Tair Eynullayev
Tahir Ramiz oğlu Eynullayev 7 yanvar 1975-ci ildə Bakı şəhərində anadan olmuşdur. 6 yaşında ikən “Cücələrin” ansamblının üzvü olmuşdur. Professional səhnəyə 7 yaşında Sovet İttifaqı KP MK-nın Baş katibi Leonid Brejnevin Bakıya səfəri zamanı keçirilən Dövlət tədbirində olmuşdur.
7 yaşında həmçinin, Moskva şəhərində keçirilən II Ümumittifaq Xalq Yaradıcılığı müsabiqəsinin laureatı olaraq diplom və medalla təltif olunmuşdur.
1993-cü ildə xalq artistləri Leyla Vəkilova və Xumar Zülfüqarova, Yusif Qasımovun sinfi üzrə Bakı Xoreoqrafiya məktəbini bitirmişdir.
Tahir Eynullayev xarakterik dünya xalq rəqsləri ifaçısıdır. Azərbaycan Dövlət Mahnı və Rəqs ansamblında, Dövlət Rəqs ansamblında, R.Behbudov adına Dövlət Mahnı teatrında işləmişdir.
1992-ci ildə Türkiyənin Bursa şəhərində keçirilən “Gənc istedadlar” beynəlxalq müsabiqəsində laureat adını qazanmışdır. 1996-cı ildə İsveçdə keçirilən beynəlxalq müsabiqədə I yerə layiq görülmüşdür.
1999-ci ildə Azərbaycan Dövlət Mədəniyyət və İncəsənət Universitetini bitirmışdır. 1996-2021 illərdə Azərbaycan Milli Konservatoriyası tərkibində İncəsənət Gimnaziyasının Xoreoqrafiya şöbəsinin müəllimi, 2010-ci ildən şöbə müdiri kimi fəaliyyət göstərir. Eynullayev Tahir 2004-2010-cü illərdə Azərbaycan Dövlət Mədəniyyət və İncəsənət Universitetinin Səhnə hərəkəti və Xoreoqrafiya sənəti kafedrasında müəllim vəzifəsində çalışmışdır.
Tahir Eynullayev Azərbaycan Respublikası Mədəniyyət və Turizm Nazirliyinin təşəbbüsü ilə xarici dövlətlərdə Azərbaycan mədəniyyətiyəti günlərinə həsr olunmuş tədbirlərdə dəfələrlə iştirak etmişdir. Tahir Eynullayevin səhnə fəaliyyəti davam edir, o əsasən xeyriyyə konsertlərində, televiziya çəkilişlərində və Dünyanın bir çox səhnələrində böyük uğurla solo-rəqqas kimi çıxış edir.
Tahir Eynullayev rejissorluq fəaliyyəti ilə də məşğul olur. O, Ə.Dilbazinin yubiley konsertlərinin quruluşcu rejissoru olmuşdur: 1997-ci ildə Mahnı teatrında, 1998-ci ildə Şəhriyar adına Mədəniyyət mərkəzində və 2000 -ci ildə Opera və Balet teatrında keçirilən Dövlət konsertində quruluşcu baletmeyster kimi çıxış etmişdir.
Türkiyə, Kipr, Şotlandiya, İngiltərə, Rusiya, Danimarka, İsveç, Norvec, Amerika Birləşmiş Ştatları, Misir, Gürcüstan, Litvada konsert proqramları ilə çıxış etmişdir.
1993-cü ildən hal-hazırkı günə qədər müxtəlif televiziya çəkilişlərində də iştirak edir.
1996-cı ildə Respublika İncəsənət Gimnaziyasının nəzdində "Günel" qızlar rəqs ansamblını yaradır, az müddətdə ansambl müxtəli Dövlət konsertlərində, televiziya çəkilişlərində,beynəlxalq müsabiqələrində böyük uğurlarla çıxış edib. 2006-ci ildə ansambl fəaliyyətini dayandırmışdır.
Tahir Eynullayev 2002-2004-cü illərdə Sankt-Peterburq Dövlət Teatr Akademiyasının rejissor-baletmeyster ixtisası üzrə aspiranturanı bitirmişdir.
