçirilir.
| Bunşokan | |
|---|---|
 | |
 | |
| Ümumi məlumatlar | |
| Memarlıq üslubu | neointibah memarlığı |
| Ölkə | |
| Koordinatlar | 38°15′24″ şm. e. 140°20′28″ ş. u.HGYO |
| Digər məlumatlar | |
| gakushubunka.jp/bunsyoka… | |
 Vikianbarda əlaqəli mediafayllar | |
Bunşokan 1916-cı ildə ingilis neointibahı üslubunda tikilmişdir. Yamaqata prefekturasının ofisi və assambleya binası kimi istifadə olunmuşdur. 1984-cü ildə Əhəmiyyətli Mədəni Mülk statusu almışdır. 1986–1996-cı illərdə tikilidə bərpa işləri aparılmışdır. Hazırda tikilidə Yamaqata Prefekturası Tarix-Diyarşünaslıq Muzeyi fəaliyyət göstərir.[1]
İkinci mərtəbədə Yamaqata prefekturası boyunca axan Moqami çayına aid mədəni və tarixi artefaktlar sərgilənir. Yamaqata ədəbiyyatına həsr olunmuş guşədə Yamaqata prefekturasından olan yazıçıların və ya Yamaqata haqqında əsərlər yaratmış müəlliflərin işləri nümayiş etdirilir. Mühasibatlıq otağında erkən Şova dövrünün atmosferi yaradılıb: burada həmin dövrün işçilərini əks etdirən insan maketləri yerləşdirilmişdir. Sərgi və qalereya otaqlarında tikilinin restavrasiyasına aid qeydlər, eləcə də, Yamaqata prefekturasının tarixi və mədəniyyətinə aid materiallar sərgilənir.[1]
Üçüncü mərtəbədə əsas zal yerləşir. Bu zal keçmişdə Yamaqata prefekturasındakı lisey müdirlərinin, polis rəislərinin və deputatların görüşləri üçün istifadə olunmuşdur. Zalın divarları mərmər sütunlarla və çiçək ornamentləri ilə bəzədilmişdir. VIP otaqda Tayşo dövrünə aid dəbdəbəli əşyalar sərgilənir. Bu otaq Yamaqata prefekturasını ziyarət edən imperator ailəsi üzvləri tərəfindən istifadə olunmuşdur. Qubernatorun katibliyi otağında Yamaqata qubernatorlarının portretləri və profilləri xronoloji ardıcıllıqla sərgilənir. Sərginin mərkəzində ilk Yamaqata qubernatoru Miçitsune Mişima dayanır, burada onun vaka şeirləri və büstü nümayiş etdirilir. Bu otaq keçmişdə qubernatorun katibləri tərəfindən istifadə olunmuşdur. Qubernatorun ofisində qubernatorun masası və stulu yerləşir. Otaqdakı xalçalar orijinaldır və 1960-cı ildə Yamaqatada toxunmuşdur. Yüksəkvəzifəli şəxslərin nahar otağında Yamaqata şəhərinin inkişafını əks etdirən xəritə sərgilənir. Rayon rəhbərləri və şəhər merləri üçün gözləmə otağında Bunşokanın interyeri, eksteryeri və saat qülləsinin bərpa işlərinə aid materiallar saxlanılır. Bunlardan əlavə, üçüncü mərtəbədə polis rəisinin ofisi, memorial dəhliz, daxili işlər üzrə baş direktorun ofisi və qalereyalar yerləşir.[1]
Bunşokanın saat qülləsi Yaponiyada fəaliyyət göstərməyə davam edən ən qədim ikinci mexaniki saatdır və Bunşokanın simvolu hesab olunur. Saat 25 metr hündürlükdə yerləşir və hər birinin diametri 1 metr olan dörd üzdən ibarətdir. Saat qülləsinə turlar təşkil olunur.[1]
-
Həyət -
Assambleya binasının zalı -
VIP otaq -
Mərkəzi pilləkənlər -
Polis rəisinin ofisi
- ↑ 1 2 3 4 "Introduction to Bunshokan". Bunşokanın rəsmi saytı (ingiliscə). 10 yanvar 2025 tarixində arxivləşdirilib. İstifadə tarixi: 10 yanvar 2025.
- gakushubunka.jp/bunsyokan/ — rəsmi saytı