Svetlana Hajiyeva
Beynəlxalq Xəzər Neft və Qaz sərgi və Konfransı "CASPIAN OIL & GAS" - Müstəqil Azərbaycanın ilk ticarət sərgisdir.
İlk Beynəlxalq Xəzər Neft və Qaz “Caspian Oil and Gas” sərgi və Konfransı Bakı şəhərində 1994-cü ilin may ayında, “Əsrin Müqaviləsinin” imzalanması (sentyabr, 1994-cü il) ərəfəsində keçirilmişdi. “Əsrin Müqaviləsi” Xəzər dənizi hövzəsinin karbohidrogen resurslarının genişmiqyaslı mənimsənilməsinin əsas istiqamətlərini təyin etmiş və Respublikamızın neft tarixində yeni epoxaya start vermişdir. Banisi ümummilli liderimiz Heydər Əliyev olan bu möhtəşəm layihə 25 il bundan əvvəl başlayanda, Azərbaycan bir çox dünya ölkələri və şirkətləri üçün qlobal əməkdaşlığın simvoluna çevrildi. Yarandığı gündən 25 il ərzində uğurla inkişaf etmiş sərgi bütöv regionun yanacaq-enerji kompleksinin əsas hadisəsinə çevrilmişdir. Neft, qaz və energetika sahəsində işləyən aparıcı peşəkarların görüş yerinə çevrilmiş Xəzər Nefti və Qazı sərgisində memorandumlar, sazişlər və gələcək əməkdaşlığa dair müqavilələr imzalanır, istehsalçı və sifarişçilər arasında əlaqələr yaradılır və, nəticədə, ölkədə yeni zavodlar və ən iri şirkətlərin nümayəndəlikləri açılır. Keçirildiyi illər ərzində sərgidə dünyanın 70-dən çox ölkəsindən 7000-dən çox şirkət iştirak etmişdir. Sərginin bütöv tarixi boyunca ölkə Prezidentinin himayəsi altında keçirilməsi bu tədbirin yüksək statusunu möhkəmləndirir.Sərginin təntənəli açılış mərasimində Azərbaycan Respublikası Prezidentinin iştirak etməsi sərginin yüksək statusunu daha da möhkəmləndirir. Müxtəlif ölkələrin liderləri, o cümlədən Böyük Britaniya, Türkiyə və Norveçin baş nazirləri, ABŞ, Fransa və Gürcüstanın prezidentləri, habelə Avropa İttifaqının prezidenti növbəti sərgi və konfransın açılışı münasibətilə Azərbaycanın Respublikasının rəhbərinə öz salamlama məktublarını göndərirlər. Azərbaycan Respublikası Energetika Nazirliyi və SOCAR isə bu sərginin inkişafı naminə öz əvəzsiz töhfələrini əsirgəmirlər. Sərgi və Konfransın təşkilatçıları qismində “Iteca Caspian” və “ITE Group” şirkətləri çıxış edirlər.