Zehraqurbet

Zəhra Qürbət (əsl soyadı Talıbova) Bakı şəhərində ziyalı ailəsində doğulub. Tanınmış teatr xadimi, Azərbaycan Akademik Milli Dram Teatrında uzun illər fəaliyyət göstərmiş Qürbət Qurbanovun nəvəsidir. Orta təhsilini Yasamal rayonu 172 saylı orta məktəbdə alıb. 1998-2002-ci illərdə Azərbaycan Dövlət Mədəniyyət və İncəsənət Universitetinin Rejissorluq fakültəsinin "Dram rejissoru" ixtisası üzrə xalq artisti Cənnət Səlimovanın kursunda təhsil alıb. 2003-2005-ci illərdə eyni ixtisas üzrə magistr dərəcəsinə yiyələnib. Universitetin 3-cü kursundan etibarən (2000-ci ildən) əməkdar incəsənət xadimi, mərhum rejissor Hüseynağa Atakişiyevin rəhbərlik etdiyi Dövlət Gənclər Tearında rejissor assistenti kimi fəaliyyətə başlayıb. 20-dən artıq tamaşada ikinci rejissor kimi çalışıb. 2001-ci ildən həmin teatrda quruluşçu rejissor, 2002-ci ildən isə paralel olaraq truppa müdiri vəzifəsində fəaliyyət göstərib. Dövlət Gənclər Teatrının səhnəsində 2001-ci ildə Firuz Mustafanın "Tabut", 2002-ci ildə Rüstəm İbrahimbəyovun "Qum üzərində ev", 2004-cü ildə isə Batislav Nuşiçin "Nazirin xanımı" əsərlərinə quruluş verib. Teatrla paralel olaraq 2001-ci ildən LİDER TV-də televiziya fəaliyyətinə başlayıb. Həmin ildə bu kanalda yayımlanan "X-X ŞOU" verilişinin müəllif və aparıcısı olub. Daha sonra isə LİDER TV-nin dublyaj redaksiyasında fəaliyyət göstərərək bir neçə seriallar səsləndirib. 2005-ci ildən İctimai Televiziya və Radio Yayımları Şirkətində müəllif və aparıcı kimi fəaliyyət göstərib. Azərbaycan teleməkanında ilk akyorluq müsabiqəsi olan "Telesəhnə" verilişinin təşkilatçısı və aparıcısı olub. 2006-cı ildən teatrdan uzaqlaşaraq sırf televiziya fəaliyyətinə başlayıb. 2007-ci ilin may ayından Azərbaycan Televiziyası və Radio Verilişləri QSC-də redaktor vəzifəsində çalışır. Burada yayımlanan "Komediyalar aləminə səyahət" və "Amfiteatr" verilişlərinin müəllif və redaktorudur.