Azərbaycan Yüksək Dəstəsi 2001/2002

2001/2002 mövsümündə çempionatın play-off mərhələsinin II tur oyunu "Şəfa" və "Xəzər Universiteti" (indiki "Şamaxı") komandaları arasında 2 aprel 2002-ci il tarixində, paytaxt derbisi kimi keçirilmişdir. Oyunun 90+5-ci dəqiqəsində baş hakim Xaqani Məmmədov "Xəzər Universiteti"nin qapısına mübahisəli penalti təyin etmişdir. Tərlan Əhmədov penalti zərbəsini qola çevirmiş və "Şəfa" oyunu 1:0 hesabı ilə qazanmışdır.^[1] Bu qarşılaşma Azərbaycan futbolunun tarixində "ən məşhur və qalmaqallı oyun" və "qara ləkə" hesab olunmuşdur.^[2][3]

Oyundan sonra "Xəzər Universiteti" əvvəlcə meydanı, sonra isə çempionatı tərk etmiş və digər klublar da onlara qoşulmuşdur. Nəticə müvəqqəti olaraq İntizam Komitəsi tərəfindən ləğv edilmiş və oyunun təkrarlanmasına qərar verilmişdir, lakin 10 aprel tarixində Apellyasiya Komitəsi nəticənin qüvvədə qalmasına qərar vermişdir.^[1] "Şəfa"ya verilən bu yardım yalnız "Xəzər Universiteti"ni yox, həm də digər komandaları, xüsusilə "Neftçi"ni narazı salmışdı. Tarix boyunca AFFA ilə dəfələrlə qarşıdurmaya girən "Neftçi"nin "Xəzər Universiteti" ilə ittifaqda olması digər klubları da eyni mövqeyə gətirmişdir. Beləliklə, klublar və AFFA arasındakı qalmaqal pik həddə çatmış, çempionat dayandırılmalı olmuşdur.^[3]

İdman jurnalisti Anar Xanlarovun bildirdiyinə görə, Xaqani Məmmədov penalti qərarını təkbaşına verməmişdi və bu barədə ona tapşırıq verildiyi ehtimal olunur. Penalti zərbəsini qola çevirən Tərlan Əhmədov da tənqid obyektinə çevrilmişdir, çünki o, Azərbaycan milli futbol komandasında çıxış edən futbolçulardan biri idi. Stadiondan bir çox tamaşaçı hətta ona topu kənara vurmalı olduğunu bildirmişdir, lakin Əhmədov bunu etməmiş, mövcud olmayan penalti zərbəsini qola çevirmişdir.^[2]

Növbəti mərhələdə iştirak edən klublar, 6 aprel tarixində çempionatı AFFA-ya etiraz əlaməti olaraq dayandırmışdır. 6 gün sonra keçirilən "Şəfa" – "Kəpəz" oyunu mövsümün son matçı olmuşdur.^[3] 12 aprel–4 may tarixləri arasında oyunlar keçirilməmişdir. "Şəmkir" və "Şəfa" xaricində bütün komandalar AFFA prezidenti Fuad Musayev istefa vermədiyi təqdirdə çempionata davam etməyəcəklərini bildirmişdir. Musayev istefa vermədiyinə görə, dissident klublar yeni təşkil edilmiş təşkilat komitəsinin nəzarəti altında çempionata davam etməyə qərar vermiş və 4-cü tur oyunlarını 4 mayda oynamışdılar. AFFA bu yarışları tanımamış və 20 mayda çempionatı bərpa etməyi planlaşdırdığını açıqlamışdır. AFFA 5-ci və 6-cı turların nəticələrini nəzərə almadan, 24 gün ərzində 6 tur keçirməyi nəzərdə tutmuşdur. Klublar bu qərarı nəzərə almayacaqlarını bildirmişdilər.^[1]

2001/02-ci il mövsümü kimi, kubok turniri də yarımçıq qalmışdır.^[3] 28 mayda "Neftçi Bakı" və "Şəmkir" FK komandaları arasında keçirilən final mübahisəli olmuşdur. "Şəmkir" 84-cü dəqiqədə onlara qarşı təyin edilən penaltidən sonra meydanı tərk etmişdir. "Neftçi" texniki qələbə qazanaraq çempion elan edilmişdir.^[4]