Abdulcəlil Şabanov

Abdulcəlil Şabanov 8 iyun 2002-ci ildə Zaqatala şəhərində anadan olub. 2010-cu ildən güləşlə məşğul olmağa başlayıb. Həsrət Məmmədyarovun rəhbərliyi altında məşq edir, Neftçi İdman Klubunda çıxış edir. Dağıstan Dövlət Pedaqoji Universitetində təhsil alıb.

Abdulcəlil Şabanovun beynəlxalq səviyyədə debütü 2019-cu ilin iyununda İtaliyada baş tutan yeniyetmələr arasında Avropa Çempionatı oldu. Həmin turnirdə o, medalın bir addımlığında məğlub olmaqla turniri beşinci pillədə tamamladı.

2021-ci ildə isə Şabanov əvvəl iyunda Almaniyada, ardınca isə avqustda Rusiyada baş tutan gənclər arasında Avropa və Dünya Çempionatlarını onuncu pillədə başa vurdu. Həmin il o, həm də Azərbaycan Çempionatında bütün rəqibləri üzərində qələbə qazanaraq turnirin qalibi oldu.

2022-ci ildə də Şabanov beynəlxalq səviyyədə uğurlara imza ata bilmədi. O, martda U23 Avropa Çempionatını və iyunda U20 Avropa Çempionatını müvafiq olaraq 7-ci və 15-ci pillələrdə tamamladı.

Şabanovun ən uğurlu mövsümü 2023-cü ilə təsadüf edib. Həmin ilin martında o, Rumıniyanın Buxarest şəhərində baş tutan 23 yaşlılar arasında Avropa Çempionatında medalın bir addımlığında məğlub olmaqla turniri beşinci pillədə başa vurdu. Noyabrda isə Şabanov Albaniyanın Tirana şəhərində baş tutan 23 yaşlılar arasında Dünya Çempionatında bürünc medalın sahibi oldu. Həmin il o, həm də Azərbaycan Çempionatını bürünc medalla tamamladı.

2024 və 2025-ci illərdə də Abdulcəlil Şabanov beynəlxalq arenalarda ciddi uğurlara imza ata bilmədi. 2024-ci ildə o, Antalya şəhərində Yaşar Doğunun xatirəsinə həsr olunmuş beynəlxalq turniri doqquzuncu, Tirana şəhərində U23 Dünya Çempionatını 12-ci pillələrdə başa vurdu. Həmin il o, yeganə uğuruna Azərbaycan Çempionatında bürünc medala sahib olmaqla imza atdı. 2025-ci ildə isə Şabanov Albaniya U23 Avropa Çempionatını doqquzuncu pillədə tamamladı.