Şəhriyar Məcidzadə

Şəhriyar Məcidzadənin atası Sərdar Məcid oğlu Həmidov, 1992-ci ildən 1994-cü ilə qədər keçmiş Dağlıq Qarabağla həmsərhəd Tərtər rayonunun İcra Hakimiyyətinin başçısı və Tərtər Özünümüdafiə Batalyonunun komandiri olmuşdur. 12 may 1994-cü ildə Bişkekdə Azərbaycanla Ermənistan arasında imzalanan atəşkəs razılaşmasından sonra vəzifəsindən azad edilib^[1].

Şəhriyar Məcidzadə 10 sentyabr 1986-cı ildə Tərtər (o vaxtkı Mirbəşir) rayonunda anadan olub. Uşaqlığının ilk illəri Tərtər rayonunda keçib. Daha sonra Bakıda Nəsimi rayonu Elitar Gimnaziyada təhsil alıb.

2005-ci ildə Ukraynada Taras Şevçenko adına Kiyev Milli Universitetinin Beynəlxalq Əlaqələr İnstitunun Beynəlxalq Hüquq fakültəsinə daxil olub və 2009-cu ildə həmin universiteti fərqlənmə ilə bitirib. Universitetdə nizam-intizam qaydalarına ciddi yanaşmasına və fəaliyyətinə görə rəhbərlik tərəfindən xasiyyətnamə alıb^[2][3].

Şəhriyar Məcidzadə ictimai fəaliyyətə 2011-ci ildə “Etatist” qəzetini təsis etməklə başlayıb^[4]. 2012-ci ilin noyabr ayında Azərbaycanda vətəndaş jurnalistikasına töhfə vermək məqsədilə Etatist.com internet qəzetini təsis edib və onun baş redaktoru olub^[5]. Etatist.com internet qəzetinin özəlliyi ondan ibarət olub ki, Azərbaycanda ilk dəfə hər kəs birbaşa bu sayta xəbər və məqalə yerləşdirmək imkanına sahib olub. Qəzetin redaksiya heyəti əsasən könüllü gənclərdən təşkil olunub. İnternet qəzeti fəaliyyətini dayandırana qədər - 2019-cu ilə qədər Ş.Məcidzadə qəzetin baş redaktoru olaraq fəaliyyətini burada da davam etdirib.

2012-ci ilin may ayında bir qrup gənclə Milli Fikir Mərkəzini gənclər təşkilatını təsis edir və təşkilatın sədri seçilir^[6]. O, Milli Fikir Mərkəzinə rəhbərlik etdiyi dövrdə mərkəz yerli ictimai-siyasi simaların, şair və yazarların, professorların, tarixçilərin iştirakı ilə 60-dan çox açıq seminar, müxtəlif tədbirlər və gənclərin müzakirələrini təşkil edib. Eyni zamanda diplomatik korpus nümayəndələrinin, transmilli şirkətlərin yerli ofis rəhbərlərinin açıq seminarlarını keçirib. Mərkəzin tərkibində həmçinin kitabxana, fəlsəfə klubu, oxu klubu, ictimai-siyasi araşdırma qrupları yaradılıb^[7][8].

2016-cı ildə Mələk Hacıyeva ilə birlikdə Milli Fikir Mərkəzinin nəzdində Kitabıstan nəşriyyatını təsis edir.

2018-ci ildə Milli Fikir Mərkəzi fəaliyyətini dayandırandan sonra Kitabıstan nəşriyyatı fəaliyyət istiqamətini genişləndirərək tədqiqat mərkəzi kimi fəaliyyət göstərməyə başlayır və Şəhriyar Məcidzadə həmin mərkəzin direktoru olur. Bundan sonra Kitabıstan Tədqiqat Mərkəzi fəaliyyətini genişləndirərək kitab tərcüməsi və nəşrindən əlavə Azərbaycanda xarici ekspertlərin seminarlarını təşkil etməklə^[9][10][11],tədqiqatlarının sahəsini genişləndirməklə və dünyanın müsbət nümunələrini Azərbaycanda təqdim etmək üçün xarici ekspertlərdən müsahibələr almaqla fəaliyyət göstərir.

2015-ci ilin noyabr ayında keçirilən Azərbaycan Respublikası Milli Məclisinə seçkilərdə Şəhriyar Məcidzadə 95 saylı Tərtər seçki dairəsindən bitərəf olaraq öz namizədliyini irəli sürüb. Seçicilərlə görüşlərində yüksək iştirakçılıq olduğuna görə o, məhdudiyyətlərlə üzləşir, görüşünə gələn insanlara təzyiq edilir, atası və vəkili olan Sərdar Həmidov polis tərəfindən saxlanılır. Həmin dövrdə media qurumları belə 95 saylı Tərtər seçki dairəsini respublika üzrə ən aktiv 3 dairədən biri adlandırmışdı^[12][13].

Bütün bunlara baxmayaraq, səsvermənin nəticələri açıq şəkildə ciddi qanun pozuntuları ilə saxtalaşdırıldı^{[14][15][16][17]}.

Şəhriyar Məcidzadə 2024-cü ilin sentyabr ayında keçirilən Azərbaycan Respublikası Milli Məclisinə seçkilərdə müstəqil namizəd olaraq yenidən iştirak edib və namizədliyini 97 saylı Tərtər-Ağdərə-Goranboy seçki dairəsindən irəli sürüb. “Sülh! İqlim! Gender! Maarifçilik!” şüarı ilə seçkiyə qatılan Ş.Məcidzadə seçki təşviqatı boyunca bu ideyaları da təşviq edib^[18][19].

