Ağdam Sənaye Parkı Ağdam şəhərində yerləşən, 190 hektar ərazini əhatə edən sənaye parkıdır.[1]
| Ağdam Sənaye Parkı | |
|---|---|
| Məlumatlar | |
| Yerləşməsi | Ağdam Rayonu |
| Koordinatları | 39.9906375,46.9522781 |
| Yaradılıb | 28 may 2021 |
| Tabeçiliyi | İqtisadi Zonaların İnkişafı Agentliyi |
| Statusu | Fəaliyyət göstərir |
Ağdam Sənaye Parkının fəaliyyətinin təşkili, idarə edilməsi və inkişafı ilə bağlı tədbirləri Azərbaycan Respublikası İqtisadiyyat Nazirliyinin tabeliyindəki İqtisadi Zonaların İnkişafı Agentliyi həyata keçirir.[2]
İşğaldan azad olunmuş Ağdam rayonunun əlverişli coğrafi mövqeyi, sosial-iqtisadi inkişaf imkanları, yük axınlarının gələcək təmərküzləşməsi və digər mühüm logistika potensialının mövcudluğu rayonda müasir infrastruktura malik sənaye parkının yaradılmasını zəruri edir.[2]
Azərbaycan Respublikasının Prezidenti İlham Əliyev mayın 28-də Ağdam Sənaye Parkının təməlini qoydu[3]
İqtisadiyyat Nazirliyi yanında İqtisadi Zonaların İnkişafı Agentliyi tərəfindən yaradılan bu park Azərbaycan ərazisində beşinci Sənaye Parkı olacaq.[4]
Sənaye Parkı qida sənayesi, kiçik sənaye və xidmət, iri sənaye müəssisələri, sosial və texniki zonalar, TIR parkı, tikinti materiallarının satışı bazası hissələrinə bölünəcək.
Burada tikinti materiallarının istehsalı müəssisələrinin yaradılması, kənd təsərrüfatı məhsullarının qablaşdırılmasının, meyvə-tərəvəz konservlərinin, ət və süd məhsullarının, şərab, yem, gübrə istehsalı və emalının, eyni zamanda, xidmət sahələrinin, soyuducu kameraların təşkili də planlaşdırılır.[5]
Sənaye Parkının rezidentləri qeydiyyata alındıqları tarixdən 10 il müddətinə əmlak vergisindən, torpaq vergisindən, gəlir və ya mənfəət vergisindən, istehsal məqsədilə idxal etdikləri texnikanın, texnoloji avadanlıqların və qurğuların idxalı zamanı ƏDV-dən və 7 il müddətinə gömrük rüsumlarından azad olunacaqlar. Sənaye Parkının rezidentlərinə əlavə güzəştlərin (xüsusi güzəştli bank kreditlərinin təmin olunması, sosial sığorta ödənişlərin subsidiyalaşdırılması, kommunal xidmətlərin endirimli tariflə təklif edilməsi, xammal idxalında gömrük və ya ƏDV güzəştləri) də verilməsi nəzərdə tutulur. [6]
Subartezian quyusundan Sənaye Parkının sosial zonasına su xətləri çəkilib, işıqlandırılmasında günəş enerjisindən qidalanan panellərdən istifadə edilir. Əraziyə 10 kV-luq elektrik xətti çəkilib və 630 kV-luq komplekt transformator məntəqəsi quraşdırılıb. Belə ki, işğaldan azad olunduqdan sonra Ağdam şəhərində ilk elektrik enerjisi və su təchizatı sistemi Ağdam Sənaye Parkının ərazisində quraşdırılıb. [7]
190 hektar sahəni əhatə edən Sənaye Parkının ərazisi mina və partlamamış hərbi sursatlardan tam təmizlənib[8]
17 fevral 2022-ci il tarixinə olan məlumata əsasən beş şirkətə sənaye parkının rezidenti statusu verilib: “Dadaş-N” MMC, “Veliev” MMC, “Smartpoint” MMC, "Ağ Tekstil" MMC və "Ram Beynəlxalq Nəqliyyat və Ticarət" MMC. 5 rezidentinin sərmayələri 37 milyon manata yaxın həcmdə qiymətləndirilir [9]
- ↑ İlham Əliyev Ağdam Sənaye Parkında iki müəssisənin təməlini qoyub
- ↑ 1 2 "Ağdam Sənaye Parkının yaradılması haqqında Azərbaycan Respublikası Prezidentinin Fərmanı". 2023-07-01 tarixində arxivləşdirilib. İstifadə tarixi: 2022-10-05.
- ↑ "İlham Əliyev Ağdam Sənaye Parkının təməlqoyma mərasimində iştirak edib". 2022-08-27 tarixində arxivləşdirilib. İstifadə tarixi: 2022-10-05.
- ↑ "Ağdam sənaye parkı Azərbaycanda mövcud 4 parkın uğurlu təcrübəsi nəzərə alınmaqla yaradılacaq". 2021-08-12 tarixində arxivləşdirilib. İstifadə tarixi: 2022-10-05.
- ↑ "Ağdam Sənaye Parkının inşasına başlanılıb FOTO". 2021-12-07 tarixində arxivləşdirilib. İstifadə tarixi: 2022-10-05.
- ↑ "Ağdam Sənaye Parkında sahibkarlar üçün biznes imkanları genişləndirilir". 2022-10-06 tarixində arxivləşdirilib. İstifadə tarixi: 2022-10-05.
- ↑ "Ağdam Sənaye Parkı günəş panelləri ilə işıqlandırılır". 2023-07-01 tarixində arxivləşdirilib. İstifadə tarixi: 2022-10-05.
- ↑ "Ağdam Sənaye Parkının ərazisi minalardan tam təmizlənib". 2023-07-01 tarixində arxivləşdirilib. İstifadə tarixi: 2022-10-05.
- ↑ "Ağdam Sənaye Parkının 5 rezidentinin sərmayələri 37 milyon manata yaxın həcmdə qiymətləndirilir". 2022-10-05 tarixində arxivləşdirilib. İstifadə tarixi: 2022-10-05.