Aynur Elgünəş (rəsmi adı: Aynur Telman qızı Qənbərova; 29 may 1975, Ağdam) — azərbaycanlı jurnalist [1] və siyasi məhbus; 2005-2014-cü illərdə "Gündəlik Azərbaycan", "Yeni Müsavat", "Azadlıq", "Bizim Yol" qəzetlərində çalışıb. Hazırda Meydan TV-nin baş redaktorudur. Jurnalist fəaliyyəti görə uzun illərdir təqiblərə məruz qalıb. 2024-cü il dekabrın 6-da "Meydan TV" jurnalistlərinə qarşı açılmış cinayət işi çərçivəsində həbs edilib. Aynur Elgünəş və iş üzrə həbs edilən daha altı nəfər barəsində Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham verilib.[2]
| Aynur Elgünəş | |
|---|---|
 Aynur Elgünəş 2023-cü ildə | |
| Doğum tarixi | |
| Doğum yeri | Ağdam, Azərbaycan SSR |
| Vətəndaşlığı | Azərbaycan |
| Təhsili | N. Tusi adına Azərbaycan Dövlət Pedaqoji Universiteti |
| Fəaliyyəti | jurnalist, siyasi məhbus |
| Fəaliyyət illəri | 1996— |
Hazırda Ədliyyə Nazirliyinin Penitensiar Xidmətinin Bakı İstintaq Təcridxanasında saxlanılır.[3]
Aynur Qənbərova (Elgünəş) 1975-ci il mayın 29-da Ağdam rayonunda anadan olub. N. Tusi adına Azərbaycan Dövlət Pedaqoji Universitetində ali təhsil alıb. İxtisasca Azərbaycan dili və ədəbiyyat müəllimidir.
Aynur Elgünəş jurnalist fəaliyyətinə 1996-cı ildə başlayıb. 1996-2005-ci illərdə Dövlət Radiosunda, habelə "Cümhuriyyət" qəzetinin şöbə redaкtoru, "Yeni Qafqaz" qəzetinin baş redaкtor müavini, "Xalq Cəbhəsi", "Paritet" və "Müstəqil" qəzetlərində isə reportyor olaraq çalışıb.
2005-2007-ci illərdə isə "Gündəlik Azərbaycan" qəzetinin müxbiri olub. Əsasən sosial-iqtisadi mövzularda araşdırmacı jurnalist olaraq çalışıb. 2007-ci ilin aprelində "Gündəlik Azərbaycan" qəzetinin təsisçisi Eynulla Fətullayevin həbs edilməsi və nəşrin fəaliyyətini dayandırmasından sonra həmin ilin iyulunda Milli Təhlükəsizlik Nazirliyində (MTN) dindirilib.
2007-2014-cü illərdə müstəqil jurnalist olaraq fəaliyyət göstərib. Əsasən "Yeni Müsavat", "Azadlıq", "Bizim Yol" qəzetləri ilə əməкdaşlıq edib. Bir müddət "Yeni İqtisadiyyat" jurnalında redaкtor olub. O, həmçinin sosial media platformalarında bir sıra məqalələrin müəllifidir. Bunlardan "Xuraman Abbasovanın kəlağayısı.." , "Yaqublular ailəsi" və digərlərini göstərmək olar.[1]
2014-cü ildən Meydan TV-də fəaliyyət göstərir. Aynur Elgünəş Meydan TV-nin bəzi rəhbər işçiləri ilə bağlı 2015-ci ildə Ağır Cinayətlərə dair İşlər üzrə İstintaq İdarəsində açılmış cinayət işi çərçivəsində dəfələrlə şahid qismində dindirilib, həmçinin 2015-2019-cu illərdə Azərbaycandan çıxışına qadağa qoyulub. Həbsinə qədər son fəaliyyəti Meydan TV-nin baş redaкtorluğu olmuşdur. O, hər zaman cəmiyyət daxilində haqsız gördüyü məqamları işıqlandırmağa çalışmış, jurnalistlikdən əlavə ictimai fəal kimi də etirazlar etmişdir.[4][5]
