Aydın Eylas (Elyas) oğlu Qasımov (11 sentyabr 1953, Bakı) — Azərbaycan hüquqşünası, Azərbaycan Respublikası ədliyyə nazirinin müavini — Məhkəmə Qərarlarının İcrası Baş İdarəsinin rəisi (1997–2005), general-mayor (1998).
| Aydın Qasımov | |
|---|---|
  | |
| 6 mart 1997 – 28 yanvar 2005 | |
| Əvvəlki | Çingiz Əmirov |
| Sonrakı | Nazim Ələkbərov |
| Şəxsi məlumatlar | |
| Doğum tarixi | 11 sentyabr 1953 (71 yaş) |
| Doğum yeri | |
| Təhsili | |
| Rütbəsi |
 General-mayor |
Aydın Eylas oğlu Qasımov 11 sentyabr 1953-cü ildə Bakı şəhərində anadan olmuşdur. 1980-ci ildə Azərbaycan Dövlət Universitetinin Hüquq fakültəsini bitirmişdir.[1]
Əmək fəaliyyətinə 1970-ci ildə Azərbaycan SSR Baş Meliorasiya və Su Tikinti İdarəsinin 10 saylı Tikinti İdarəsində fəhləliklə başlamış, 1974-cü ildən Azərbaycan SSR Avtomobil Yollarının Tikintisi və İstismarı Nazirliyi 35 saylı Yol-İstismar İdarəsində təmirçi, 1975-ci ildən İmişli Lokomotiv Deposunda qiymətləndirici, İmişli Kənd Təsərrüatı İdarəsində baş hüquqşünas, 1977-ci ildən isə həmin idarədə hüquq şöbəsinin müdiri işləmişdir.[1]
Aydın Qasımov 1980-ci ildən fəaliyyətini daxili işlər orqanlarında davam etdirərək Zəngilan Rayon Daxili İşlər Şöbəsində cinayət-axtarış əməliyyatı müvəkkili, 1983-cü ildən Tərtər Rayon DİŞ-də baş əməliyyat müvəkkili işləmiş, 1986-cı ildən Azərbaycan SSR Daxili İşlər Nazirliyinin Baş Cinayət-Axtarış İdarəsində əməliyyat müvəkkili olmuşdur. 1988-ci ildən Tərtər, 1991-ci ildən isə Bərdə rayon DİŞ rəisinin müavini vəzifəsində çalışmış, 1992-ci ildən Bakı Şəhər Baş Polis İdarəsi Cinayət-Axtarış İdarəsində baş əməliyyat müvəkkili, şöbə rəisinin müavini, şöbə rəisi, həmin idarənin rəis müavini, 1994-cü ildən isə Bakı Şəhər Qaradağ Rayon Polis İdarəsinin rəisi olmuşdur.[1]
Azərbaycan Respublikası Prezidentinin 6 mart 1997-ci il tarixli Sərəncamı ilə Aydın Qasımov Azərbaycan Respublikası ədliyyə nazirinin müavini — Məhkəmə Qərarları İcrası Baş İdarəsinin (hazırkı Penitensiar xidmətin) rəisi vəzifəsinə təyin edilmişdir.[2] O, 28 yanvar 2005-ci ildə vəzifəsindən azad edilmişdir.[3]
Aydın Qasımova 30 dekabr 1998-ci ildə general-mayor ali hərbi rütbəsi verilmişdir.[4]
Çoxcildli cəza-icra hüququ tarixi monoqrafiyasının müəllifidir.[5]
Ailəlidir, 3 övladı var.
- ↑ 1 2 3 Qasımov Aydın Elyas oğlu // Azərbaycanda kim kimdir? (Ensiklopedik sorğu kitabı). Müəllif və tərtibçi: Tariyel Cahangir. Bakı: "Çıraq" nəşriyyatı. 2004. S. 100.
- ↑ A. E. Qasımov haqqında Azərbaycan Respublikası Prezidentinin Sərəncamı // Azərbaycan Respublikası Prezidentinin Sərəncamları. Bakı. 1997. 110.
- ↑ A. E. Qasımovun Azərbaycan Respublikası ədliyyə nazirinin müavini — Məhkəmə Qərarlarının İcrası Baş İdarəsinin rəisi vəzifəsindən azad edilməsi haqqında Azərbaycan Respublikası Prezidentinin Sərəncamı // Azərbaycan Respublikasının Qanunvericilik Toplusu. № 1. Bakı. 2005. 164.
- ↑ A. E. Qasımova general-mayor hərbi rütbəsinin verilməsi haqqında Azərbaycan Respublikası Prezidentinin Fərmanı // Azərbaycan Respublikasının Qanunvericilik Toplusu. № 12. Bakı. 1998. 2224.
- ↑ "Ədliyyə nazirinin müavini — Məhkəmə Qərarlarının İcrası Baş İdarəsinin rəisi Aydın Eylas oğlu Qasımov". justice.gov.az. 21 oktyabr 2004 tarixində orijinalından arxivləşdirilib. İstifadə tarixi: 24 aprel 2025.