Şahzadə Fiona (ing. Princess Fiona) — "DreamWorks"un "Şrek" film silsiləsinin əsas qəhrəmanlarından biri. İlk dəfə 2001-ci ildə ekranlara çıxan filmdə gözəlliyi ilə seçilən şahzadə gecələr oqra çevrilməsi ilə bağlı tilsimə düçar olmuşdur. İlk olaraq şahzadənin busəsi ilə tilsmdən qurtulmağı arzulasa da, tale onu div Şreklə rastlaşdırmış, ona qəlbini təslim etmişdir. Seriyaların davamında şahzadənin keçmişi, münasibətləri daha dərindən açıqlanmışdır. "Şrek 2"də (2004) həyat yoldaşını valideynləri ilə tanış etmiş, "Üçüncü Şrek"də (2007) analıq sevincini yaşamış, "Əbədi Şrek"də (2010) isə döyüşkən cəngavərə çevrilmişdir. Sonuncu filmin böyük hissəsi Fiona ilə Şrekin heç vaxt rastlaşmadığı fərqli bir gerçəklikdə cərəyan etmişdir.
| Şahzadə Fiona | |
|---|---|
| ing. Princess Fiona | |
 | |
| Yaradan | Vilyam Steyq |
| İlk görünmə | Şrek (film) (2001) |
| Son görünmə | Əbədi Şrek (2010) |
| Canlandıran | Kameron Diaz |
| Məlumat | |
| Ləqəbi | Şahzadə |
| Növü |
Oqr İnsan (əslində) |
| Cinsi | Qadın |
| Ailəsi | |
| Həyat yoldaşı | Şrek |
| Uşağı | 3 |
 Vikianbarda əlaqəli mediafayllar | |
Ssenari müəllifləri Ted Elliott və Terri Rossio tərəfindən yaradılmış Fiona obrazı Vilyam Steyqin "Şrek!" (1990) uşaq kitabındakı bədheybət şahzadə qızdan ilhamlanaraq, özünəməxsus şəkildə təsvir edilmişdir. Ssenari müəllifləri digər film yaradıcılarının kəskin etirazlarına baxmayaraq, obrazı cildini dəyişən tilsim altında olan şahzadə qız kimi uyğunlaşdırmışlar. Personajı aktrisa Kameron Diaz səsləndirib. İlkin mərhələdə bu rol komediya ustası və aktrisa Canin Qarofaloya həvalə olunsa da, o, heç bir izahat verilmədən layihədən kənarlaşdırılıb. Kompüter animasiyalı filmdə əsas insan obrazlarından biri olan Fionanı yaradarkən animatorlar onun həm gözəl, həm də real görünməsinə can atmışlar. Buna baxmayaraq, ilkin sınaq nümayişində uşaqların personajın qeyri-adi reallığına mənfi reaksiya verməsi animatorları Fionanı daha stilizə edilmiş, cizgi film qəhrəmanına xas görünüşdə yenidən tərtib etməyə sövq etmişdir. Personajın inandırıcı dəri, saç, geyim və işıqlandırma effektlərinin yaradılması üçün kompüter animasiyasının bir sıra inqilabi nailiyyətləri tətbiq edilmişdir.
Obraz həm nağıllardakı, həm də animasiya filmlərindəki ənənəvi şahzadə qızların səciyyəvi xüsusiyyətlərini zarafatyana şəkildə təcəssüm etdirməklə diqqət çəkmişdir. Tənqidçilər Fionanın xarakterinin çoxyönlü təsviri, döyüş sənətindəki məharəti və Diazın obrazı canlandırması baxımından müsbət rəy bildirmişlər. Obrazın insan qismindəki görünüşü barədə fikirlər haçalanmış, bəziləri texnoloji yenilikləri təqdir etmiş, digərləri isə həddən artıq realist təsviri narahatedici saymış, Diaza bənzərliyi tənqid hədəfinə çevirmişlər. Bir sıra mətbuat orqanları Fionanı feminist ideyanın daşıyıcısı kimi dəyərləndirmiş, onun öz qüsurlarını qəbul etməklə şahzadə stereotiplərini alt-üst etdiyini vurğulamışlar. Diaz "Şrek" filmlər silsiləsindəki rolu sayəsində Hollivudun ən yüksək qonorar alan aktrisalarından birinə çevrilmiş, ilk filmdə çəkilişə görə 3 milyon, hər növbəti filmdə isə 10 milyon dollardan artıq qazanc əldə etmişdir.