Anar Ziya oğlu Məmmədov (1981) — Azərbaycanlı sahibkar. Garant Holdingin və "Azərbaycan Amerika Alyansı"nın təsisçisi.
| Anar Məmmədov | |
|---|---|
| Şəxsi məlumatlar | |
| Doğum tarixi | 1981 |
| Fəaliyyəti | iş adamı |
| Atası | Ziya Məmmədov |
2009-cu ildən Bakı Beynəlxalq Avtovağzal Kompleksinin tikintisini həyata keçirən 2 şirkətdən biri A. Məmmədovun rəhbərlik etdiyi ZQAN Holdinqin[1] tərkibindəki ZQAN Construction olub.[2][3]
2013-cü ilə qədər "Bank of Azerbaijan"ın səhmlərinin 81 faizinin səhmdarı və Bakı FK-nın fəxri prezidenti olub.[2]
A. Məmmədov ilk dəfə 2013-cü ildə Britaniyada fastfud toyuq sektoruna sərmayə yatırmağa başlayıb. O, həmin vaxt indi KFC restoranlar şəbəkəsinin operatorlarından biri — "1st Rate Investment (UK) Limited" şirkətini satın alıb. Azadlıq Radiosunun 2024-cü ildəki araşdırması Məmmədovun ABŞ qızartma toyuq zənciri KFC-nin İngiltərədə françayzinqinə milyonlarla dollar xərclədiyini üzə çıxarıb. KFC şəbəkəsinə yatırımları onun Britaniyadakı biznes və daşınmaz əmlak portfoliosunun bir hissəsidir. Araşdırmada qeyd edilir ki, Anar Məmmədov ofşor şirkət vasitəsilə İngiltərənin şimal-qərbində azı 20 KFC restoranı, eləcə də Londonun zəngin Meyfeyr rayonunda ofis binasının sahibidir. Bunlar onun Britaniya paytaxtında aldığı 38 milyon dollarlıq dəbdəbəli əmlakın bir hissəsidir. "Transparency International UK" təşkilatının Britaniya torpaq reyestrindən əldə etdiyi qeydlərə görə, bu portfolioya Londonun ən bahalı küçələrində toplam dəyəri 30 milyon dolları aşan daşınmaz əmlak da daxildir.[4]
2015-ci ildə Məmmədov və ailəsi Britaniyada özünü "vətəndaşlıq planlaşdırılması" şirkəti kimi təqdim edən "Henley & Partners" adlı şirkətlə işləyib. OCCRP-nin 2022-ci ildə apardığı araşdırma bu şirkətin yüksək riskli müştərilərə Karib dənizində yerləşən Sent-Kits və Nevis ada dövlətinin vətəndaşlığını almağa kömək etdiyini üzə çıxarıb.[5] Həmçinin Dafne Karuana Qalitsiya Fondunun əldə etdiyi və Azadlıq Radiosunun nəzərdən keçirdiyi sızmış qeydlərə görə, Məmmədov öz müraciət ərizəsində Avropa İttifaqının üzvü olan Maltanın vətəndaşlığını almaq istədiyini bildirib və səbəb kimi bunun ona daha çox səyahət azadlığı verəcəyini, Maltada biznes imkanları ilə maraqlandığını göstərib.[4]
2017-ci ildə Britaniya parlamentində "Pulyuma və vergidən yayınma (Azərbaycan)" başlıqlı debatda britaniyalı millət vəkili Marqaret Toc A. Məmmədovun 2001-ci ildə Londonun dəbdəbəli Bişops-avenyu küçəsində 4 milyon dollara ev alarkən, cəmi 20 yaşında olduğunu qeyd edib.[4]
“Azadlıq” qəzetinin 2 iyul 2010-cu il tarixli sayında “Kəmaləddin Heydərovun ayısını yedilər” başlıqlı yazıda qeyd olunur ki, Anar Məmmədov Qəbələ rayonunda Fövqəladə Hallar nazirinə məxsus restoranda 1 milyon manat verib və orada saxlanan ayını kəsdirib, kabab bişirtdirib. Bundan sonra “Yeni Müsavat” qəzeti də bu məlumatı bir qədər əlavələr etməklə dərc edib.[6] Ardınca əmisi deputat Elton Məmmədov bunu inkar edib.[7]
