Əli Əliyev (pedaqoq)

Əli Həşim oğlu Əliyev (bəzi tədqiqatçılar onu Alı Alıyev kimi də təqdim edir.^[3]) 1908-ci ildə Qazaxın Aşağı Salahlı kəndində anadan olmuşdur.^[1] İbtidai və orta təhsilini Salahlı kəndində aldıqdan sonra Tovuzda kolxozçu gənclər məktəbinə daxil olmuşdur. 1982-ci ildə vəfat etmişdir. Əli Əliyev indi də xalq arasında bir pedaqoq, xalq maarifinin fədaisi və el ağsaqqalı kimi anılır.^[2]

Kolxozçu gənclər məktəbini müvəffəqiyyətlə bitirdikdən sonra Salahlı məktəbinə müəllim təyin olunmuşdur. 1930-cu ildə Bakı Ali Pedaqoji İnstitutuna daxil olmuşdur. 1935-ci ildə institutu bitirib təyinatla Qazax pedoqoji məktəbinə müəllim göndərilmişdir. 1937-1939-cu illər arasında pedaqoji məktəbin dərs hissə müdiri vəzifəsində çalışır. O 1939-cu ilin mart ayından 1941-ci ilin iyun ayına kimi Ağstafa rayon maarif şöbəsinin müdiri işləmiş və daha sonra rayon Partiya komitəsinin təbliğat-təşviqat şöbəsinin müdiri, Ağstafa rayon Partiya komitəsinin ikinci katibi vəzifəsində fəaliyyət göstərmişdir. Əli Əliyev sonrakı fəaliyyətini xalqın maarifləndirilməsinə həsr edərək 1948-ci ilin iyun ayından 1951-ci ilin sentyabrına kimi Qazax Müəllimlər İnstitutunda müəllim, 1951-ci ilin ildən isə Seminariyanın direktoru vəzifəsində işləmişdir.^[3] 1953-cü ildən Qazax rayon Maarif şöbə müdiri, 1958-ci ildən ömrünün sonuna kimi Qazax 2 saylı orta məktəbin direktoru olmuşdur.^[2]

Əli Əliyev dəfələrlə rayon xalq deputatları sovetlərinə seçilmiş, o vaxt ölkənin ən yüksək ordeni olan "Lenin ordeni" ilə təltif edilmişdir.^[2]

1. ↑ ^{1 2} İlk milli seminariya: Qazax Müəllimlər Seminariyası. 525-ci qəzet. 2018, 8 dekabr, s.10-11
2. ↑ ^{1 2 3 4} Seyidov Fikrət. Maarifimizin təkrarsız xəzinəsi. II kitab. Bakı, 2001, s. 160-161
3. ↑ ^{1 2} Mərdanov, Misir. İlk milli seminariya: Qazax Müəllimlər Seminariyası – IV hissə