Beynəlxaq Boks Federasiyası — Beynəlxalq Boks Şöhrət Zalı tərəfindən tanınan və peşəkar boks döyüşlərinə sanksiya qoyan dörd əsas təşkilatdan biridir. Digərləri, Ümumdünya Boks Assosiasiyası, Ümumdünya Boks Şurası və Ümumdünya Boks Təşkilatıdır.
| Beynəlxaq Boks Federasiyası BBF/IBF | |
|---|---|
| ing. International Boxing Federation | |
 | |
| Növü | Qeyri-kommersiya təşkilatı |
| Fəaliyyəti | Boks sanksiya təşkilatı |
| Yaranma tarixi | 1983 |
| Mərkəzi | Sprinqfild, Nyu-Cersi, ABŞ |
| Fəaliyyət göstərdiyi yer | Beynəlxaq |
| Prezident | Daril Piplz |
| ibf-usba-boxing.com | |
Beynəlxalq Boks Federasiyasından əvvəl regional çempionatlar ABŞ Boks Assosiasiyası tərəfindən təşkil edilirdi. 1983-cü ildə Ümumdünya Boks Assosiasiyasının Puerto-Rikoda keçirilən illik konvensiyasında ABŞ Boks Assosiasiyasının prezidenti Robert V. "Bobbi" Li Sr. Ümumdünya Boks Assosiasiyası prezidentliyi uğrunda mübarizəni Xilberto Mendosaya uduzdu. Bobbi Li və başqaları seçkidən sonra konvensiyadan çıxdılar və Ümumdünya Boks Assosiasiyası və Ümumdünya Boks Şurası ilə birlikdə mövcud olacaq üçüncü beynəlxalq boks təşkilatı yaratmaq qərarına gəldilər. Beləliklə, Nyu-Cersidə, 6 noyabr 1983-cü ildə Beynəlxalq Boks Federasiyası quruldu və hələ də qərargahı Nyu-Cersidə yerləşir.[1]
Bobbi Li 1985-ci ilə qədər Nyu-Cersidə boks üzrə komissar vəzifəsində çalışıb. Məlumatlara görə, o, "döyüş promouterlərindən və kazino rəhbərlərindən ianə qəbul etdiyinə görə Etik Standartlar Komissiyası tərəfindən fəaliyyəti dayandırılıb və cərimələnib".[2]
Beynəlxalq Boks Federasiyasının ilk dünya çempionu və Beynəlxalq Boks Federasiyası kəmərini qazanan ilk idmançı Marvin Kəmel olmuşdur. Beynəlxalq Boks Federasiyasının mövcudluğunun ilk ili qaranlıq olsa da, 1984-cü ildə artıq digər təşkilatların tanınmış çempionları olan Larri Holms, Aaron Pryor, Marvin Haqler və Donald Karrini kimi idmançılar Beynəlxalq Boks Federasiyası dünya çempionu kimi tanımaq qərarına gəldilər. Holms isə Beynəlxalq Boks Federasiyasının tanınmasını qəbul etdirmək üçün üçün Ümumdünya Boks Şurasının titulundan imtina etdi. Beləliklə, Beynəlxalq Boks Federasiyası üçüncü sanksiya orqanı və qanuni təşkilat kimi təsis edildi.[3]
Beynəlxalq Boks Federasiyasının kişilər arasında dünya çempionu kəməri qırmızı, qadınlarda isə açıq mavi rəngdədir.[mənbə göstərilməlidir]
1996-cı ildə keçmiş ağır çəki çempionu Maykl Murer tərəfindən irəli sürülən ittihamlarla bağlı federasiya haqqında üç illik araşdırma başladı. Araşdırmalar təsisçi Bobbi Linin reketçilik etməsi, yüksək boks reytinqi müqabilində rüşvət alması və digər qanun pozuntuları ilə bağlı idi. Legitimlik görünüşünə nail olmasına baxmayaraq, bu proseslər Beynəlxalq Boks Federasiyasının reputasiyasına ciddi ziyan vurdu. İttiham olunanlar prezident Robert V. "Bobbi" Li, Bobbi Linin oğlu və federasiyanın əlaqələndiricisi Robert Li Jr., federasiyanın keçmiş icraçı direktoru və Virciniya ştatının boks üzrə komissarı Donald Uilyam Brennan və federasiyanın Cənubi Amerika üzrə nümayəndəsi Fransisko Fernandez idi.[4] Bobbi Li sonradan 2000-ci ilin avqustunda çirkli pulların yuyulması və vergidən yayınmaqda təqsirli bilindi. Ardınca 2001-ci ildə 22 ay həbs cəzasına məhkum edildi və 25 min dollar cərimə edildi.[5]
