Qələndər Aslanov
Aslanov Qələndər Asdan oğlu 1975-ci ildə Qərbi Azərbaycanın Göyçə mahalının Nərimanlı kəndində anadan olub. 1992-ci ildə Respublika Olimpiya Ehtiyatı Məktəbinin 11-ci sinifini bitirmişdir. 1993-cü ildə həqiqi hərbi xidmətə çağırılmışdır. Qarabağ uğrunda gedən döyüşlərin iştirakçısı, müharibə veteranıdır. 1997-ci ildə hərbi xidmətdən tərxis olunmuş, 1998-ci ildə Azərbaycan Dövlət Pedaqoji Universitetinin (ADPU) İlkin Hərbi və Fiziki Təlim fakultəsinə daxil olmuş, 2002-сi ildə Universiteti fərqlənmə diplomu ilə bitirmişdir.
2003-cü ildə Binəqədi rayon 83 nömrəli məktəbdə fiziki tərbiyə müəllimi vəzifəsinə təyin olunmuşdur. 2004-cü ildən Azərbaycan Tibb Universitetinin bədən tərbiyəsi və idman kafedrasında müəllim, 2017-ci ildə Stomatologiya fakültəsinin akademik məsləhətçisi, 2021-ci ildən Azərbaycan Tibb Universitetinin "Təbib" idman klbunun sədri vəzifəsində çalışır.
2009-2012-ci illərdə Ukraynanın Kiyev şəhərində Regionlararası Heyətin İdarəolunması Akademiyasında (MAUP) "Praktiki Psixologiya" üzrə Magistr təhsili almışdır.
2015-ci ildə Ukraynaın Luqansk şəhərində Taras Şevçenko adına Dövlət Universitetində Aspiranturaya daxil olmuşdur. 2017-ci ildə elmi işini yekunlaşdırıb müdafiə etmişdir.
Universitetin Həmkarlar İttifaqı Rəyasət heyətinin üzvüdür.
2008-2018-ci illərdə Təhsil Nazirinin əmri ilə orta ümumtəhsil məktəblərində Kurikulum əsasında Dərsliklərin Qiymətləndirilmə Şurasının tərkibində Fiziki tərbiyə fənni üzrə "Dərslik" və “Müəllim üçün Metodik Vəsait”in qiymətləndirilməsində ekspert qrupunun üzvü işləmişdir.
15-dən çox elmi məqalənin, 1 monoqrafiyanın, 1 tədris proqramının müəllifidir. Dövri mətbuatda İdmanın insan həyatındakı rolu mövzusunda bir çox çıxışları olub.
2012-ci ildə Respublika üzrə keçirilən “Ən Yaxşı Müəllim” müsabiqəsinin qalibi olmuşdur.
2012-ci ildə Binəqədi rayonunda “İlin Ən Yaxşı İdman Müəllimi” Fəxri Fərmanı ilə təltif olunmuşdur.
1985-1995-ci illərdə idmanın Yunan Roma güləşi ilə məşğul olmuşdur. SSRİ idman ustası adına layiq görülmüşdür. 1995-ci ildən isə Kyokuşin karate (Mütləq Həqiqət) tam kontaktlı döyüş növü ilə məşğul olur. Məşğul olduğu müddətdə bir çox uğurları olub. Dəfələrlə Azərbaycan çempionu, müxtəlif beynəlxalq yarışların qalibi, Avropa və dünya çempionatlarının iştirakçısı və mükafatçılar sırasında olub.
2007-ci ildə təcrübə mübadiləsi və idman dərəcəsinin artırılması məqsədilə beynəlxalq seminarda 30 fasiləsiz ardıcıl döyüşlər keçirmişdir. Beynəlxalq Kyokuşin-kan karate təşkilatının Azərbaycanda rəsmi nümayəndəsi, "Samuray" idman klubu ictimai birliyinin sədridir. Beynəlxalq dərəcəli hakim, IV Dan qara kəmər ustasıdır. Azərbaycanda dəfələrlə Respublika turnirləri, kubok yarışları və beynəlxalq turnirlər keçirmişdir. Yetirmələri arasında Avropa və dünya çempionları vardır.
2012-ci ildə Avropanın “Ən Yaxşı Hakimi” adına layiq görülmüşdür.
2015-ci ildə Azərbaycan Respublikasının "Əməkdar Məşqçisi" fəxri adına, 2021-ci ildə "Fədai" və "Böyük Zəfər" medallarına layiq görülmüşdür.
Ailəlidir, bir övladı var.