İstifadəçi:Qələmİzi/Qaralama

Səfərəliyev Bəhman Çərkəz oğlu (10 yanvar 1961, Pircahan, Laçın rayonu, Azərbaycan SSR — 19 sentyabr 1992, Hoçaz yüksəkliyi, Laçın rayonu, Azərbaycan) — Birinci Qarabağ müharibəsi zamanı şəhid olan azərbaycanlı döyüşçü.

Səfərəliyev Bəhman Çərkəz oğlu 10 yanvar 1961-ci ildə Azərbaycan SSR-in Laçın rayonunun Pircahan kəndində anadan olmuşdur. 1968–1976-cı illərdə Pircahan kənd orta məktəbində təhsil almışdır. 1976–1978-ci illərdə təhsilini Şuşa şəhərindəki Texniki Peşə məktəbində davam etdirmişdir.

1979–1981-ci illərdə Sovet Ordusu sıralarında Rusiyanın Xabarovski vilayətində həqiqi hərbi xidmətdə olmuşdur.

Hərbi xidməti başa vurduqdan sonra doğma Pircahan kəndinə qayıdaraq ailə həyatı qurmuşdur. Daha sonra ailəsi ilə birlikdə Bakıya köçmüş və burada Qanköçürmə İnstitutunda sürücü işləmişdir. Bir müddət sonra yenidən Laçın rayonu Pircahan kəndinə qayıdaraq müxtəlif işlərlə məşğul olmuşdur.

Evli idi, iki oğlu və bir qızı var.

1992-ci il mayın 18-də Laçın rayonu Ermənistan silahlı birləşmələri tərəfindən işğal olunduqdan sonra, ailəsini Bakının Xırdalan qəsəbəsində yerləşdirərək böyük qardaşı Səfərəliyev Mehman Çərkəz oğlu və kiçik qardaşı Səfərəliyev Rəhim Çərkəz oğlu ilə birlikdə könüllü olaraq 713 saylı hərbi hissənin tərkibinə qoşulmuş və doğma torpaqların müdafiəsinə yollanmışdır. Xidməti dövründə müxtəlif döyüş əməliyyatlarında iştirak etmişdir.

1992-ci il sentyabrın 19-da Laçın rayonu Hoçaz yüksəkliyi uğrunda gedən döyüşlərdə, yaralı əsgərlərin döyüş zonasından çıxarılması zamanı UAZ markalı nəqliyyat vasitəsilə xüsusi rəşadət göstərmiş və bir sıra əsgərlərin həyatını xilas etmişdir. Sonuncu təxliyə əməliyyatı zamanı iki döyüş yoldaşını xilas edib Hoçaz yüksəkliyindən qayıdarkən idarə etdiyi avtomobil mina partlayışına məruz qalmışdır. Bir ayağını itirən Bəhman Səfərəliyevə qardaşı və döyüş yoldaşları ilkin tibbi yardım göstərib onu səyyar tibb məntəqəsinə çatdırsalar da, kəskin qan itkisi səbəbindən həyatını xilas etmək mümkün olmamışdır.

Səfərəliyev Bəhman Çərkəz oğlu Bakı şəhərindəki Şəhidlər Xiyabanında dəfn edilmişdir. Döyüş yoldaşları tərəfindən nəşinin bir hissəsi Hoçaz yüksəkliyində torpağa tapşırılmışdır. Hazırda Pircahan kənd orta məktəbi onun adını daşıyır.

1. "Laçın rayonunun şəhidləri", Azərbaycan Respublikası Müdafiə Nazirliyi, 2018, səh.34
2. "Azərbaycanın şəhid övladları", Şəhid Ailələrinə Dəstək İctimi Birliyi, Bakı, 2015, səh.127
3. "Qarabağ döyüşlərininin unudulmaz qəhrəmanları", Azərbaycan Tarix Jurnalı, № 3, 2019, səh. 45–46
4. "Laçın rayonunun Pircahan kəndinin şəhidləri", Laçın Rayon İcra Hakimiyyətinin nəşri, 2017, səh. 12
5. "Birinci Qarabağ müharibəsinin könüllüləri", Hərbi Nəşriyyat, Bakı, 2016, səh. 89
6. "Hoçaz döyüşləri xatirələrdə", Veteranlar Assosiyası, 2020, səh. 56–57
7. "Şəhidlərimizin məzarları", Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti. 2019, səh. 73
8. "Azərbaycan məktəbləri şəhidlərin adını daşıyır", Təhsil Nazirliyi nəşri, 2021, səh. 42