Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinƏyləncə nöqtəsi — 2018-ci ildə çəkilmiş Amerika slapstik komediya filmi. Filmin rejissoru Tim Kirkbi, baş rollarda isə Conni Noksvil və Kris Pontius çıxış etmişdir. Hər iki aktyor bundan əvvəl Ceykass (ing. Jackass) layihəsində birlikdə işləmişdir. Noksvil filmi çəkməyə 2013-cü ildə Matt Robertson tərəfindən hazırlanan "The Most Insane Amusement Park Ever" adlı qısametrajlı sənədli filmi izlədikdən sonra ilhamlanmışdır. Həmin film Nyu-Cersidə yerləşən, zəif dizayn edilmiş və təhlükəli attraksionları, həmçinin azyaşlı, təcrübəsiz və tez-tez sərxoş işçiləri ilə tanınan Əyləncə parkı (ing. Action Park) adında əyləncə parkı haqqında idi.[4]
| Əyləncə nöqtəsi | |
|---|---|
| ing. Action Point | |
| Janr | komediya filmi, döyüş filmi |
| Rejissor | Tim Kirkbi |
| Prodüserlər |
|
| İcraçı prodüserlər |
|
| Əsərin müəllifləri |
|
| Ssenari müəllifləri |
|
| Əsaslanır | Matt Robertsonun "Ən çılğın əyləncə parkı" əsəri |
| Baş rollarda | |
| Operator | Maykl Sniman |
| Bəstəkarlar |
|
| Distribütor | Paramount Pictures |
| İlk baxış tarixi | 1 iyun 2018, 31 avqust 2018, 23 avqust 2018[3] |
| Müddət | 85 dəqiqə[1] |
| Büdcə | 19 milyon $[2] |
| Gəlir | 5.1 milyon $[2] |
| Ölkə | |
| Dil | ingilis dili |
| IMDb | ID6495770 |
Filmdəki hadisələr 1980-ci illərin əvvəllərində baş verir. Əsas qəhrəman D.C. Karver adlı cəsarətli bir kaskadyordur. O, təhlükəli attraksionları ilə tanınan, nizamsız işləyən ucuz Əyləncə nöqtəsi (ing. Action Point) adında əyləncə parkının sahibidir. D.C. və onun komandası parkı torpağı müsadirə edərək satmaq istəyən kredit zabiti (ing. Loan officer) Knoblaçdan mühafizə etməyə çalışırlar.
Noksvilin əvvəlki filmi olan "Bad Grandpa" filmində olduğu kimi, Əyləncə nöqtəsi də uydurma süjetlə əlaqələndirilmiş ənənəvi "Jackass" üslublu kaskadyor səhnələrini təqdim edir. Film ABŞ-də 1 iyun 2018-ci ildə Paramount Pictures tərəfindən nümayiş etdirilmişdir. Lakin büdcəsi 19 milyon ABŞ dolları olduğu halda, cəmi 5,1 milyon ABŞ dolları gəlir əldə edərək kassada müvəffəqiyyətsizlik ilə nəticələnmişdir. Film tənqidçilərdən əsasən mənfi rəylər almış, "darıxdırıcı, standart və ruhsuz" kimi xarakterizə olunmuşdur.
1980-ci illərin əvvəllərində D.C. Karver çoxsaylı təhlükəsizlik problemlərinə baxmayaraq, regionda yeganə əyləncə mərkəzi olduğu üçün gənclər arasında məşhur olan ucuz Əyləncə nöqtəsi adında əyləncə parkının sahibidir. Lakin tezliklə yeni açılan 7 Parks adlı əyləncə mərkəzi müştəriləri özünə çəkməyə başlayır. Eyni zamanda, D.C. götürdüyü 100.000 ABŞ dolları məbləğində krediti ödəyə bilmədiyi üçün kredit zabiti Knoblaç tərəfindən torpağını satmağa məcbur edilir. Bu vaxt uzaq düşdüyü yeniyetmə qızı Buqi yay tətilində atasının yanına gələrək parkda işləməyə başlayır.
Bir gecə D.C. və işçiləri rəqib parkı — 7 Parks adındakı parkı izləmək və sabotaj etmək üçün ora gizlicə daxil olurlar, lakin burada yaxalanmaqdan son anda xilas olurlar. Bundan sonra D.C. rəqabətə davam gətirmək üçün yeni ideya tapmalı olduğunu başa düşür. O, Əyləncə nöqtəsini məhdudiyyətlərə deyil, müştərilərin "nə edə biləcəklərinə" əsaslanan park kimi tanıtmaq qərarına gəlir. Bu məqsədlə attraksionlardan bütün təhlükəsizlik tədbirlərini yığışdırır ki, park fərqlənsin. Nəticədə özü də daxil olmaqla bir çox insan ciddi xəsarət alır. Buqi isə xilasedici Beniyə etiraf edir ki, onun əsas gəliş səbəbi atasını, anasının sevgilisinin özünə qəyyumluq hüququ qazanmasına imkan verəcək sənədləri imzalamağa razı salmaqdır.
