Ər-Rəy döyüşü

8 aprel 2016-cı il tarixində Havar Kilis Əməliyyat Otağına daxil olan müxalif qüvvələr Ər-Rəy şəhərini və ondan artıq kəndi ələ keçirmişdir, lakin üç gün sonra İŞİD-in əks-hücumu nəticəsində üsyançılar geri çəkilmiş, itirilmiş yaşayış məntəqələrinin demək olar hamısı yenidən təşkilatın nəzarətinə keçmişdir. İyun ayında üsyançılar şəhəri bir neçə saatlıq ələ keçirmişdilər, lakin sonradan oradan çıxarılmışdır.^[3]

15 avqust 2016-cı il tarixində güclü artilleriya atəşindən sonra müxalif qüvvələr Ər-Rəy taxıl silolarına hücuma başlamış və silolar da daxil olmaqla bir sıra mövqeləri ələ keçirmişdir,^[7] lakin ertəsi səhər şimal istiqamətindən həyata keçirilən İŞİD əks-hücumu nəticəsində üsyançılar geri çəkilməyə məcbur olmuş və təşkilat itirdiyi bütün mövqeləri geri almışdır.^[8] Mina sahələrinin mövcudluğu hücumun tempinin zəifləməsində rol oynamışdır.^[2]

17 avqust tarixində ASO qüvvələri raket-artilleriya zərbələri ilə İŞİD mövqelərini hədəfə aldıqdan sonra ikinci hücuma başlamış, müdafiənin ilk xətlərini yararaq şəhərə yenidən daxil olmuşdur.^[9] Döyüş zamanı ASO qüvvələri üç ədəd minalanmış avtomobili zərərsizləşdirmişdir.^[10] Həmin günün sonuna doğru Ər-Rəy şəhəri və sərhəd keçid məntəqəsi tam şəkildə ələ keçirilmiş, təslim olan bir sıra İŞİD döyüşçüləri hərbi əsir götürülmüşdür.^[5]

Eyni gün ABŞ Hərbi Hava Qüvvələri üsyançılara hava dəstəyi göstərmiş, Ər-Rəy yaxınlığında yerləşən bir neçə İŞİD bölməsini bombalamışdır.^[11] Döyüşlər şəhərin kənar hissələrində davam etmiş, İŞİD yaxınlıqdakı Düdyan yaşayış məntəqəsində yerləşən qərargahını saxlamışdır.^[2]

Üsyançılara mövqeləri möhkəmləndirmək üçün qısa vaxt verilməsi səbəbindən İŞİD 19 avqust tarixində şərq istiqamətindən sürətli əks-hücuma başlamış, taxıl silolarını və yaxınlıqdakı yüksəklikləri yenidən ələ keçirmişdir.^[12] Bununla belə, şəhərə yönəlmiş hücumun qarşısı alınmış və ASO tərəfi ondan artıq İŞİD döyüşçüsünün öldürüldüyünü bildirmişdir.^[6] Növbəti gün ASO qüvvələri taxıl silolarını yenidən nəzarətə götürmüşdür.^[4]

20 avqust tarixində çoxsaylı üsyançı qüvvələr və ağır və orta silahlarla yüklənmiş 50-dən artıq nəqliyyat vasitəsindən ibarət hərbi karvan Ər-Rəydən Cərablus istiqamətində Türkiyə sərhədinə köçürülmüşdür. Bu proses Türkiyə Silahlı Qüvvələrinin Cəsablusa istiqamətlənmiş hücum əməliyyatına hazırlığı fonunda baş vermişdir.^[1]

27–28 avqust tarixlərində üsyançılar Ər-Rəyin şərqində yerləşən üç kəndin ələ keçirildiyini bildirmişdir, lakin 27 avqust tarixində İŞİD-in Ər-Rəyi yenidən ələ keçirdiyi barədə məlumat yayılmışdır.^{[13][14][15][16]} Ertəsi gün şəhərin yenidən üsyançı qüvvələrin nəzarətində olduğu bildirilmişdir.^[17] 4 sentyabr tarixinə olan məlumata görə, ASO Türkiyə–Suriya sərhədi boyunca İŞİD-in nəzarətində olan bütün əraziləri ələ keçirmişdir.^[18]