Əhməd ağa Mustafayev (d. 1864, Qazax qəzası, Salahlı kəndi - ö. 1932) — Firudin bəy Köçərlidən sonra Qazax Müəllimlər Seminariyasının direktoru (1920-1923); Qori seminariyasından uğurla məzun olmuş 28 tələbə (30dan artıq[1]) hazırlamış pedaqoq.[2]
| Əhməd ağa Mustafayev | |
|---|---|
| Doğum tarixi | |
| Doğum yeri | Qazax qəzası, Salahlı kəndi |
| Vəfat tarixi | |
| Fəaliyyəti | Qazax Müəllimlər Seminariyasının direktoru (1920-1923) |
| Tanınır | pedaqoq. |
Əhməd ağa Mustafayev Qazax qəzasının Salahlı kəndində dünyaya gəlmiş, 1880-ci ildə Qori müəllimlər seminariyasına daxil olmuş, 1885-ci ildə isə oranı uğurla başa vurmuşdur.[1] Azərbaycan xalq maarifinin xadimlərindən olan Əhməd ağa Mustafayevin həyatı və fəaliyyəti haqqında materiallar Qazax Seminariyasının arxivi yandırılarkən onların içərisində məhv olub. Görkəmli pedaqoq, ədəbiyyatşünas, Qazax seminariyasını əsaslandıran F. Köçərli "Məişətimizə dair" məqaləsində Azərbaycan müəllimlərinin fədakar əməyini təhlil edərək yazırdı:
|
Çox kəndlərdə biçara müəllimlərin halı ziyadə çətinlik ilə keçir... Kənd müəllimlərinin içində İsa bəy Abakarov, Əhməd ağa Mustafayev kimi bir neçə möhtərəm şəxs var ki, həqiqətdə millət xadimi olub, canı-dildən təlim və tərbiyə işlərinə ömürlərini sərf ediblər. Bunların hər birisi 20 ildən ziyadədir ki, müəllimlik etməkdədir | 
|
Əhməd ağa Mustafayev İohann Pestalotsi səviyyəsinə yüksələrək Azərbaycan məktəb tarixində iz qoymuşdur. Qazaxdan Qori seminariyasına oxumağa gedənlərin əksəriyyətini Əhməd ağa Mustafayev hazırlamışdır. O, təkcə Salahlı kəndindən Qori seminariyasına 28 tələbə hazırlamış və onlar seminariyaya daxil olub oranı müvəffəqiyyətlə qurtarmışlar. Onun tələbələrindən İsfəndiyar Vəkilov yazırdı:
|
|
Mənimlə bərabər Əhməd ağa Məmməd Qarayevi, Səlim Əfəndiyevi, Məmməd Qocayevi də Qoriya oxumağa apardı... |
|
Professor Əhməd Seyidov Əhməd ağa Mustafayevi çox yüksək dəyərləndirərək, onu mehriban, vicdanlı, cəsarətli bir ata, bilikli və peşəsini sevən, xalqına bağlı, səmimi bir pedaqoq kimi xarakterizə etmişdir.
O, 40 ildən artıq müxtəlif məktəblərdə müəllimlik fəaliyyəti ilə məşğul olmuşdur. 1910-cu ildə, tanınmış maarifçi F. Köçərlinin təşəbbüsü ilə Dilicanda onun pedaqoji fəaliyyətinin 25 illik yubileyi keçirilmiş, fəaliyyətinə böyük hörmət və dəyər göstərilmişdir. 1920-ci ildə, Köçərlinin erməni silahlıları tərəfindən öldürülməsindən sonra, Əhməd ağa Mustafayev Qazax seminariyasına rəhbər təyin olunmuşdur. O, direktor kimi çalışdığı müddətdə Köçərlinin maarifçilik ideyalarına sadiq qalaraq onun yolunu davam etdirmiş və bu işi daha da inkişaf etdirmişdir.[2]
- ↑ 1 2 Misir Mərdanov. Azərbaycanın təhsil tarixi. “Təhsil” nəşriyyatı, 2011-ci il. Bakı, I cild, s.58, 66
- ↑ 1 2 Seyidov Fikrət. Maarifimizin təkrarsız xəzinəsi. II kitab. Bakı, 2001, s. 154-155