Qumru Abdullazade

Harald Hårfagre

Təxminən 900-cü illərdə Norveçin cənub-şərqində Harald Hårfagre (qədim norveçcə: Haraldr hárfagri) adlı bir kral yaşayırdı. O zamanlar Harald yalnız Norveçin cənub-şərq hissəsində hakimiyyətə sahib idi. Haralddan əvvəl Norveç kiçik krallıqlardan ibarət idi. Onun Norveçi birləşdirməsi ilə bağlı bir rəvayət mövcuddur.

Bir gün Harald ölkənin qərbinə sahib olan kralın qızı, gözəl Gyda üçün elçilərini göndərir. Lakin Gyda bu evlilik təklifini qəbul etmir və deyir:

“Mən kiçik bir ərazinin kralına ərə getmərəm. Necə olur ki, Danimarka və İsveç kimi ölkələr birləşib vahid dövlət halına gəlib, amma Norveç hələ də xırda krallıqlara bölünüb? Niyə Norveçi birləşdirəcək güclü bir kral hələ də yoxdur? Mən yalnız Norveçi vahid ölkə kimi birləşdirən güclü bir krala ərə getməyə razı olaram.”

Elçilər, bu cavabla kralın yanına peşman halda qayıdırlar və Gyda-nı zorla qaçırmağı təklif edirlər. Lakin kral bu fikirlə razılaşmır və deyir:

“Gyda əslində mənə çox gözəl bir fikir verdi. Nədənsə bu barədə daha əvvəl düşünməmişdim.”

Həmin gündən etibarən Harald özünə söz verir ki, Norveçi bir dövlət kimi birləşdirəcək. O həmçinin and içir ki, bu məqsədinə çatmayınca nə üzünü qırxacaq, nə də saçını darayacaq. O bu sözünü yerinə yetirir və nəticədə Norveç vahid dövlət halına gəlir. Beləliklə, Harald vahid Norveçin ilk kralı olur. Gyda isə söz verdiyi kimi, ona ərə gedir.