Azərbaycan Aşıq Sənəti Muzeyi – Azərbaycanın Tovuz rayonunda yerləşən və Azərbaycan aşıq sənətinə həsr olunmuş muzey. Muzey Aşıq Hüseyn Bozalqanlının adını daşıyır.
| Azərbaycan Aşıq Sənəti Dövlət Muzeyi | |
|---|---|
 | |
 | |
| Əsası qoyulub | 1984 |
| Açılış tarixi | 4 mart 2020 |
| Mövzu | aşıq musiqisi |
| Ölkə | |
| Yerləşir | Tovuz rayonu |
| 40°59′08″ şm. e. 45°38′17″ ş. u.HGYO | |
 Vikianbarda əlaqəli mediafayllar | |
Muzey 1984-cü ildə ozan-aşıq muzeyi kimi yaradılmışdır. 22 mart 1990-cı ildə Azərbaycan Respublikası Nazirlər Kabinetinin 116 saylı qərarına əsasən muzeyə dövlət statusu və Hüseyn Bozalqanlının adı verilmişdir.[1][2]
2013-cü ildə Nazirlər Kabinetinin 374 saylı sərəncamı ilə muzeyin yeni binasının tikintisinə başlanmışdır.[1][3] Yeni muzey binasının tikintisi 2019-cu ilin ikinci yarısında başa çatmışdır. Muzeyin açılışı 4 mart 2020-ci ildə baş tutmuşdur. Açılış mərasimində Azərbaycan prezidenti İlham Əliyev iştirak etmişdir.[1] 2021-ci ildə muzeyin 1208 ziyarətçisi olmuş, muzeyə 52 ekskursiya təşkil olunmuşdur.[4]
Muzey dünyada aşıq sənətinə həsr olunmuş yeganə muzeydir. Muzey binasının ümumi sahəsi 3100 m² təşkil edir və üçmərtəbəlidir. Muzeydə 40 yerlik konfrans zalı, fond otaqları, süvenir otağı və kitabxana yerləşir. Muzeyin həyətində Fuad Məmmədov tərəfindən yaradılmış "Sənət Aşıqları" kompozisiyası yaradılmışdır.[1]
Muzeyin sərgi zalı 2-ci və 3-cü mərtəbələrdə yerləşir. Aşıq sənətinin tarixi burada xronoloji ardıcıllıq və bölgələr üzrə verilmişdir. Muzeyin 1–6-cı zalları aşıq sənətinin tarixinə, aşıq repertuarlarına, Heydər Əliyev Fonduna, aşıq sənətinin qorunması üçün görülmüş işlərə həsr olunmuşdur. 7–10-cu zallar aşıq mühiti haqqındadır: 7-ci zal Göyçə, Qarabağ və Naxçıvan aşıq mühitinə, 8-ci zal Gəncəbasar aşıq mühitinə, 9-cu zal Borçalı və Cənubi Azərbaycan aşıq mühitinə, 10-cu zal Şirvan aşıq mühitinə həsr olunmuşdur.[1] Muzeydə saz dərnəyi fəaliyyət göstərir.[4]
Muzeyin birinci mərtəbəsində muzey haqqında elektron məlumatlar, "Heydər Əliyev və aşıq sənəti" guşəsi və muzeyə adı verilmiş Hüseyn Bozalqanlının büstü yerləşir.[1] Muzeyin kolleksiyasına 2111 eksponat daxildir.[4] Eksponatlardan biri "Üçlük" aşıq kompozisiyasıdır.[5]
-
İlham Əliyev muzeyin açılışında -
İnteryer -
İlham Əliyev muzeyin açılışında -
İnteryer
- ↑ 1 2 3 4 5 6 "Tovuz rayon H.Bozalqanlı adına Azərbaycan Aşıq Sənəti Dövlət Muzeyi". Qazax-Tovuz Regional Mədəniyyət İdarəsi. 19 sentyabr 2024 tarixində arxivləşdirilib. İstifadə tarixi: 19 sentyabr 2024.
- ↑ "Tovuzda Aşıq Sənəti Dövlət Muzeyi üçün yeni bina tikilir". Xəzər Xəbər. 10 iyun 2019. 19 sentyabr 2024 tarixində arxivləşdirilib. İstifadə tarixi: 19 sentyabr 2024.
- ↑ "Aşıq Sənəti Dövlət Muzeyi binasının tikintisi davam etdirilir". Mədəniyyət qəzeti. 5 iyun 2019. 19 sentyabr 2024 tarixində arxivləşdirilib. İstifadə tarixi: 19 sentyabr 2024.
- ↑ 1 2 3 Cabbarova, Fərqanə. "Azərbaycan musiqi mədəniyyətinin təbliğində musiqi profilli muzeylərin rolu" (PDF). Musiqi dünyası. 97 (4). 2023. doi:10.5281/zenodo.10362621. 2024-09-19 tarixində arxivləşdirilib (PDF). İstifadə tarixi: 19 sentyabr 2024.
- ↑ "Tovuz Rayon Aşıq Hüseyn Bbozalqanlı adına Aazərbaycan Aşıq Sənəti Dövlət Muzeyinin toplusuna məxsus eksponatın 3 gün ərzində bərpası". Muzey Sərvətləri və Xatirə Əşyalarının Elmi Bərpa Mərkəzi. 26 noyabr 2019. 19 sentyabr 2024 tarixində arxivləşdirilib. İstifadə tarixi: 19 sentyabr 2024.