21 may 2025-ci ildə Azərbaycanca Vikipediyada və Vikimedia layihələrində 10 ilim tamam olur (ilk ). İlk dövrlərdə dəstəklərinə görə Sabuhi from Baku və Samrala təşəkkür edirəm.
Bu 10 il ərzində çalışmışam fəaliyyətim biryönlü olmasın və bacardıqca müxtəlif yönlərdə (inzibati, texniki, qayda, məqalə) töhfə verməyə çalışmışam. 2018-ci ildən inzibatçı və 2022-ci ildən sonra isə bürokrat kimi fəaliyyət göstərirəm. İcmaya etimadlarına görə təşəkkür edirəm. Həmçinin bu müddətdə Azərbaycanca Vikipediyadan başqa müxtəlif layihələrdə lokal və qlobal töhfələrim olub.
Bu müddətdə icmanın bariz şəkildə necə dəyişdiyini izləmək ayrılıqda maraqlıdır. Düşünürəm ki, icma olaraq çox problemləri aradan qaldırmışıq və artıq sakit bir layihə qura bilmişik. Həmçinin bir çox yöndə son 5 ildə daha çox təkmilləşmişik. Təbii ki, bunlar şəxsi düşüncələrimdir.
Vikipediya vasitəsilə müxtəlif düşüncə tərzində və ideyalara sahib çox şəxs tanımışam. Müxtəlif fikirlərin icma üçün və komanda işi üçün önəmli olduğunu düşünürəm. Lakin redaktorlar müzakirə apararkən digərlərini də düşünməli və onlar üçün də rahat işləmə mühitinin olmasını nəzərə almalıdırlar. Nəzərə almaq lazımdır ki, bura könüllü bir layihədir və biz komanda şəklində icma olaraq işləyirik. Dəyərli töhfə və istifadəçi ola bilər amma əvəz olunmaz şəxs yoxdur :).
Məncə Vikipediyaya əsas töhfəni daha çox məqalə yazmaqla vermək olar. Hansı ki, yazarın əsas məqsədi oxucu üçün anlaşıqlı və keyfiyyətli məzmun yaratmaq olmalıdır. Başqa hansı səbəbdən məqalə yaratmaq olar? Məqalə sayım elə də çox olmasa da, belə düşünürəm.))) Ümumilikdə isə fəaliyyət tipindən asılı olmayaraq buradakı hər kəsin özündən başqa digərlərinə də xeyir verəcək qədər "dəyərli" olduğunu düşünürəm. İnternetdə Azərbaycan dilində məzmunu artırmaq və icma olaraq bu dildə "alternativi olmayan" bir layihəni qurub, böyütmək kifayət qədər böyük işdir. Hansı ki, qıraqdan çox adam üçün boş və mənasız görünsə belə.
Diqqətiniz üçün təşəkkürlər. Turkmen müzakirə 09:06, 16 may 2025 (UTC)