Əli Məmmədnəbi oğlu Novruzov (14 avqust 1925, Bakı – 24 fevral 1993, Bakı) — Azərbaycan təyyarəçisi, Sosialist Əməyi Qəhrəmanı (1963).
| Əli Novruzov | |
|---|---|
| Doğum tarixi | 14 avqust 1925 |
| Doğum yeri | |
| Vəfat tarixi | 24 fevral 1993 (67 yaşında) |
| Vəfat yeri | |
| Dəfn yeri | |
| Fəaliyyəti | pilot |
| Mükafatları |
   |
Əli Məmmədnəbi oğlu Novruzov 14 avqust 1925-ci ildə Bakı şəhərində fəhlə ailəsində anadan olmuşdur. 1941-ci ildə, Böyük Vətən müharibəsi dövründə, Bakı şəhərinin Caparidze rayonundakı 1 nömrəli məktəbin 8-ci sinfini bitirmişdir. Daha sonra 4 nömrəli sənət məktəbinə göndərilmişdir.[1]
Əmək fəaliyyətinə təhsilini başa vurduqdan sonra, 1943-cü ilin may ayında Bakıdakı Leytenant Şmidt adına zavodda tornaçı kimi başlamışdır. 1943-cü ilin noyabr ayında xüsusi çağırışla hərbi xidmətə cəlb olunmuş və Ağstafa şəhərində yerləşən Mülki Hava Donanmasının (MHD) 3-cü aviasiya eskadrilyasının tədris bölməsində təhsil almışdır. Buradakı təhsilini 1944-cü ilin avqustunda uğurla başa vurmuş və Bakıda yerləşən MHD-nin 5-ci tədris-məşq dəstəsində təhsilini davam etdirmişdir.[1]
Əli Novruzov 1945-ci ilin fevral ayından hazırkı Hacıqabul şəhərində yerləşən 222-ci xüsusi təyinatlı aviasiya dəstəsinin, 1948-ci ilin fevral ayından 1949-cu ilin yanvar ayınadək Bakı sanitar-nəqliyyat aviasiya qrupunun pilotu olmuşdur. 1949-cu ildə Rostov-na-Donu şəhərində Lİ-2 təyyarəsi üzrə ikinci pilot kimi təkrar hazırlıq kursu keçmiş, həmin ilin avqust ayından etibarən Mülki Hava Donanmasının 9-cu hava nəqliyyatı dəstəsində Lİ-2 təyyarəsinin ikinci pilotu kimi çalışmışdır. 1953-cü ilin aprel ayında Ulyanovsk şəhərindəki Ali Uçuş Hazırlığı Məktəbini bitirdikdən sonra Mülki Hava Donanmasının 107-ci hava dəstəsinə keçərək İL-12 və İL-14 təyyarələrində hava gəmisi komandiri və təlimatçı olmuşdur.[1]
1958-ci ildə Ulyanovsk şəhərində İL-18 təyyarəsinin komandiri kimi təkrar hazırlıq kursu keçmiş, 1959-cu ildən 107-ci aviasiya dəstəsində İL-18 təyyarəsinin komandiri vəzifəsində çalışmışdır. 1961-ci ildə bir neçə ay xarici ezamiyyətdə olmuş, Əfqanıstan Krallığında dövlət tapşırıqlarını yerinə yetirmişdir. 1959-cu ildən Sovet İttifaqı Kommunist Partiyasının üzvü olmuşdur. 1966-cı ildə pilot-komandir kimi uçuş fəaliyyətini başa vurmuş və həmin ilin oktyabrından Azərbaycan Mülki Aviasiya İdarəsində kadrlar şöbəsinin müdiri vəzifəsində çalışmışdır. 1968-ci ilin iyun ayında isə təqaüdə çıxmışdır. Əli Novruzov havada ümumilikdə 4 milyon kilometrdən çox məsafə qət etmişdir.[1] PO-2, Lİ-2, İL-12, İL-14 və İL-8 təyyarələri üzrə 15 min saat uçuş yerinə yetirmişdir.[2]
Əli Novruzov mülki aviasiya sahəsindəki nailiyyətlərinə görə SSRİ Ali Sovetinin Rəyasət Heyətinin 16 aprel 1963-cü il tarixli Fərmanı ilə "Sosialist Əməyi Qəhrəmanı" adına ("Lenin" ordeni və "Oraq və çəkic" medalı təqdim edilməklə) layiq görülmüşdür. "Əmək igidliyinə görə" medalı və aviasiya nişanları ilə mükafatlandırılmışdır.[1] Qulluq vəzifələrini yerinə yetirərkən göstərdiyi xidmətə görə 19 avqust 1960-cı ildə Azərbaycan SSR Ali Sovetinin fəxri fərmanı ilə təltif edilmişdir.[3]
Əli Novruzov 24 fevral 1993-cü ildə Bakıda vəfat etmişdir. II Fəxri Xiyabanda dəfn olunmuşdur.[1]
- ↑ 1 2 3 4 5 6 Сергей Каргапольцев. Новрузов Али Мамед-Наби оглы // Герои страны (rus). 2024-12-04 tarixində arxivləşdirilib. İstifadə tarixi: 2025-02-23.
- ↑ Новрузов Әли Мәммәднәби оғлу // Азәрбајҹан Совет Енсиклопедијасы: [10 ҹилддә]. VII ҹилд: Мисир—Прадо. Бакы: Азәрбајҹан Совет Енсиклопедијасынын Баш Редаксијасы. Баш редактор: Ҹ. Б. Гулијев. 1983. С. 285.
- ↑ Ә. Н. Новрузов јолдашын Азәрбајҹан ССР Али Советинин Фәхри фәрманы илә тәлтиф едилмәси һаггында Азәрбајҹан ССР Али Совети Рәјасәт Һеј'әтинин Фәрманы // Коммунист. № 194 (11448). 20 август 1960-ҹы ил. С. 1.