Anar Eminov (1982, Sumqayıt) — azərbaycanlı iqtisadçı, pedaqoq. İqtisad üzrə fəlsəfə doktoru, dosent. Mingəçevir Dövlət Universitetinin rektorudur.
| Anar Eminov | |
|---|---|
| Anar Nazim oğlu Eminov | |
| Doğum tarixi | 1982 |
| Doğum yeri | Sumqayıt |
| Vətəndaşlığı | Azərbaycan |
| Elm sahələri | İqtisadiyyat, Menecment |
| Elmi dərəcəsi | İqtisad üzrə fəlsəfə doktoru |
| Elmi adı | Dosent |
| İş yeri | Mingəçevir Dövlət Universiteti (rektor) |
| Alma-mater | Azərbaycan Dövlət İqtisad Universiteti, Egey Universiteti, Doqquz Eylül Universiteti |
| Təhsili | Beynəlxalq ticarət, Beynəlxalq biznesin idarə edilməsi, Hüquqşünaslıq |
| Tanınır | Sosial sahələr üzrə investisiya layihələri tədqiqatları ilə |
Anar Nazim oğlu Eminov 1992–1999-cu illərdə Sumqayıt şəhər Texniki və Təbiət Elmləri Liseyində təhsil almışdır.
1999–2003-cü illərdə Azərbaycan Dövlət İqtisad Universitetində "Beynəlxalq ticarət" ixtisası üzrə bakalavr təhsilini fərqlənmə diplomu ilə başa vurmuşdur.
Təhsilini Türkiyədə davam etdirərək, 2003–2004-cü illərdə Egey Universitetində, 2004–2006-cı illərdə isə Doqquz Eylül Universitetində magistratura səviyyəsində beynəlxalq biznesin idarə edilməsi ixtisasına yiyələnmişdir.
2006–2010-cu illərdə Qərb Universitetində "Hüquqşünaslıq" ixtisası üzrə təhsil almış, 2006–2007-ci illərdə isə Beynəlxalq Ticarət İnstitutunun "Elektron ticarət" ixtisasını distant formada tamamlamışdır.[1]
2018-ci ildə Azərbaycan Turizm və Menecment Universitetinin prorektoru təyin olunmuşdur. 2023-cü ildə əvvəlcə Azərbaycan Texniki Universitetinin Tədqiqat və inkişaf şöbəsinin müdiri, daha sonra isə Yüksək Təhsil İnstitutunun direktoru vəzifəsində çalışmışdır.[2]
2025-ci ildə London Universitetində "Menecerin əsas idarəetmə alətləri" istiqaməti üzrə kursu bitirmişdir.
9 aprel 2025-ci ildə Prezident İlham Əliyevin sərəncamı ilə Anar Nazim oğlu Eminov Mingəçevir Dövlət Universitetinin rektoru vəzifəsinə təyin edilmişdir.[3]
Anar Eminov 2012-ci ildə iqtisad üzrə fəlsəfə doktoru elmi dərəcəsini, 2016-cı ildə isə dosent elmi adını almışdır. O, sosial sahələrə yönəldilmiş investisiya layihələrinin effektivliyi mövzusunda tədqiqatlar aparır. 200-ə yaxın elmi məqalənin, 5 dərs vəsaitinin və 1 monoqrafiyanın müəllifidir.
- ↑ "Rektor təyin edilən Anar Eminov kimdir? - Dosye". GlobalInfo.az (türk). 9 aprel 2025.
- ↑ "Anar Eminov". musavat.com.
- ↑ "Prezidentin sərəncamı". President az (az.). 9 aprel 2025.
- Anar Eminov (ing.)