Rüfət Muradlı
Rüfət Habil oğlu Muradlı 1971-ci ildə Salyan şəhərində anadan olmuşdur. 1987-ci ildə Salyan şəhər 4 saylı orta məktəbi bitirdikdən sonra Bakı Maliyyə-Kredit Texnikumunun Hüquqşünaslıq ixtisasına daxil olmuş, 1990-cı ilədək orada təhsil almışdır.Həmin ildən Salyanda hüquq məsləhətçisi kimi fəaliyyət göstərmiş və eyni zamanda müstəqillik uğrunda gedən Xalq Hərəkatında da geniş iştirak etmişdir.1992-ci ilin iyulunda iqtidarın kadr siyasətinə etiraz olaraq AXC sıralarından istefa verən Rufət Muradlı həmin il Məhəmməd Əmin Rəsulzadə adına Bakı Dövlət Universitetinin Hüquq Fakültəsinə daxil olmuş və 1992-97-ci illərdə orada təhsil almışdır.Rüfət Muradlı 1999-2012-ci illərdə ailə vəziyyəti ilə əlaqədar Tehran şəhərində yaşamış,həmin müddətdə də İran DTRT-da Azərbaycan dilində yayımlanan sərhədaşırı televiziyada aparıcı-redaktor kimi çalışmışdır. İİR-da yaşadığı dönəmdə Güney Azərbaycanda milli-mədəni mübarizə aparan fəallarla yaxından tanış olan Rüfət Muradl bu prosesin iştirakçısı da olmuşdur. İran televiziyasında işlədiyi dönəmdə siyasi baxışlarına görə təqiblərə məruz qalan Rüfət Muradlı 2012-ci ildə Azərbaycana dönərək aktiv siyasi fəaliyyətə başlayır. Əvvəllər də üzvü olduğu Ümid Partiyasında Xaricdə yaşayan soydaşlarımızla iş üzrə sədr müavini təyin edilən Rüfət Muradlı əsas fəaliyyətini Güney Azərbaycanda soydaşlarımızın apardığı mübarizəyə yardım istiqamətində quraraq dünyaya səpələnən 50 milyona yaxın soydaşımızla bağlı aktiv fəaliyyətə başlayır. Bu yöndəki fəaliyyətlərinə görə İranın bəzi şovinist mahiyyətli saytlarının hədəfinə tuş gələn Rüfət Muradlı daim İrandakı həqiqətlərin obyektiv şəkildə dünya ictimaiyyətinə çatdırılmasına çalışmışdır. O, 2014-cü ilin iyununda Ümid Partiyasının İctimaiyyətlə əlaqələr və Xaricdə yaşayan soydaşlarımızla iş üzrə sədr müavini təyin olunduqdan sonra da Dünya Azərbaycanlıları ilə bağlı çalışmalarına davam etməkdədir. Rüfət Muradlı 2015-2019-cu illərdə Borçalı Cəmiyyətinin İH-nin üzvü olmuş, 2013-cü ildən Bütöv Azərbaycan Ocaqları Mərkəzi Şurasının, 2020-ci ilin avqust ayından Milli Hərəkatçılar Birliyinin üzvüdür. O,2013-cü ildən Azərbaycanın ilk internet televiziyası olan Kanal13-də soydaşlarımızın məsələlələrini əhatə edən "Soydaş" proqramının yaradıcısı və aparıcısı olub. Hal hazırda həmin kanalda "Rüfət Muradlı ilə 24 dəqiqə" və Açıq Söz" proqramlarının da aparıcı-müəllifidir.