Azərbaycan Milli Qəhrəmanı Xəqani Kazım Oğlu Aslanov

Xəqani Aslanov 1955-ci ildə Ağdam rayonunun Şelli kəndində anadan olmuşdur. Gənc yaşlarından hazır-cavablığı, zarafatcıllığı və mütaliəyə olan marağı ilə tanınmışdır. Orta təhsilini doğma kəndində başa vurduqdan sonra Şuşa Plan-Uçot Texnikumunda təhsil almış və oradan məzun olmuşdur. Əmək fəaliyyətinə "Şelli" sovxozunda mühasib kimi başlamışdır.

1974-cü ildə hərbi xidmətə çağırılmış, Rusiyanın Murmansk şəhərində xidmət etmişdir. 1976-cı ildə xidmətini serjant rütbəsi ilə tamamlayaraq geri dönmüşdür. Müharibəyə qədər Şelli kənd orta məktəbində hərbi hazırlıq müəllimi işləmişdir.

1991-ci ildə könüllü olaraq cəbhəyə yollanan Xəqani Aslanov Şirin Mirzəyevin rəhbərlik etdiyi 836 saylı hərbi hissənin tərkibində vuruşmuşdur. Əvvəlcə Füzuli rayonu istiqamətində gedən döyüşlərdə iştirak etmiş, göstərdiyi şücaətlərə görə rota komandiri vəzifəsinə yüksəlmişdir. O, həmçinin Xocalı soyqırımı zamanı onlarla dinc sakini düşmən mühasirəsindən xilas etmişdir.

16 iyun 1992-ci ildə Ağdərə rayonunun Sırxavənd kəndi istiqamətində gedən ağır döyüşlərdə Xəqaninin rotası mühasirəyə düşmüşdür. Döyüş yoldaşlarını mühasirədən çıxarmaq üçün təkbaşına düşmənə müqavimət göstərərək qəhrəmanlıq nümayiş etdirmişdir. Bu qanlı döyüşdən sonra o, uzun müddət itkin düşmüş hesab olunmuşdur. Lakin sonradan onun qəhrəmancasına şəhid olduğu təsdiqlənmiş və nəşi doğulduğu Ağdam rayonunun Şelli kəndində dəfn edilmişdir.

Xəqani Aslanov ailəli idi, Sadiq, Cəsarət, Müsəvi və Səməd adlı dörd oğlu yadigar qalmışdı. Oğlu Cəsarət Aslanov elektrik cərəyanı vurması nəticəsində bədbəxt hadisə nəticəsində vəfat etmişdir.

Aslanovlar ailəsi Vətən müharibəsində üç şəhid vermişdir. Xəqani Aslanovun iki qardaşı — Hasil və Vidadi Aslanovlar 23 iyul 1993-cü ildə, Ağdamın işğal olunduğu gün eyni döyüşdə qəhrəmancasına şəhid olmuşlar.

Milli Qəhrəman Xəqani Aslanovun adını əbədiləşdirmək üçün Xəzər rayonunun Binə qəsəbəsində küçələrdən birinə onun adı verilmişdir. Həmin küçədə ucaldılmış abidə-kompleks həm Milli Qəhrəmanın, həm də onun şəhid olmuş digər iki qardaşının (Hasil və Vidadi) xatirəsinə həsr olunmuşdur.

Açılış mərasimində Milli Məclisin deputatları, Suraxanı Rayon İcra Hakimiyyətinin başçısı Adil Əliyev, Xəzər Rayon İcra Hakimiyyətinin başçısı Elşən Salahov, Müdafiə Nazirliyinin rəsmi nümayəndələri iştirak etmişlər. Tədbir AzTV, ATV və Xəzər TV tərəfindən geniş işıqlandırılmışdır. Həmçinin doğulduğu Şelli kəndindəki orta məktəbə onun adı verilmişdir.

• Azərbaycan Respublikası Prezidentinin 7 dekabr 1992-ci il tarixli 350 nömrəli fərmanı ilə ölümündən sonra "Azərbaycanın Milli Qəhrəmanı" adına layiq görülmüşdür.