Seçkilərdə təşviqat dövrü başlamamışdan əvvəl hakim partiyanın 97 saylı Tərtər-Ağdərə-Goranboy seçki dairəsindən namizədi Anar Məmmədov Azərbaycan Respublikasının Seçki Məcəlləsini pozaraq təşviqata vaxtından əvvəl başlayıb^{[20][21][22][23]}. Şəhriyar Məcidzadə bu faktı və təşviqat dövründə də Anar Məmmədovun dəfələrlə Seçki Məcəlləsini pozması ilə bağlı faktları ictimailəşdirsə də və Azərbaycan Respublikasının Mərkəzi Seçki Komissiyasına müraciət etsə də, bu faktlarla bağlı heç bir tədbir görülməyib^[24][25].

Ş.Məcidzadə təşviqat dövründəki və seçki prosesindəki pozuntular, ona qarşı diskriminativ münasibət, həmçinin seçki günü özünün və vəkillərinin, müşahidəçilərinin psixoloji terrora məruz qaldığı, fiziki şiddət gördüyü, ölümlə təhdid edildiyi haqqında xarici mediaya və qlobal medianın yerli xidmətlərinə müsahibə və açıqlamalar verib^[26][27], bu pozuntuları dəfələrlə ictimailəşdirib. Buna baxmayaraq 97 saylı DSK, MSK pozuntularla bağlı heç bir tədbir görməyib.

Seçkilərin nəticəsini qəbul etməyən Şəhriyar Məcidzadə seçki pozuntularının faktları ilə 97 saylı DSK, AR MSK, Apellyasiya Məhkəməsi və Ali Məhkəməyə şikayət edib. Ancaq onun şikayəti təmin olunmayıb ^{[28][29][30][31][32][33][34]}. Onun 2024-cü il parlament seçkiləri kampaniyası Azərbaycandakı azsaylı aktiv seçki kampaniyalarından biri idi.

Şəhriyar Məcidzadə ictimai fəal olaraq qeyri-zorakı mübarizə metodları ilə bir sıra aksiyalar təşkil edib. Sovet imperializminin repressiyasına etiraz olaraq 28 May 2012-ci ildə Sahil bağında Milli Fikir Mərkəzinin üzvləri ilə aksiya keçirib. Aksiya üçün Sahil bağının seçilməsinin simvolik mənası var idi. Çünki SSRİ dövründə bura 26 Bakı komissarının şərəfinə "26-lar Bağı" adlandırılıb.

1993-cü il iyun ayının 4-də Gəncədə Rusiya meyilli Surət Hüseynovun dövlətə qarşı qiyamı, qeyri-konstitusion yolla hakimiyyətə gəlmə istəyini hüquqazidd addım və zorakılıq kimi qiymətləndirən Ş.Məcidzadə MFM-nin üzvləri ilə birlikdə 2012-ci ilin 4 iyun tarixində Bakı şəhərinin əsas küçələrində etiraz yürüşü keçirib^[35][36].

O 2012-ci il 17 iyul tarixində cəmiyyətdə mütaliəni və maarifçiliyi təbliğ etmək məqsədilə Bakı şəhərinin mərkəzində “Oxu! Özünü dərk et” yürüşü təşkil edib.

Şəhriyar Məcidzadə 2014-cü ilin fevralın 19-da rəhbəri olduğu Milli Fikir Mərkəzinin üzvləri ilə birgə Bakıda Nəsimi heykəlinin önündə aksiya keçirib. Aksiyaya səbəb fevralın 16-da Bakıda "Vətən" kinoteatrında MFM-in üzvü, gənc repçi "Kabus"un planlaşdıran konsertinə polis müdaxiləsi olub. Polis konsertin qeyri-qanuni olduğunu bildirib və keçirilməsinə icazə verməyib. Qərara etiraz edən Şəhriyar Məcidzadə və MFM-in üzvləri müdaxilənin qanunsuz olduğunu əsas gətirərək etiraz aksiyası təşkil ediblər. Lakin polisin müdaxiləsi nəticəsində aksiya baş tutmayıb. Şəhriyar Məcidzadə 4 nəfər mülki geyimli şəxs tərəfindən saxlanılaraq, Baş Mütəşəkkil Cinayətkarlıqla Mübarizə İdarəsinə aparılıb və həmin gün sərbəst buraxılıb^[37][38].

2014-cü ildə 283 saylı məktəbin direktoru Etatist internet qəzetinə qarşı məhkəmə iddiası qaldırır və 50 min manat tələb edir. Buna səbəb ehtiyatda olan polkovnik Ziyadxan Bəkirovun Prezident İlham Əliyevə müraciət edərək 72 yaşlı məktəb direktoru Şükufə Axundovadan etdiyi şikayətin Etatist internet qəzetində yayımlanması olub^[39]. Bundan sonra Şəhriyar Məcidzadə "Ölü təhsil-ölü nəsil" adlı tədbir keçirir, Milli Fikir Mərkəzi Təhsil Nazirliyi qarşısında aksiya təyin edir və gənclər virtual aksiya keçirib iddianın geri götürülməsini tələb edir. Oktyabr ayının 24-də iddia edənin tələbini geri götürməsi ilə bağlı mətbuata açıqlama verir və buna görə də aksiya ləğv olunur^[40][41].