Aynur Elgünəş və daha altı nəfər 2024-cü il dekabrın 6-da Bakı Şəhər Baş Polis İdarəsində Meydan TV-də qarşı açılmış cinayət işi çərçivəsində həbs edilib. Onların hər biri barəsində Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.[6] Onlar ittihamları rədd edib, həbslərini peşə fəaliyyətləri ilə əlaqəndirib.[7] Dekabrın 8-də Aynur Elgünəş barəsində həbs qətimkan tədbirinin seçilməsi ilə bağlı istintaq orqanın təqdimatına baxılıb. Xətai Rayon Məhkəməsində hakim Sülhanə Hacıyevanın sədrliyi ilə ayrı-ayrılıqda qətimkanla bağlı təqdimatlara baxılıb. Təqdimatlar təmin edilib və Aynur Elgünəş da daxil olmaqla saxlanılan şəxslərin hər biri barəsində 4 ay müddətinə həbs qətimkan tədbiri seçilib. Meydan TV jurnalistlərinin həbsi Amnesty International,[8] Jurnalistləri Müdafiə Komitəsi (CPJ),[9] Sərhədsiz Reportyorlar,[10] Freedom Now,[11] həmçinin yerli və beynəlxalq ictimaiyyət tərəfindən sərt tənqid edilib, jurnalistlərin azadlığa buraxılması üçün Azərbaycana çağırışlar edilib.
- ↑ 1 2 "Aynur Elgünəş". chaikhana (az.). İstifadə tarixi: 2025-04-12.
- ↑ "Aynur Elgünəş və Natiq Cavadlı həbsdə qaldı - Məhkəmə jurnalistləri ev dustaqlığına buraxmadı". AzPolitika — onlayn siyasi-ictimai qəzet (az.). İstifadə tarixi: 2025-04-12.
- ↑ Arqument. "Aynur Elgünəş: "Həbsimin sifarişi prezident səviyyəsində verilib"". arqument.az (ingilis). İstifadə tarixi: 2025-04-12.
- ↑ "Jurnalist Səhiyyə Nazirliyinin qarşısında etiraz aksiyası keçirdi – » Azərbaycan İnformasiya Agentliyi". Azərbaycan İnformasiya Agentliyi. İstifadə tarixi: 2025-04-12.
- ↑ Qlobal.az. "Jurnalist Səhiyyə Nazirliyinin qarşısında aksiya keçirdi". www.qlobal.az (ingilis). İstifadə tarixi: 2025-04-12.
- ↑ ""Meydan TV işi" – jurnalist Şəmşad Ağanın saxlanıldığı deyilir". BBC News Azərbaycanca (az.). 2024-12-06. İstifadə tarixi: 2025-04-12.
- ↑ ""Meydan TV" əməkdaşlarının həbs müddəti UZADILDI". Oxu.az (az.). İstifadə tarixi: 2025-04-12.
- ↑ Turan İnformasiya Agentliyi. "Amnesty International осудила аресты журналистов Meydan TV". www.turan.az (rus). 2024-12-04. 2024-12-20 tarixində arxivləşdirilib. İstifadə tarixi: 04.12.2024.
- ↑ Turan İnformasiya Agentliyi. "КЗЖ осудил задержание журналистов Meydan TV". www.turan.az (rus). 2024-12-04. 2024-12-10 tarixində arxivləşdirilib. İstifadə tarixi: 04.12.2024.
- ↑ Turan İnformasiya Agentliyi. "«Репортеры без границ» призвали освободить журналистов Meydan TV". www.turan.az (rus). 2024-12-04. 2024-12-19 tarixində arxivləşdirilib. İstifadə tarixi: 04.12.2024.
- ↑ Turan İnformasiya Agentliyi. "Freedom Now призвала освободить сотрудников Meydan TV". www.turan.az (rus). 2024-12-04. 2024-12-19 tarixində arxivləşdirilib. İstifadə tarixi: 04.12.2024.