Rguliyevs

Yaşar Həsənov Məmmədəli oğlu

Həsənov Yaşar Məmmədəli oğlu 1953-cü ildə Ordubad rayonundan müəllim ailəsində anadan olmuşdur. 1970-ci ildə Ordubad rayonunun Vənənd kənd orta məktəbini bitirib. 1970-1979-cu illərdə Azərbaycan Politexnik İnstitutunda avtomobil nəqliyyatı fakültəsində (axşam şöbəsi) ali təhsil alıb və oranı “Avtomobillər və avtomobil təsərrüfatı” ixtisası üzrə bitirib.

O, 1970-ci ildə orta məktəbi bitirib Bakıya gələrkən ilk olaraq sənədlərini Azərbaycan Politexnik İnstitutuna verir, sonra isə Bakı Baş Tikinti İdarəsinin tədris kurs kombinatına qəbul olunaraq, buldozerçi-ekskavatorçu ixtisasına yiyələnib və 1971-ci ilin aprelin 21-də BBTİ-nin 203 nömrəli İxtisaslaşdırılmış Mexanizasiya İdarəsinə ekskavator maşinisti köməkçisi kimi işə qəbul olunub. O, BBTİ-nin 1971-ci ildə 9-cu mikrorayonda tikintisinə başladığı ilk özül-torpaq işlərinin qazılmasında ekskavatorçu kimi iştirak edib. Az sonra əsgərliyə gedib. 1973-cü ildə yenidən doğma kollektivə qayıdan Y. M. Həsənov 1982-ci ilin sentyabrına kimi ekskavatorçu, çiligər, mexanik və istismar rəisi vəzifələrində çalışıb. 1982-ci ilin sentyabrında yeni yaradılan Bakı Şəhər Tikinti Mexanizasiya trestinin tərkibində 8 nömrəli İxtisaslaşdırılmış Mexanizasiya İdarəsi yaradılarkən. Y. M. Həsənov köçürmə yolu ilə 8 nömrəli İMİ-yə göndərilir, əvvəlcə sex rəisi sonra baş mühəndis olur.

Y. M. Həsənov çox qısa müddətdən sonra 1983-cü ildə 8 nömrəli İxtisaslaşdırılmış Mexanizasiya İdarəsinin rəisi təyin olunur və 1992-ci ilə kimi bu kollektivi böyük uğurlara çatdırır. Təsadüfi deyil ki, Yaşar Həsəsnovun rəis olduğu 8 nömrəli İMİ keçmiş SSRİ məkanında ən qabaqcıl mexanizasiya idarələrindən biri kimi tanınmışdır.

1992-ci ildə Y. M. Həsənov 8 nömrəli İMİ-nin rəis vəzifəsindən azad edilərək Bakı Şəhər Tikintiləri Mexanikləşdirmə trestində müdür müavini vəzifəsinə təyin olunur. 1995-ci ilə kimi Bakı Baş Tikinti İdarəsinin ölkənin mənzil tikintisi sahəsindəki uğuları üçün bir rəhbər, bir mütəxəssis kimi vicdanla çalışır.

Y. M. Həsənov 1995-ci ildə Suraxanı rayon İcra Hakimiyyətində işləmək üçün dəvət alır. Əvvəlcə İcra Hakimiyyətinin tikinti-arxitektura şöbəsində baş mühəndis işləyir, sonra bir müddət icra başçısının müavinini əvəz edir. Sonra isə 2001-ci ilə kimi Suraxanı rayon Mənzil Kommunal Təsərrüfatı Birliyinin baş direktoru vəzifəsində çalışır.

2001-2004-cü illərdə isə Y. M. Həsənov Bakı Şəhər Mənzil Kommunal Təsərrüfatı Departamenti Sədrinin birinci müavini kimi çalışır. Bu illərdə Y. M. Həsənov Suraxanı rayonunun və Bakı şəhərinin tikinti-abadlıq işlərində fəal iştirak edir.

2004-cü ilin dekabrında paytaxtın istilik sistemində problem yarandığı üçün Bakı 1 və 2 nömrəli istilik idarələri ləğv olunaraq onların bazasında Bakı İstili İdarəsi yaradıldı və Y. M. Həsənov idarənin rəisi təyin olundu.

2005-ci ilin İyunun 8-də Azərbaycan Prezindenti Cənab İlham Əliyevin sərəncamı ilə respublikamızda istilik strategiyasının həyata keçirilməsi üçün “Azəristiliktəchizat” Acıq Səhmdar Cəmiyyəti yaradıldı və Bakı istilik idarəsi də bu ASC-nin tərkibinə qatıldı. Cənab Prezidentin digər sərəncamı ilə Y. M. Həsənov ASC-nin sədri təyin olundu və o bu günə kimi bu vəzifədə vicdanla, səriştə ilə çalışır, respublikamızın istilik strategiyasının hazırlanıb həyata keçirilməsi istiqamətində böyük işlər aparır.

Belə ki, Y. M. Həsəsnov “Azəristiliktəchizat” ASC-nin sədri təyin olunduqdan sonra ölkənin istilik sistemində köklü dəyişikliklər baş vermiş və bu müddət ərzində bütün texniki-iqtisadi göstəricilər dəfələrlə yaxşılaşdırılmışdır. Yaşar müəllim istər BBTİ-d işlədiyi illərdə, istərsə də bugünki işində səmərələşdirici təklifləri ilə həmişə çalışdığı sahənin işini qabağa aparıb. O, 1981-ci ildə - hələ cavan yaşlarında olarkən Azərbaycan Respublikası Səmərələşdiricilər və İxtiraçılar Cəmiyyətinin fəxri fərmanı ilə təltif olunub. O, bütün fəaliyyət illərində olduğu kimi, bu gündə yaradıcı axtarışlarını davam etdirir və 500-dən çox texniki-səmərələşdirici təklifin və bir ixtiranın müəllifidir.

Azərbaycan Respublikasının Prezidenti Cənab İlham Əliyevin 10 aprel 2012-ci sərəncamına əsasən Yaşar Məmmədəli oğlu Həsənov “Əməkdar Mühəndis” fəxri adına layiq görülmüşdür.