Əsgər Əsgərov

Əsgər Əli oğlu Əsgərov 4 mart 1955-ci ildə Naxçıvan Muxtar Respublikasının Babək rayonunun Qoşadizə kəndində anadan olub. O, 1961-ci ildə Qoşadizə kənd orta məktəbinə daxil olub, 1971-ci ildə Naxçıvan şəhər 7 nömrəli orta məktəbi bitirib. 1971–1976-cı illərdə Azərbaycan Dövlət Universitetinin Mexanika-Riyaziyyat fakültəsində ali təhsil alıb.^[1]

Ailəlidir. 4 övladı, 9 nəvəsi var.

Əsgər Əsgərov 1976–1979-cu illərdə "Sumqayıt Kimya Sənayesi" İstehsalat Birliyində mühəndis-riyaziyyatçı və mühəndis, 1979-cu ildə Naxçıvan rayon Rabitə Qovşağında teleqrafist, 1979–1980-ci illərdə Varonej şəhərində "Əsas Hesablama Mərkəzi"ndə mühəndis, 1980-ci ildə Naxmeliorasiya Su Tikinti Trestində baş mühəndis, 1980–1981-ci illərdə Naxçıvan Muxtar Respublikası Statistika İdarəsində mühəndis-proqramçı, 1981–1988-ci illərdə mühəndis texniki, İqtisadi və Statistik Məsələlərin Proqramlaşdırılması Alqoritmizasiya bürosunda müdir, 1988–1989-cu illərdə Proqramlaşdırma və Riyazi Sistemlərlə Təminetmə bürosunda aparıcı mühəndis-proqramçı, 1989–1991-ci illərdə Bakı Elmi Tədris Mərkəzində aparıcı mühəndis-proqramçı, 1991–1993-cü illərdə isə həmin elmi mərkəzdə şöbə rəisi vəzifələrində çalışıb.^[1]

Əsgər Əsgərov 1990-cı ildə Naxçıvan MSSR Ali Sovetinin deputatı seçilib. Bu dövrdə Naxçıvanda mühüm siyasi hadisələr baş vermişdir. 1990-cı il noyabrın 17-də Heydər Əliyevin sədrliyi ilə keçirilən tarixi sessiyada Naxçıvan MSSR Ali Sovetinin qərarı ilə Muxtar Respublikanın adından "Sovet Sosialist" sözləri çıxarılmış, qanunverici orqanın adı "Ali Məclis" olaraq dəyişdirilmişdir. Bununla əlaqədar olaraq Əsgər Əsgərov 1990-cı ildən etibarən 1995-ci ilə qədər Naxçıvan MR Ali Məclisinin deputatı olub. 1991-ci il sentyabrın 3-də Naxçıvan əhalisinin təkidli tələbi ilə Heydər Əliyev Naxçıvan Muxtar Respublikası Ali Məclisinin sədri seçilmişdir.^[2][3]

Siyasi fəaliyyətini davam etdirən Əsgər Əsgərov 1996-cı ildən Yeni Azərbaycan Partiyasının üzvü olub. O, Naxçıvan MR Ali Məclisində 1993–1994-cü illərdə Dövlət Quruculuğu, Yerli Dövlət və İctimai Təşkilatlarla İş şöbəsində referent, 1994-cü ildə Yerli Dövlət Hakimiyyəti Orqanları şöbəsində baş referent, 1994–1995-ci illərdə İş İdarəsinin İqtisadiyyat və Qanunvericilik şöbəsində müdir müavini, 1995–1997-ci illərdə İşlər İdarəsinin İqtisadiyyat və Qanunvericilik şöbəsində baş referent, 1997–2001-ci illərdə isə Dövlət Quruculuğu, Yerli Hakimiyyət Orqanları və İctimai Təşkilatlarla İş şöbəsində müdir vəzifələrində çalışmışdır.^[1]

Əsgər Əsgərov uzun illər müxtəlif vəzifələrdə yerli idarəetmənin təkmilləşdirilməsi, iqtisadi və hüquqi məsələlərin həlli, normativ sənədlərin hazırlanması və yerli qurumların işinin koordinasiyası üzrə layihələrin həyata keçirilməsində iştirak etmişdir. 25 oktyabr 2001-ci ildə o, Naxçıvan Muxtar Respublikası Dövlət Meliorasiya və Su Təsərrüfatı Komitəsinin sədri təyin olunmuşdur. Onun rəhbərliyi altında komitə su təchizatı və kanalizasiya sistemlərinin təkmilləşdirilməsi üzrə bir sıra mühüm layihələr həyata keçirmişdir. Komitə xüsusilə suvarma və su ehtiyatlarının idarə olunması sahəsində mühüm addımlar atmış, müasir texnologiyalar tətbiq edilərək suvarılan ərazilər genişləndirilmiş və modernləşdirilmişdir. Onun rəhbərliyi ilə komitə həmçinin ali təhsil müəssisələri ilə əməkdaşlıq edərək bu sahədə ixtisaslı kadrların hazırlanmasına dəstək olmuşdur.^[1]

Əsgər Əsgərov hal-hazırda elmi fəaliyyət ilə məşğuldur.

O, Azərbaycanda meliorasiya və su təsərrüfatının inkişafındakı xidmətlərinə görə Azərbaycan Respublikası Prezidenti İlham Əliyevin 5 iyun 2008-ci il tarixli Sərəncamı ilə "Tərəqqi" medalı ilə təltif olunmuşdur.^[4] 4 mart 2010-cu ildə isə o, Naxçıvan Muxtar Respublikasının "Əməkdar Dövlət Qulluqçusu" fəxri adına layiq görülüb.^[1]

4 iyun 2015-ci ildə Prezidentin sərəncamı ilə su təsərrüfatı və meliorasiya sahəsində səmərəli fəaliyyətinə görə "Şöhrət" ordeni ilə təltif edilib.^[5]

27 may 2019-cu ildə Prezidentin sərəncamı ilə "Azərbaycan Xalq Cümhuriyyətinin 100 illiyi (1918–2018)" yubiley medalı ilə təltif olunub.