Bundan başqa, həmin il “Yeni Müsavat” qəzeti A. Məmmədovun Dubaydakı hotellərin birində qalmaqal yaratdığı barədə yazı dərc edib. Sentyabrın 14-də dərc olunan “Şeyx Anar Məmmədovu Dubaydan qovdurub” başlıqlı yazıda azərbaycanlı kişilərin Dubaya səfərinə qadağa qoyulmasına nazir övladının davranışının səbəb olduğu qeyd edilib.[8]
2010-cu ilin noyabrında Anar Məmmədov “Azadlıq” və “Yeni Müsavat” qəzetlərini onun restoranda ayı kəsdirdiyini və Dubaydan qovulduğunu iddia edən yazılara görə məhkəməyə verib. Yasamal rayon Məhkəməsinə müraciət edən Məmmədov hər iki qəzetin ayrı-ayrılıqda 250 min manat cərimə edilməsini və həmin yazıların təkzib olunmasını istəyib.[9] Məhkəmə Anar Məmmədovun Qəbələdə ayı kəsdirib yeməsi haqda təsdiqini tapmayan xəbər yaydığna görə qəzetləri 8 min manat məbləğində cərimə edib.[10]
Azərbaycanın sabiq nəqliyyat naziri Ziya Məmmədovun oğludur.
Azərbaycanın sabiq kənd təsərrüfatı naziri Heydər Əsədovun qızı Fəridə Məmmədova ilə evlidir.[11]
- ↑ "Nazir Ziya Məmmədov, oğlu Anar Məmmədov və ZQAN Holdinq". Azadlıq Radiosu (az.). 2009-12-10. İstifadə tarixi: 2024-11-07.
- ↑ 1 2 "'Baghlan' – Məmmədovları bağlayan nəqliyyat biznesi". Azadlıq Radiosu (az.). 2022-01-27. 2024-07-15 tarixində arxivləşdirilib. İstifadə tarixi: 2024-11-07.
- ↑ "Beynəlxalq Avtovağzalın sahibi Vircin adalarından çıxdı". Azadlıq Radiosu (az.). 2011-07-14. 2024-11-08 tarixində arxivləşdirilib. İstifadə tarixi: 2024-11-07.
- ↑ 1 2 3 "Azərbaycanlı maqnat Britaniyada KFC restoranlar şəbəkəsinə gizli milyonları belə yatırdı". Azadlıq Radiosu (az.). 2024-07-11. 2024-10-09 tarixində arxivləşdirilib. İstifadə tarixi: 2024-11-07.
- ↑ "Conflicts Of Interest And Controversial Clients: Henley & Partners' Caribbean Business". 2024-07-14 tarixində arxivləşdirilib. İstifadə tarixi: 2024-11-07.
- ↑ "Anar Məmmədov ayını kimlərlə yeyib?". musavat.com. 2024-11-08 tarixində arxivləşdirilib. İstifadə tarixi: 2024-11-07.
- ↑ "Ziya Məmmədovun qardaşı Anar Məmmədovun ayı əti yeməsindən danışdı". mia.az (az.). 2024-11-08 tarixində arxivləşdirilib. İstifadə tarixi: 2024-11-07.
- ↑ "Şeyx Anar Məmmədovu Dubaydan qovdurub". musavat.com. 2010-09-14. İstifadə tarixi: 2024-11-07.
- ↑ "Ayı kababı, Dubay qalmaqalı və nazir oğlunun məhkəmə iddiası". Azadlıq Radiosu (az.). 2010-11-24. 2024-11-08 tarixində arxivləşdirilib. İstifadə tarixi: 2024-11-07.
- ↑ "Anar Məmmədov "Ayı işi"ni diriltdi". 2019-09-20 tarixində arxivləşdirilib. İstifadə tarixi: 2024-12-29.
- ↑ "Anar Məmmədov xanımına ad günü keçirdi — Video". Qafqazinfo (az.). 2022-01-17. 2022-01-18 tarixində arxivləşdirilib. İstifadə tarixi: 2024-11-07.