Abbasəli bəy Ağabababəyov

Abbasəli bəy Ağababa bəy oğlu Ağabababəyov 1869-cu il yanvarın 2-də İrəvanda anadan olub.^[1] 1879–1881-ci illərdə İrəvan kişi progimnaziyasında, 1881–1889-cu illərdə İrəvan kişi gimnaziyasında, 1890–1894-cü illərdə Moskva İmperator Universitetinin Hüquq fakültəsində təhsil alıb.^[2][3]

1894-cü il iyulun 6-da İrəvan dairə məhkəməsində dəftərxana qulluqçusu kimi həqiqi mülki xidmətə başlayıb. Noyabr ayında katib köməkçisi təyin edilib.^[4] 1895-ci il iyulun 24-də məhkəmənin mülki bölməsinə keçirilib və bölmənin 3-cü masasının müdirliyi də ona tapşırılıb. 1898-ci ilin 15 mart-10 may tarixləri arasında İrəvan qəzası 3-cü istintaq sahəsinin müdiri olub.^[5] 1896-cı ildə Yeni Bəyazid qəzasında, 1897-ci ildə Eçmiədzin və Şərur-Dərələgöz qəzasında işləyib.^[5] 1898-ci il iyunun 16-da Ədliyyə Nazirliyi İdarəsinin əmri ilə İrəvan qəzası sülh hakiminin köməkçisi vəzifəsinə təyin olunub. 1898-ci il avqustun 1-də öz ərizəsinə əsasən tutduğu vəzifədən istefa verib.^[6]

1899-cu il avqustun 19-da kollej katibi çini alıb. 1900-cü il sentyabrın 28-də Tiflis Dairə Məhkəməsində böyük namizəd vəzifəsinə təyin edilib.^[6] Həmin ilin sentyabr ayında Zaqatala Sülh Bölməsi müstəntiqinə yardım üçün göndərilib. 1901-ci ildən etibarən Zaqatala Sülh Bölməsində istintaq sahəsinə müdirlik edib. 1901-ci il dekabrın 15-də titulyar müşavir çini alıb. Sonrakı illərdə Duşetidə, Zaqatalada, Kutaisidə və Tiflisdə müxtəlif vəzifələr tutub. 1904-cü il avqustun 27-də kollej assesoru çini alıb.^[7][8]

1909-cu il mayın 26-da saray müşaviri çini alıb. 1910-cu ildə Şərur-Dərələgöz Bölməsinin sülh hakimi vəzifəsinə təyin olunub. 1911-ci il yanvarın 1-də III dərəcəli Müqəddəs Anna ordeni ilə təltif olunub. 1912-ci ildə Şərur istintaq sahəsinə müdirlik edib. 1913-cü il fevralın 18-də kollej müşaviri çini alıb. 1914-cü il yanvarın 1-də II dərəcəli Müqəddəs Stanislav ordeni ilə təltif olunub.^[7] 1917-ci ildə İrəvan Dairə Məhkəməsinin inzibati şöbəsinə üzv təyin edilib. 1918-ci ildə Zaqafqaziya hökuməti tərəfindən İrəvan Dairə Məhkəməsininin məhkəmə hissəsi üzrə üzvü təyin edilib.^[7]

1919-cu ildə Azərbaycan Cümhuriyyəti hökumətinin sərəncamı ilə Gəncə Dairə Məhkəməsinin sədri təyin olunub.^{[9][10][11][12]}

Sovet işğalından sonra bir müddət Gəncədə daha sonra isə Bakıda yaşayıb. 1961-ci ildə Bakıda vəfat edib.^[10][13]

1918–1919-cu illərdə Cənub-Qərbi-Qafqaz Cümhuriyyətinin ədliyyə naziri olub.???

Abbasəli bəy 1897-ci il oktyabrın 27-də Leyli xanım İsgəndər bəy qızı Sultanova ailə qurub. Bu evlilikdən Adil, Əsildar, Fuadpaşa, Nurəddin, Zərifə, Nurəddinpaşa və Nəzirə adlı övladları dünyaya gəlib.^[11]