Əsas effektivlik göstəriciləri

Əsas Effektivlik Göstəriciləri (ing. Key performance indicators, KPI) — şirkətin bugünkü və gələcək uğuru üçün kritik əhəmiyyətə malik olan faktorların müəyyən edilərək onların üzərində fokuslanması və əldə edilən nəticələrin bu istiqamətdə istifadə edilməsindən ibarətdir.

Sistem proseslərin yaxşılaşdırılması hesabına xərclərin azaldılmasını məqsəd qoyur və şirkətin ayrı-ayrı şöbələrinə və işçilərə tətbiq edilməsinə əsaslanır. Bunun üçün əvvəlcə şirkətin hədəfləri istiqamətində doğru göstəricilər seçilməli, bu göstəricilərin hesablanması üçün davamlı məlumatın toplandığı sistem qurulmalı, əldə edilən nəticələr analiz edilməli və bunların əsasında yeni strategiya və hədəflər müəyyən edilməlidir.

KPI-ların 7 əsas xüsusiyyəti:

• Maliyyəyə aid olmayan;
• Mütəmadi olaraq yoxlanan (günlük, həftəlik 7/24);
• CEO və ya rəhbərlik tərəfindən tətbiq edilən;
• Hər bir işçi tərəfindən qəbul olunan;
• Xüsusi bir komanda tərəfindən həyata keçirilən;
• Əhəmiyyətli təsirə malik olan;
• Müsbət təsirə malik olan göstəricilərdir.

Ümumiyyətlə isə KPI sisteminin tətbiqində əsas məsələ KPI-ların düzgün seçilməsi və ya ölçülməsi, nəticələrin əldə olunmasından daha çox, onların analizi və düzgün şərh edilməsidir. Qısacası, şirkətin məqsəd, missiya, hədəf və strategiyalarına əsaslanan KPI-lar seçildikdən sonra, sistemin əsas məqsədi nəticələri düzgün təhlil edib, şirkət üçün prioritet hesab edilən sahələri müəyyən etmək, nəticələri yeni strategiya və hədəflərə çevirməkdir.