Bhumislər - Hindistanın Bihar ştatının cənubundakı Çhota-Naqpur yaylasında, həmçinin Madhya-Pradeş ştatında yaşayan mundalar qrupundan xalq.
Bhumislərin sayı 500 min nəfərdən çoxdur (1995). Mundari dilinin dialektində danışırlar, onların arasında hind və benqal dilləri də geniş yayılmışdır. Dindarların təqribən 90 faizi indiuzm dininə sitayiş edir, ənənəvi etiqadları da qalmaqdadır. Xeyir və şər ruhların (bongi), müqəddəs ağac və heyvanların, Günəş və Ayın kultları yayılmışdır.
Bhumislərin əsas ənənəvi məşğuliyyətləri tədricən xış əkinçiliyi ilə əvəz olunan toxa əkinçiliyidir. Onlar həmçinin ovçuluq, balıqçılıq, yığıcılıqla məşğul olur, zənbil və həsir hörürlər, muzdla işləyirlər. Ata xətti ilə qohum olan nəsillərə bölgü, totemizm, gəlinə görə ödəmə, evlənməmiş gənclər (oğlanlar və qızlar üçün ayrı-ayrılıqda) üçün evlər qalmaqdadır. Kəndləri kiçikdir. Evləri karkas sütunlu, bir və yaxud ikikameralı olur, damı küləş, yarpaq və kirəmitlə örtülür.
Kişi geyimləri: bel sarğısı, şalvar, köynək, çalma, qadın geyimi qısa saridir.
Əsas yeməkləri ət, balıq, darı, qarğıdalı, paxlalı bitkilərdir.
- Azərbaycan Milli Ensiklopediyası. IV cild. Bakı,2013. səh.9