Almaz Hüseynova

Almaz Həsənqızı 1959-cu il avqustun 24-də Azərbaycan Respublikası Xaçmaz rayonunda anadan olmuşdur. Naxçıvan Muxtar Respulikası Ordubad şəhər M. Sidqi adına orta məktəbi bitirmişdir (1966–1976). Orta məktəbdə oxuduğu illərdə, eyni zamanda, Ordubad şəhər musiqi məktəbində (fortepiano üzrə) təhsil almışdır (1966–1973). Daha sonra ali təhsil almaq üçün Azərbaycan Dövlət Universitetinə daxil olan Almaz xanım, 1981-ci ildə universitetinin filologiya fakültəsini bitirmişdir.^[2]

O, əmək fəaliyyətinə təyinatla göndərildiyi İsmayıllı rayonunun Qalacıq kəndində dil-ədəbiyyat müəllimi (1981–1982) kimi başlamışdır. Sonra da Xalq Maarifi muzeyində elmi işçi (1983–1991), Qızlar Kollecində (1991–1998), Bakı Qızlar Universitetində müəllim (1998–2014), Azərbaycan MEA Folklor İnstitutunda (2014) aparıcı elmi işçi vəzifələrində çalışmışdır.

Almaz Hüseynova 2002-ci ildə "Azərbaycan mühacirət folklorşünaslığında dastançılıq məsələləri" mövzusunda namizədlik dissertasiyası müdafiə etmişdir. BQU-da müəllim, baş müəllim, dosent işləmişdir (2013–2014). 2013-cü ildə "Azərbaycan mühacirət folklorşünaslığı" mövzusunda doktorluq dissertasiyası müdafiə etmişdir. Hazırda Bakı Qızlar Universitetinin Azərbaycan dili və ədəbiyyatı kafedrasında professor (2019) və AMEA Folklor İnstitutunda baş elmi işçi vəzifəsində çalışır.

Ailəlidir, iki övladı var.

Almaz Həsənqızının elmi yaradıcılığı Azərbaycan mühacirət folklorşünaslığının araşdırılması ilə bağlıdır. O, həmçinin XX yüzil mühacirətini təmsil edən bir çox müəlliflərin əsərlərini Azərbaycan türkcəsinə çevirərək yayınlamışdır.

Almaz Həsənqızı beş monoqrafiya, üç dərs vəsaiti, bir fənn proqramı, 3 tərtibat, 2 türkcədən, 1 türkməncədən tərcümə kitablarının, Azərbaycan, Türkiyə, Amerika Birləşmiş Ştatları, Rusiya, Ukrayna, İsveç, İran, Hindistan, Çin, Türkmənistan, Qazaxıstan, İraq, Koreya və b. ölkələrdə nəşr edilən 180-dan çox elmi məqalənin müəllifidir.

• Azərbaycan mühacirət folklorşünaslığında dastançılıq məsələləri (monoqrafiya), Bakı: Azərnəşr, 2002, 124 s.
• İki dastan (monoqrafiya), Bakı: Azərnəşr, 2006, 120 s.
• Aşıq yaradıcılığı mühacirət folklorşünaslığında (monoqrafiya), Bakı: Azərnəşr, 2011, 156 s.
• Azərbaycan mərasimləri mühacirət folklorşünaslığında (monoqrafiya), Bakı: Azərnəşr, 2011, 156 s.
• Mühacirətdə folklor janrlarının tədqiqi (dərs vəsaiti), Bakı: "Elm və təhsil", 2012, 212 s.
• Azərbaycan mühacirət folklorşünaslığı (filoloji təhsilin bakalavr pilləsi üçün proqram), Bakı: "Elm və təhsil", 2012, 20 s.
• Folklorşünaslığa giriş (dərs vəsaiti), Bakı: "Elm və təhsil", 2015, 260 s.
• Azərbaycan mühacirət folklorşünaslığı (monoqrafiya), Bakı: "Elm və təhsil", 2016, 448 s.
• Müasir Azərbaycan ədəbi dilindən praktikum (dərs vəsaiti), Bakı, "Nurlar", 2018, 232 s.
• Folklorşünaslığa giriş (dərs vəsaiti), Təkmilləşdirilmiş II nəşr, Bakı: “Turan evi”, 2025, 284 s.

Tərtib etdiyi kitablar

• Əhməd bəy Ağaoğlu. İran və inqilabı (türkcədən çevirmə), Bakı: Azərnəşr, 2009, 152
• Mühacirətdə folklor araşdırmaları, I kitab (tərtibat və tərcümə), Bakı: Elm və təhsil, 2015, 252 s.
• Əhməd Cəfəroğlu. Doğu ellərimiz ağızlarından toplamalar (Qars, Ərzurum, Çoruh elləri ağızları) (çevirmə), Bakı: Elm və təhsil, 2018, 312 s.
• Türkmən məhəbbət dastanları (Türkmən dilindən çevrimə və yayına hazırlama). Bakı: Azərnəşr, 2022, 239 s.
• Türkmən məhəbbət dastanları (Türkmən dilindən çevrimə və yayına hazırlama). İkinci nəşri, Bakı: Azərnəşr, 2022, 239 s.
• Turan sevdalısı (Məqalələr toplusu), yayına hazırlayan və elmi redaktoru. Bakı, Azərnəşr, 2023, 256 s.
• Əhməd bəy Ağaoğlu. İran və inqilabı (Türkcədən çevirmə). Bakı: Salman Mümtaz, 2025, 160 s.

1987-ci ildə Azərbaycan SSR Təhsil nazirliyinin fəxri fərmanına layiq görülmüşdür.

• Professor Almaz Həsənqızı ^{[ölü keçid]}