Şiqeiçi Neqişi (根岸重一, Neqişi Şiqeiçi?, 29 noyabr 1923, Tokio – 26 yanvar 2024) – Yaponiya mühəndisi. Karaoke maşınının ən erkən prototipini ixtira etmişdir. O, səsucaldan, mikrafon və teypdən istifadə edərək eyni anda həm öz səsi ilə oxuya, həm də instrumental dəstək trekini oynada bilmişdir. Bənzər ixtirasına görə Daysuke İnoue karaokenin ixtiraçısı kimi daha çox tanınsa da, Ümum-Yaponiya Karaoke Sənayesi Assosiasiyası Neqişini karaoke maşınının beş müstəqil ixtiraçısı arasında birinci olaraq göstərmişdir.[1]
| Şiqeiçi Neqişi | |
|---|---|
| yap. 根岸 重一 | |
| Doğum tarixi | 29 noyabr 1923 |
| Doğum yeri | |
| Vəfat tarixi | |
| Fəaliyyəti | sahibkar, mühəndis, iş adamı |
Neqişi 29 noyabr 1923-cü ildə Tokionun İtabaşi rayonunda doğulmuşdur. Onun anası tütün mağazası işlədirdi, atası isə regional seçkilərə nəzarət edən rəsmi nümayəndə idi.[2] Uşaq olanda karton göydələnlər düzəldən[1] Neqişi işgüzarlığına görə tanınmış, 11 yaşında milli kalliqrafiya müsabiqəsində mükafat qazanmışdır. Hosey Universitetində iqtisadiyyat üzrə təhsil almış və İkinci Dünya müharibəsi zamanı Yaponiya ordusunda xidmət etmişdir. Yaponiyanın məğlubiyyətindən sonra müharibə əsiri olmuş və iki il Sinqapurda saxlanılmışdır.[3] 1947-ci ildə azadlığa buraxıldıqdan sonra "Olympus" kameraları satmış və 1956-cı ildə "Nichiden Kogyo" elektronika şirkətini qurmuşdur.[1]
1967-ci ildə işdə özü üçün oxuyarkən bir işçisi ona səsinin pis olduğunu bildirmişdir. Arxa plan musiqisi ilə daha yaxşı oxuya biləcəyini düşünən Neqişi və komandası səsucaldan, mikrofon və teypi bir-biri ilə əlaqələndirmişdir. Neqişi maşını sınaqdan keçirmək üçün Yoşio Kodama tərəfindən ifa olunan "Mujo no Yume" mahnısının 8-trek instrumental versiyasından istifadə etmişdir.[1] Neqişi məhsulunu tanıtmaq üçün Yaponiya Yayım Korporasiyasında işləyən bir dostu ilə tərəfdaşlıq etmiş və Yaponiya boyunca səyahət edərək ixtirasını nümayiş etdirmişdir.[4][1] Neqişi disribüter tapdıqdan sonra ixtirasına "Qığılcım qutusu" adını vermişdir, çünki "karaoke" sözü yapon dilində tabutu bildirən "kanoke" sözünə oxşayırdı. Neqişi təxminən 8000 Qığılcım qutusu sata bilmişdir.[4]
Neqişi bir sıra çətinliklərdən sonra karaoke biznesini ləğv etmiş, 1993-cü ildə təqaüdə çıxmışdır.[3] İxtirasını heç vaxt patentləşdirmədiyi üçün Daysuke İnoue kimi şəxslər karaoke maşınının ixtirasına görə tanınmışdırlar. Qızının sözlərinə görə atası patent almadığı üçün məyus olmamış, "ideyasının inkişaf edərək bütün dünyada mahnı ilə əylənmək mədəniyyətinə çevrildiyini gördüyü üçün qürur hissi keçirmişdir".[2] Neqişi 26 yanvar 2024-cü ildə 100 yaşında təbii səbəblərdən ölmüşdür.[5][3]
- ↑ 1 2 3 4 5 Alt, Matt. "Shigeichi Negishi, the Inventor of Karaoke, Dies at 100". The Wall Street Journal. March 14, 2024.
- ↑ 1 2 Obituaries, Telegraph. "Shigeichi Negishi, inventor of the karaoke machine – obituary". The Telegraph (ingilis). March 19, 2024. ISSN 0307-1235. İstifadə tarixi: April 1, 2024.
- ↑ 1 2 3 Veltman, Chloe. "Karaoke inventor Shigeichi Negishi dies at 100". National Public Radio. March 15, 2024.
- ↑ 1 2 Alt. səh. 87-88
- ↑ "Shigeichi Negishi, inventor of first karaoke machine, dead at 100". CBC Music. March 15, 2024.
- Alt, Matt. Pure Invention: How Japan's Pop Culture Conquered the World. New York, New York: Crown Publishing Group. 2020. 75–100. ISBN 978-1-9848-2669-5.