Rəsul Mirhəşimli
Rəsul Mirhəşimli 1968-ci ildə Qubadlı rayonunda anadan olub. 1985-ci ildə Qara İlyasov adına Qubadlı şəhər 1 saylı orta məktəbini bitirib. 1986-88-ci illərdə sovet ordusu sıralarına hərbi xidmətdə olub. 1991-ci ildə Sumqayıt Politexnik Texnikumunu, 2000-ci ildə Bakı Dövlət Universitetinin filologiya fakültəsini bitirib. 1993-cü ildən Azərbaycan mətbuatında çalışır. Jurnalistlik fəaliyyəti zamanı Azərbaycanda nəşr olunan müxtəlif mətbuat orqanlarında müxbir, parlament müxbiri, redaktor və baş redaktor vəzifələrində işləyib. “Cümhuriyyət”, “Məkan”, “Üç nöqtə”, “Mərkəz” qəzetlərində “Qafqazinfo” saytında çalışıb. Qafqaz Müsəlmanları İdarəsində (QMİ) şöbə müdirinin müavini, eyni zamanda, QMİ-nin nəşri olan “İslam” qəzetinin baş redaktoru vəzifəsində işləyib. 2012-ci ildən Avropa.info[1] Xəbər Portalında baş redaktor vəzifəsində işləyir. Qarabağ uğrunda gedən döyüşlərdə Azərbaycan Ordusunun sıralarında Qubadlı rayonunun müdafiəsində, Laçın rayonunun işğaldan azad edilməsi ilə bağlı keçirilən əməliyyatlarda iştirak edib. Azərbaycan mətbuatında araşdırmaçı-jurnalist olaraq tanınır. Çalışdığı müddət ərzində müxtəlif tədbirlərdə Bolqarıstanda, Türkiyədə Azərbaycan mətbuatını təmsil edib. Qarabağ münaqişəsi ilə bağlı məqaləsi Vaşinqtonda Azərbaycan diasporunun nəşr etdirdiyi jurnalda çap olunub. Bu illər ərzində Azərbaycan telekanallarında, internet televizaylarında və müxtəlif mətbuat orqanlarında araşdırmaçı-ekspert olaraq dəvət olunub, müxtəlif məsələ və problemlərə düşüncələrimi açıqlayıb. Müxtəlif illərdə yazdığı araşdırma yazılarını 2005-ci ildə ayrıca kitab şəklində nəşr etdirib. 2013-cü ildə Azərbaycanın dahi mütəfəkkiri Şəmsəddin Təbrizinin "Məqalat"[2] əsərini dilimizə tərcümə edib.