İtaliya-Azərbaycan Universiteti

İtaliya-Azərbaycan Universiteti
İtaliya-Azərbaycan Universiteti
Əsası qoyulub	2022
Tələbə sayı	640
Ölkə	Azərbaycan;
Sayt	ada.edu.az/en/about/Ital…
	40°23′37″ şm. e. 49°51′11″ ş. u.
	Vikianbarda əlaqəli mediafayllar

İtaliya-Azərbaycan Universiteti – 2022-ci ildə Bakı şəhərində yaradılmış ali təhsil müəssisəsi. Universitet ADA Universitetinin nəzdində fəaliyyət göstərir və beş İtaliya universiteti ilə əməkdaşlıq edir: Luiss Universiteti, Bolonya Universiteti, Milan Politexnik Universiteti, Turin Politexnik Universiteti və Roma Sapientsa Universiteti.

Tarixi

İtaliya-Azərbaycan Universiteti Azərbaycan prezidenti İlham Əliyevin təşəbbüsü ilə yaradılmışdır. Universitetin yaradılması barədə razılıq İlham Əliyevin 2020-ci ildə İtaliyaya dövlət səfəri zamanı əldə olunmuşdur. Universitetin təsis edilməsinə İtaliyanın beş ali təhsil ocağı – Luiss Universiteti, Bolonya Universiteti, Milan Politexnik Universiteti, Turin Politexnik Universiteti və Roma Sapientsa Universiteti cəlb olunmuşdur. ADA Universiteti ilə İtaliyanın bu universitetləri arasında İtaliya-Azərbaycan Universitetinin yaradılması və bu istiqamətdə akademik əməkdaşlığa dair Anlaşma Memorandumu imzalanmışdır.^[1] 2 aprel 2022-ci ildə ADA universitetinin kampusunda İtaliya-Azərbaycan Universitetinin təməlqoyma mərasimi keçirilmişdir.^[2] Mərasimdə hər iki ölkənin xarici işlər nazirləri iştirak etmişdir.^[3] 1 sentyar 2022-ci ildə İlham Əliyev Romada İtaliya-Azərbaycan Universitetinin yaradılması ilə əlaqədar imzalanmış sənədlərin mübadiləsi mərasimində iştirak etmişdir.^[4]

İtaliya-Azərbaycan Universitetinə ilk tələbə qəbulu 2023-cü ildə həyata keçirilmişdir. İtaliyanın Luiss Universiteti ilə birgə qlobal idarəetmə və siyasət ixtisası üzrə ikili diplom proqramına qəbul baş tutmuşdur.^[1] Universitetin ilk tədris korpusunun açılışı 1 oktyabr 2025-ci ildə baş tutmuşdur. Açılış mərasimində İlham Əliyev, Mehriban Əliyeva və İtaliya prezidenti Serco Mattarella iştirak etmişdirlər.^[5]

Təhsil sistemi

Universitetə tələbə qəbulu 2023-cü ildən magistr səviyyəsində həyata keçirilir. Universitetdə 8 bakalavr və 2 magistr proqramında 538 tələbə bakalavr, 102-si isə magistr səviyyəsində təhsil alır. Üç ixtisas ikili diplom proqramıdır. Tədris proqramlarına kənd təsərrüfatı və qida texnologiyaları, heyvandarlıq, elektrik və elektronika mühəndisliyi, memarlıq, interyer və kommunikasiya dizaynı, şəhərsalma və müxtəlif menecment ixtisasları daxildir. Bunlarla yanaşı, burada peşəkarlar üçün ixtisasartırma və sertifikat proqramları həyata keçirilir.^[3] Universitetin strukturunda iki institut fəaliyyət göstərir: Kənd Təsərrüfatı və Qida elmləri İnstitutu, eləcə də, Dizayn və Memarlıq İnstitutu.^[2] Tədris müddətində tələbələr bir müddət İtaliyada təhsil almaq imkanı əldə edirlər. Universitetə qəbul üçün namizədlər beynəlxalq ingilis dili imtahanı və Dövlət İmtahan Mərkəzi tərəfindən keçirilən magistraturaya qəbul imtahanlarında iştirak etməklə yanaşı, müsahibə mərhələsindən də keçirlər.^[6]

Universitetin 2025-ci ildə istifadəyə verilmiş tədris korpusunda Bolonya Universiteti və Milan Politexnik Universiteti ilə birgə qurulmuş 7 tədris və 6 tədqiqat məqsədli laboratoriya fəaliyyət göstər. Burada landşaft, şəhərsalma və foto-video studiyaları, müxtəlif dizayn emalatxanaları və memarlıq mövzusunda materiallardan ibarət kitabxana yerləşir. Tədris emalatxanası tələbələr və tədqiqatçıların bir yerdə işləməsi üçün nəzərdə tutulmuşdur. Tədris korpusunda yerləşən "Bazar meydanı" universitetin tələbələri və müəllimlərinin ildə bir dəfə burada toplaşaraq öz layihələri ilə yarışması üçün yaradılmışdır.^[3]