T.Eynullayev Sankt-Peterburq şəhəri 32 saylı uşaq evində dərs deyib və uşaqların əqli-estetik tərbiyəsində gördüyü əvəzedilməz işə görə “Sozvezdiye-2003” festivalında fəxri – fərmanla təltif olunmuşdur.
Tahir Eynullayev eyni zamanda “Lenkonsert” konsert birliyində solist-rəqqas kimi işləyir, bir çox dövlət, xeyriyyə, bayram və seçkiqabağı konsertlərində yaxındam iştirak etmişdir. Bu tədbirlər arasında aşagıdakıları göstərə bilərik;
-Rusiya Prezidenti V.V.Putinin və Ümummilli lider H.Ə.Əliyevin iştirakı ilə “Nizami Gəncəvi” heykəlinin Sankt-Peterburqda açılışı :
-Sankt-Peterburq şəhərində Ümummilli Lideri Heydər Əliyevin 80-illiyinə həsr olunmuş yubiley konserti,
-V.V.Putinin Prezidentliyə namizədliyinin seçkiqabağı konsert tədbirlərində iştirak etmişdir.
Əvəzedilməz rəqqas Mahmud Esembayeva həsr olunmuş xatirə gecəsində Ə.Dilbazinin “Turac” rəqsini böyük uğurla ifa etmişdir və o andan Tahir Eynullayevi Mahmud Esembayevin davamçısı kimi elan edirlər. Tahir Eynullayev “Lenkonsert” birliyi və “Sozvezdiya plüs” konsert birliyi ilə Sankt-Peterburqun tanınmış incəsənət xadimləri ilə Rusiyanın bir çox şəhərlərində qastrol səfərlərində Azərbaycanlı rəqqas kimi çıxış etmişdir.
Tahir Eynullayev Sankt-Peterburqda Azərbaycan Respublikasının Fəxri Konsulluğunda mədəniyyət üzrə fəxri konsulun köməkçisi vəzifəsində çalışıb. İşlədiyi müddət “Çinar” rəqs ansamblını yaradır, Q.Qarayevə, F.Əmirova, Maestro Niyaziyə həsr olunmuş xatirə gecələrini təşkil etmişdir.
Sankt-Peterburqda təhsil aldığı müddətdə bir çox mükafatlar, fəxri-fərmanlar və tərifnamələrlə təltif olunmuşdur. Həmçinin Teatr Akademiyasının tədris teatrında Beynəlxalq Rəqs günü münasibəti ilə 29 aprel 2004-cü ildə solo və diplom işi ilə konsert proqramı ilə çıxış etmişdir.
Tahir Eynullayev Azərbaycan Respublikası Təhsil İşçiləri və Tələbələrin Xeyriyyə fondunun və Azərbaycan Dövlət Teleradio şirkətinin, təhsildə və sənətdə əldə etdiyi uğurlarına görə Fəxri Fərmanla təltif olunmuşdur.
2017-ci ildə Tahir Eynullayev Azərbaycan Respublikası Təhsil Nazirliyinin “Təhsilin inkişafındaki xidmətlərinə, gənc nəslin təlim-tərbiyəsi sahəsində yüksək nailiyyətlər əldə etdiyinə görə” Fəxri Fərmanla təltif olunmuşdur.
Həm Sankt-Peterburq səhnəsində, həm də Azərbaycanda, Tahiri məşhur Mahmud Esembayevin davamçısı kimi elan edirlər: ”XXI əsrin Esembayevi”. Bakıda Tahir birinci rəqqasdır ki, dünya xalqlarının xarakterik rəqslərini solo şəklində ifa edir. Tahir Eynullayev həmçinin müxtəlif Dövlət teatrlarınıın tamaşalarında baletmeyster kimi çalışıb:
-İrəvan Azərbaycan Dövlət teatrında Molyerin “Məcburən Doktor” komediyası;
-.Azərbaycan Dövlət Rus Dram teatrında Nizaminin “7 gözəl” tamaşası;
-Yaradıcılıq birliyinin Sönməyən Ulduzlar teatrında Ü.Hacıbəylinin “Ər və arvad” tamaşası;
-Litva Dövlət Rus dram teatrı (Vilnüs şəhəri) ”7 gözəl” tamaşası;
-İncəsənət Gimnaziyasının şagirdləri ilə Tofiq Quliyevin “Bizim Kəndimiz” rəqs-müzikl tamaşası;
-Qara Qarayevin “7 gözəl” baletinin əsasında “Fantasmaqoriya” tamaşasının rejissoru və quruluşçu-baletmesteri olub.