2000-ci ildə, boks promouteri Bob Arum şantaj oldunduğunu bildirərək polisə könüllü ifadə verdi. O, 1995-ci ildə Bobbi Liyə 100 min dollar rüşvət verdiyini qeyd etdi. Arum həmçinin qeyd etdi ki, Bobbi Li əvvəlcə ondan Şulz-Forman döyüşünü təsdiqləmək üçün 500 min dollar tələb edib, amma sonradan 200 min dollara razılaşıb (amma bu məbləğin yarısı heç vaxt ödənilməyib).[6] Nevada Ştatı Atletika Komissiyası tərəfindən Arum sanksiyaya məruz qaldı və 125 min dollar cərimə olundu. Habelə digər boks promouterləri Sedrik Kuşner və Dino Duva da Bobbi Liyə oxşar ödənişlər etdiklərini etiraf etdilər.[7]
Beynəlxaq Boks Federasiyasında korrupsiya mədəniyyəti yarandığı gündən mövcud imiş... Bu federasiyanın reytinqləri qazanılmayıb – satın alınıb... Bu cinayətlər əksər çəki dərəcələrində reytinqləri pozub.— Adam Miller ABŞ prokurorunun köməkçisi Robert Kliriyə istinadən , "FEDS BID TO KO BOXING BIGS WITH ‘BRIBE’ RAP", New York Post, 5 noyabr 1999
Beynəlxalq Boks Federasiyası Bobbi Linin məhkum edilməsindən 2004-cü ilin sentyabr ayına qədər federal nəzarət altında olmuşdur. Miçiqan ştatının sabiq boks komissarı, Ümumdünya Boks Assosiasiyası vitse-prezidenti, boks təhlükəsizliyi üzrə fəal Hayavata Nayt Bobbi Linin məhkum edilməsindən sonra federasiyanın müvəqqəti prezidenti təyin edildi və beləliklə, dünya miqyasında hər hansı bir boks idarəetmə təşkilatına rəhbərlik edən ilk qadın oldu. Onun ardınca 2001-ci ildən Mariyan Məhəmməd, daha sonra isə 2018-ci ildən Daril C. Piplz prezident vəzifəsini icra etdilər.[8]
Beynəlxalq Boks Federasiyası 20–21 dekabr 2017-ci ildə Banqkokda "Muay tay üzrə 1-ci İllik Konqresini" təşkil etdi.[9] Prezident Daril Piplzın da iştirak etdiyi konqresdə Beynəlxalq Boks Federasiyasının muay tay üzrə üç çəki dərəcəsində çempionları mükafatlandırıldılar.
Rusiyanın Ukraynanı işğal etməsinə cavab olaraq federasiya rus və belarus boksçularının iştirak etdiyi çempionat görüşlərinə icazə vermir.[10]
- ↑ Wheeler, Paul. "Judging the sanctioning bodies: The IBF - Boxing News". boxingnewsonline.net. 7 April 2020. İstifadə tarixi: 5 September 2022.
- ↑ Marshall, Andrew "Bell tolls for ring-king Lee and the 'whore-house of pugilism'", The Independent, November 29, 1999. Retrieved August 4, 2018.
- ↑ Euan-Smith, Simon. "A history of chaos - sanctioning bodies and broken titles". boxingnewsonline.net. 27 January 2022. İstifadə tarixi: 5 September 2022.
- ↑ Hirsley, Michael "Another Black Eye For Boxing", Chicago Tribune, November 5, 1999. Retrieved August 4, 2018.
- ↑ Smothers, Ronald "I. B. F. Supervision Ends; Founder Gets 22 Months", The New York Times, February 15, 2001. Retrieved August 4, 2018.
- ↑ MCKINLEY, JAMES C. JR. "Arum Gives Description Of Payments to I. B. F.", The New York Times, June 7, 2000. Retrieved August 4, 2018.
- ↑ Springer, Steve "Settlement Approved in Arum Case", Los Angeles Times, August 17, 2000. Retrieved August 4, 2018.
- ↑ Kang, Arne K. "A Conversation with International Boxing Federation President Daryl Peoples". tss.ib.tv. 10 March 2017. İstifadə tarixi: 5 September 2022.
- ↑ "Facebook". www.facebook.com.
- ↑ "Alan Hubbard: How Russian champion Bivol sent shockwaves down Mexico way".