Reklam məqsədilə D.C. və işçiləri yerli televiziya yayımlarından birinə müdaxilə edərək parkı tanıdırlar. Bu, müştəri axınına səbəb olur, lakin qaydaların olmaması parkda xaos yaradır. Buqinin məsləhəti ilə D.C. uşaqlar üçün ayrıca bölmə açır, lakin pis layihələndirməyə görə bu da müvəffəqiyyətsiz alınır. Nəticədə Buqi hüquq-mühafizə orqanlarını məlumatlandırır və park bağlanır.
D.C. və işçilər parkı bərpa edib yenidən açırlar, lakin bu dəfə bank parkın müsadirə edildiyini bildirir. Bu arada, atasının onu konsertə aparmaq sözünə əməl etməməsi Buqini məyus edir. O, işçilərlə birlikdə sərxoş olur və hamısı polis tərəfindən həbs edilir. D.C. qızını zaminə buraxdırsa da, Buqi əsəbləşərək qəyyumluq sənədlərini imzalatmaq niyyətini açıq şəkildə bildirir. Ertəsi gün D.C. onun itkin düşdüyünü öyrənir və Las-Veqasa avtobusla getmiş ola biləcəyindən şübhələnir. O və Beni avtobusu izləməyə çalışsalar da, yolda mindikləri maşının qəzaya düşməsindən sonra Buqini tapa bilmirlər.
D.C. başa düşür ki, Buqi avtobusda olmayıb və onu bir restoranda tapır. Burada qızına izah edir ki, ilk ailəsini itirdikdən sonra park onun üçün yeni bir ailəyə çevrilmişdir və ona görə də oraya bu qədər bağlanmışdır. Krediti ödəyə bilməyən D.C. parkı partladaraq torpağı Knoblaça satmaq qərarı verir. Sonuncu dəfə qapıları açaraq girişləri pulsuz edir, hətta pulsuz pivəpaylayır. Sərxoş ziyarətçilər parkı tamamilə dağıdırlar. Gecə isə işçilər sonuncu dəfə bir yerə yığışaraq fişəng atəşləri ilə parkla vidalaşırlar.
Növbəti gün Buqi getməyə hazırlaşarkən D.C. ona konsertə getmək üçün Ostinə səyahət təklif edir. Buqi sevinir və keçmiş işçilər də onlara qoşulmaq qərarına gəlirlər.
2010-cu illərin sonlarında isə bu hadisələri, yaşlanmış Karverin nəvəsinə danışdığı görünür. Buqi evə dönərkən D.C. həyətində ürək tutması keçirirmiş kimi zarafat edir, lakin Buqi bunun zarafat olduğunu başa düşür və ata-qız gülüşürlər.
- Conni Noksvil — D.C. Karver, Əyləncə nöqtəsi adlı təhlükəli əyləncə parkının sahibi və filmin baş qəhrəmanı.
- Eleanor Uortinqton-Koks (ing. Eleanor Worthington-Cox) — Buqi, D.C.-nin yeniyetmə qızı.
- Kris Pontius (ing. Chris Pontius) — Beni, parkın xilasetmə işçisi və D.C.-nin yaxın köməkçisi.
- Den Bakkedahl (ing. Dan Bakkedahl) — Knoblaç, bankın kredit məmuru, D.C.-nin torpaqlarını müsadirə etməyə çalışan əsas adam.
- Konner Makviker (ing. Conner McVicke) — Durbi, park işçilərindən biri.
- Erik Manaka (ing. Eric Manaka) — Çuk(ing. Chug), park işçilərindən biri.
- Conni Pemberton (ing. Johnny Pemberton) — Qızıl Dişli və ya Qatil Karl, parkın işçilərindən biri.
- Mett Şults (ing. Matt Schulze) — Mitç (ing. Mitch), D.C.-nin dostlarından biri.
- Eyden Uaytok (ing. Aidan Whytock — Rodni (ing. Rodney), park ətrafında görünən əlavə personajlardan biri.
- ↑ "Action Point". British Board of Film Classification. 19 may 2018 tarixində orijinalından arxivləşdirilib. İstifadə tarixi: 1 iyun 2018.
- ↑ 1 2 "Action Point (2018)". Box Office Mojo. İstifadə tarixi: 17 iyun 2018.
- ↑ Filmstarts (alm.).
- ↑ "Watch the Documentary That Inspired Johnny Knoxville's 'Action Point'". Fandango Media. 30 may 2018. İstifadə tarixi: 1 iyun 2018.
- Action Point — Internet Movie Database saytında