Amandla — Birlik festivalı — 21 iyul 1979-cu ildə Boston, Massaçusetsdəki Harvard stadionunda keçirilmiş dünya musiqi festivalı idi.[1][2] Konsertin məqsədi Cənubi Afrikanın azadlığını dəstəkləmək və qeyd etmək, eyni zamanda Boston əhalisinin ailələrində, məktəblərində, iş yerlərində və icmalarında irqçiliyi sona çatdırmaq üçün göstərdiyi səyləri gücləndirmək idi.
| Amandla festivalı | |
|---|---|
| Yer | Boston, Massaçusetsdəki Harvard stadionu |
| Keçirildiyi illər | 21 iyul 1979 |
"Amandla" sözü Cənubi Afrika Zulu dilində "güc", "qüvvət" və ya "enerji" mənasını verir. Festivalın əsas ifaçısı reggi ulduzu Bob Marli və onun "The Wailers" qrupu idi. Marli çıxış zamanı bir neçə qısa nitq söylədi, burada sistemi sərt şəkildə tənqid etdi və Afrikanın birliyi və azadlığı üçün çağırış etdi. Bu çıxışlar Marli üçün qeyri-adi idi, çünki adətən sistemin uğursuzluqları və marixuana istifadəsi ilə bağlı açıq danışanda senzura ilə təhdid olunurdu, lakin Amandla Festivalında açıq danışmaq fürsəti tapmışdı.
Festivalın əsas təşkilatçıları arasında Canet Akselrod, Ribi Qarofalo, Canin Fey, Şelli Neill, Corc Pilsberi və Kazi Ture var idi. Digər ifaçılar isə bunlar idi:
Soul musiqisinin əfsanəsi Patti LaBelle, caz pianisti Eddie Palmieri, zərb alətləri ustası Babatunde Olatunji, barabançı Yaya Diallo, Cənubi Afrikadan "Jabula" qrupu, "Qara rəqs sənəti" qrupu, Bob Marlidən əvvəl çıxış edən və nitq söyləyən məşhur komediyaçı Dik Qriqoryi. Festivalın aparıcısı Mel King idi. O, Bostonun tanınmış icma fəalı və aparteidin açıq-aşkar əleyhdarlarından biri idi.
Bob Marli və The Wailers (ağlayanlar) festival üçün son anda imza atan son musiqi qrupu oldu. Onlar festivaldan cəmi üç həftə əvvəl çıxış etməyə razılaşdılar. Lakin konsert az qala baş tutmayacaqdı. Gitarist Al Anderson məşq zamanı gitarasını sındırdı və qrup səhnəyə çıxmaqdan imtina etdi. Tədbirin təşkilatçılarından biri dərhal Harvard meydanına gedərək "The Instrument Exchange" adlı mağazadan 600 dollara yeni bir gitara aldı. Bu, festivalın davam etməsini təmin etdi. Bundan əlavə, festival zamanı stadionda rəsmi polis qüvvələrinə icazə verilmədi. Konsert təşkilatçıları altı ay ərzində Boston sakinlərini izdiham təhlükəsizliyi üçün xüsusi olaraq hazırlamışdılar.
- ↑ "Amandla: The Festival of Unity, 1979" Arxivləşdirilib 2016-08-18 at the Wayback Machine, bobmarley.com.
- ↑ Emmett G. Price, III, Tammy Kernodle, Horace Maxille (eds), "A Timeline of Significant Moments in African American Music" Arxivləşdirilib 2016-09-18 at the Wayback Machine, Encyclopedia of African American Music, Greenwood, 2011, p. xliv.