Əli Bin Nasser (2 mart 1944, Tunis) — tunisli keçmiş futbol hakimi. 1986-cı ildə keçirilmiş futbol üzrə dünya çempionatında məşhurlaşmışdır.
| Əli Bin Nasser | |
|---|---|
| ərəb. علي بن ناصر | |
| Şəxsi məlumatlar | |
| Vətəndaşlığı | |
| Doğum tarixi | 2 mart 1944 (81 yaş) |
| Doğum yeri | |
| İdman növü | futbol |
| Karyera illəri | 1976–1991 |
Əli Bin Nasser 1986-cı il futbol üzrə dünya çempionatında tarixin ən maraqlı və ziddiyyətli matçlarından sayılan Argentina-İngiltərə oyununda referilik etmişdir. Həmin matçda argentinalı Dieqo Maradona "Tanrının əli" və "Əsrin qolu" adlanan 2 qolla komandasına 2–1 hesablı qələbə qazandırmışdır. Qolların birincisini Maradona əli ilə tora daxil etsə də, Bin Nasser qolu hesaba almış, sonralar bu epizodda əllə oyunu görmədiyini iddia etmişdir.
Həmin mundialda tunisli hakim həmçinin Polşa-Portuqaliya matçında da baş hakimlik etmiş, daha 3 oyunda laynsmen olmuşdur. 1986-cı il turnirindən sonra Bin Nasser dünya çempionatlarında daha iştirak etməmişdir.
.png)
2015-ci ilin avqustunda Tunisdə Əli Ben Nasseri ziyarət edən Dieqo Maradona üzərində öz imzası və "Əbədi dostum Əliyə" sözləri olan Argentina formasını ona bağışlamışdır. Öz növbəsində tunisli hakim oyun öncəsi Maradona və Şiltonla olan şəklini argentinalıya hədiyyə etmişdir. Maradona öz Feysbuk səhifəsində "Ben Nasserlə duyğusal görüş keçirdiyini" yazmışdır.[1],[2]
Əli Ben Nasser müsahibələrinin birində yan hakim bolqarıstanlı Boqdan Dotçevi əllə oyun anını görməməkdə ittiham etmiş, "Əsrin qolu" epizodunda isə ingilis müdafiəçilərin kobudluğuna baxmayaraq , topun Maradonada olmasına görə oyunu davam etdirərək argentinalıya tarixin ən gözəl qollarından birini vurmasında assistentlik etdiyini bildirmişdir.[3],[4]
- ↑ "'My eternal friend': Diego Maradona meets infamous ref who gave 'Hand of God' goal". 2018-06-23 tarixində arxivləşdirilib. İstifadə tarixi: 2015-08-24.
- ↑ "Maradona "tanrının əli" ilə qol vurduğu oyunun hakimindən üzr istədi". 2021-01-21 tarixində arxivləşdirilib. İstifadə tarixi: 2015-08-24.
- ↑ "Maradona visits Tunisian referee who awarded him 1986 "Hand of God" goal". 2019-10-21 tarixində arxivləşdirilib. İstifadə tarixi: 2015-08-24.
- ↑ "Maradona meets infamous 'hand of God' referee in Tunisia". 2020-09-21 tarixində arxivləşdirilib. İstifadə tarixi: 2015-08-24.