Vikipediya ?

Azərbaycan Beynəlxalq Bankı — Vikipediya

Azərbaycan Beynəlxalq Bankı — Səhmləri Azərbaycan dövlətinə məxsus olan və bank fəaliyyəti göstərən açıq səhmdar cəmiyyətdir.

Azərbaycan Beynəlxalq Bankı
Tipi Açıq Səhmdar Cəmiyyəti
Yaranma tarixi 10 yanvar 1992
Hakim simaları İdarə Heyətinin Sədri
Sənaye Bank sektoru
Sayt
Commons-logo.svg Vikianbarda əlaqəli mediafayllar

Tarixi

“Azərbaycan Beynəlxalq Bankı” ASC 1992-ci ilin 10 yanvarında tam səhmdar cəmiyyət tipli bank kimi fəaliyyətə başlayıb. Bankın Baş ofisi Bakıda yerləşir. Azərbaycan Beynəlxalq Bankı hazırda aktivlərinin həcminə, müştəri bazasına və beynəlxalq əməliyyat portfelinə görə Cənubi Qafqaz regionunun ən aparıcı banklarından biridir. Azərbaycanın müxtəlif regionlarını əhatə edən 37 filial və 39  şöbəsi ilə bank fərdi və korporativ müştərilərə universal bank xidmətləri göstərir. Bankın xidmət etdiyi hüquqi şəxslərin sayı 18000-ə yaxın, fiziki şəxslərin sayı isə 1.3 milyondan çoxdur. Bankda 1800-dən çox işçi çalışır.

Xidmət şəbəkəsi

Azərbaycan Beynəlxalq Bankı neft-kimya, nəqliyyat-kommunikasiya, energetika və s. sahələrdə reallaşdırılan irimiqyaslı dövlət layihələrində, sosial proqramlarda yaxından iştirak edir. Eyni zamanda iri, kiçik və orta sahibkarlıq fəaliyyətinin maliyyələşdirilməsinə fəal dəstək verir.

1996-cı ildə Azərbaycan Beynəlxalq Bankı “AzəriKard” prosessinq şirkətini təsis etməklə ölkədə kart-prosessinq fəaliyyətinin əsasını qoyub. 1997-ci ildə Bank "VISA" və "MasterCard", sonrakı illərdə "American Express", Union Pay, Diners Club, JCB beynəlxalq ödəniş sistemləri ilə əməkdaşlığa başlayıb. Hazırda Azərbaycan Beynəlxalq Bankı ən çox sayda beynəlxalq ödəniş sistemləri ilə əməkdaşlıq edən Azərbaycan bankıdır. Bank öz müştərilərinə "VISA", "MasterCard", "American Express" və Union Pay beynəlxalq ödəniş sistemlərinin fərqli kart çeşidlərini təklif edir. Bu bank müştərilərə "American Express" ödəniş kartlarını təklif edən, həmçinin JCB kartları ilə əməliyyat imkanı yaradan ilk və yeganə Azərbaycan Bankıdır.

Azərbaycan Beynəlxalq Bankı ölkədə ən geniş ATM şəbəkəsinə malik bankdır. Hazırda bankın Azərbaycanın müxtəlif regionlarını əhatə edən 800-ə yaxın ATM-i, ticarət  və xidmət müəssisələrində 13 mindən çox POS terminalı var.  

Azərbaycanda pensiya və əməkhaqqı ödənişlərinin plastik kartlarla ödənişi ilk dəfə məhz Azərbaycan Beynəlxalq  Bankı tərəfindən həyata keçirilib.

Hazırda bankın aktiv ödəniş kartlarının sayı 1 milyon 300 mindən çoxdur.

Müştərilərin rahatlığını düşünərək Azərbaycan Beynəlxalq Bankı ölkədə ilk dəfə olaraq Randevü xidmətini yaradıb. Bu xidmət müştərilərə filiallarda növbəyə dayanmadan görüş təyin etmək, xidmət vaxtını əvvəlcədən müəyyənləşdirmək imkanı verir. Müştərilər bu xidmətdən internet üzərindən, yaxud telefon zəngi ilə faydalanırlar. 2019-cu ildə Azərbaycan Beynəlxalq Bankı çoxfunksiyalı Tamkart məhsulunu təqdim edib.

İdarə heyəti

Azərbaycan Beynəlxalq Bankının İdarə Heyətinə yeddi üzv daxildir:

  • Sədr: Abbas İbrahimov
  • Sədrinin birinci müavini: İlham Həbibullayev
  • Sədr müavini: Vasif Əhmədov
  • Sədr müavini: Taleh Tahirli
  • Sədr müavini: Aqşin Əmirov
  • Sədr müavini: Nəbi Əliyev
  • Sədr müavini: Elmir Həbibullayev

Fəaliyyət

Qarşılıqlı partnyorluq münasibətləri

“VISA PayWave” və “Mastercard PayPass”, NFC, Payment Rings ödəniş texnologiyalarını ölkəmizdə ilk dəfə məhz Azərbaycan Beynəlxalq Bankı tətbiq etməyə başlayıb.

VISA ilə tərəfdaşlıq çərçivəsində “Sıfır məsuliyyət” (Zero liability) siyasətinin tətbiqi də ölkəmizdə yeganə olaraq Azərbaycan Beynəlxalq Bankının adı ilə bağlıdır.

2002-ci ildə, Bank Rusiya Federasiyasında törəmə müəssisəsini təsis edib. Rusiyadakı törəmə müəssisə hazırda “ABB-Moskva Bankı” adı altında fəaliyyət göstərir.

2019-cu ildə İtaliyanın “Yuventus” futbol klubunun regional partnyoru olan Azərbaycan Beynəlxalq Bankı klubla müştərək brendləşdirilmiş (co-brand) Mastercard Platinum debet kartlarını bazara təqdim edib.

Mükafatlar

2019-cu ildə “Euromoney” qlobal nəşri Azərbaycan Beynəlxalq Bankını ölkə üzrə ilin ən yaxşı bankı seçdi.

2020-ci ildə “Global Finance” Azərbaycan Beynəlxalq Bankını "Ölkənin ən yaxşı bankı" seçdi!

Layihələr

Azərbaycanda innovasiyaların inkişafına dəstək, əmək bazarı üçün peşəkar informasiya texnologiyaları mütəxəssislərinin yetişdirilməsi məqsədilə bir sıra sosial layihələr həyata keçirən Bank 2019-cu ildə IBA Tech Akademiyasını yaradıb, 2020-ci ildə 1-ci IBA Regional hakatonunu təşkil edib.

Üzvlüklər

Azərbaycan Beynəlxalq Bankı aşağıdakı peşəkar təşkilat və sistemlərin üzvüdür:

  • Azərbaycan Banklar Assosiasiyası (ABA)
  • Bakı Fond Birjası (BSE)
  • Dünya Banklararası Maliyyə Telekommunikasiyaları Cəmiyyəti (SWIFT)
  • “MasterCard International”
  • ”VISA International” Beynəlxalq ödəmə sistemi
  • ”American Express” Beynəlxalq ödəmə sistemi
  • Reuters informasiya sistemi
  • Azərbaycan-Amerika Ticarət Palatası

İstinadlar


Xarici keçidlər

Mənbə — ""

Informasiya Melumat Axtar

Anarim.Az

Sayt Rehberliyi ile Elaqe

Saytdan Istifade Qaydalari

Anarim.Az 2004-2019