Tahir Eynullayev İncəsənət Gimnaziyasında rəqs sənətinin tanınmış simalarının bir çoxu ilə Sənət görüşləri, yubileylər, xatirə gecələri keçirib.
Tahir Eynullayev Gənclər və İdman Nazirliyinin Gənclər Təşkilatının yaratdığı, “7gözəl” müsabiqəsinin, Azərbaycan Təhsil Nazirliyinin təşkil etdiyi incəsənət müsabiqələrində, Azərbaycan Rəqs assosiyasının müsabiqələrində, Gürcüstanda keçirilən Vaxtanq Cabuakiani adina Xoreoqrafiya müsabiqəsinin ,Beynalxalq Antalya Uşaq və Gənclər Balet Festival-Müsabiqəsində münsiflər heyətinin daimi üzvüdür.
2016-cı ilin mayın 1-də R.Behbudov adına Azərbaycan Dövlət Mahnı teatrında Tahir Eynullayev öz Benefis müzikl tamaşasının premyerasını təqdim etdi
2018-ci ildə Azərbaycanda “Broadway story” adlı ilk Müzikl tamaşasında baş rolu ifa edib.
2018 və 2019-cu illərdə VII və VIII Sankt-Peterburq Beynəlxalq Mədəniyyət Forumlarının iştirakçısı və məruzəçisi olub Xoreoqrafiya sənəti üzrə.
Tahir Eynullayev bir neçə rəqs kitablarının müəllifidir və müxtəlif tədris bülletenlərində məqalələri dərc olunur :
Məqalələrin siyahısı
1.Азербайджанский народный танец (rus dilində )- газетa Азери (Sankt-Peterburq ) N=1-2 (13)yanvar /fevral 2003
2.Египетский танец – как составная часть народно – характерного тренинга (rus dilində )referat – kitab (Bakı -2008)
3.Əminə Dilbazinin – həyat və yaradıcılığı – Musiqi dünyası 3-7/37-2008 (Bakı)
4.Azərbaycan xalq rəqsinin şahzadəsi –Bona Mente jurnalı (02-2009-Bakı)
5.İlk addımın əbədi təntənəsi –Qəmər Almaszadə -525 qazet 4 mart 2011-ci il
6.Tahir Eynullayev, Our dances. Azerbaijan Review, international , tourist magazine, 01 (58), 2003,p.94-100)
7. VIII.Uluslararası Türk Kültürü, Sanatı ve Kültürel Mirası koruma sempozyumu/ sanat etkinlikleri. Tahir Eynullayev Azərbaycan Xalq Rəqslərinin yaranması və inkişafı. (885 səh Konya- Türkiye 2016 il)
8. “Rəqsin Dili” kitabı (Bakı 2018)
2008-ci ildən T. Eynullayev Yeni Azərbaycan Partiyasının üzvüdür.
2014-cü ildə ABŞ-nın Nyu-York şəhərində keçirilən “Biq Apple Music Awards Foudation” təsis etdiyi İlin Rəqqası adını qazanmışdır.
2020 ilin fevral ayından Tahir Eynullayev ekspert olaraq Azərbaycan Respublikası Təhsil Nazirliyinin Təhsildə keyfiyyət təminatı agentliyinin yaratdıgı komissiyanın üzvüdür.
2020 ilin, noyabrın 30-da, Tahir Eynullayev, Azərbaycan Milli Xoreoqrafiya sənətinə etdiyi tövhəyə görə “HUMAY” Milli Mükafatı ilə təltif edilmişdir.
2021 ilin, yanvar ayından Tahir Eynullayev Azərbaycan Televiziyasının, Mədəniyyət kanalında yayımlanan ,,Rəqslərimiz,, adlı yeni verilişinin məsləhətçisi və aparıcısıdır.
01 aprel 2021 il tarixindən Bakı Xoreoqrafiya Akademiyasının Orta ixtisas təhsil pilləsinin direktor vəzifəsinə təyin olunub.