Niftiyev Azer

Niftiyev Azər Ağaddin oğlu 1981-ci il iyul ayının 25-də Bakı şəhərində anadan olub. 1998-ci ildə Bakı şəhəri 29 saylı orta məktəbini, 2002-ci ildə Bakı Dövlət Universitetini (BDU) bakalavr, 2004-cü ildə isə magistr dərəcələri üzrə bitirib.

1997-2002-ci illərdə aktiv ictimai fəaliyyətlə məşğul olub. Ölkəmizin aparıcı gənclər təşkilatlarında rəhbər vəzifələr daşıyıb. “Yeni Nəsil” Gənclər Birliyinin sədri, Gənclər Təşkilatları Milli Şurasının məclis üzvü olub. Mətbuatda müəllif yazıları ilə çıxış edib.

2005-ci ilin aprelindən peşəkar jurnalist kimi fəaliyyət göstərir. 2005-2011-cu illərdə "Yeni Müsavat", "Gündəlik Azərbaycan", "Yeni Zaman", "Novoye Vremya" qəzetlərində jurnalist, şöbə müdiri, redaktor işləyib. Azər Niftiyev 2011-ci ildən internet media sahəsində təmsil olunur. Müxtəlif dövrlərdə Qaynar.info, Aktual.az, Anv.az, Sosium.az informasiya portallarına rəhbərlik edib. Azərbaycanda ilk maarifləndirici tibbi informasiya resurslarını - Tebib.az və Klinik.az portallarını təsis edib. Day.az, Milli.az, Publika.az, Azxeber.com portalları ilə əməkdaşlıq edib. Mətbuatda minlərlə məqaləsi dərc edilib.

Trend informasiya agentliyində baş redaktor müavini vəzifəsində çalışıb. “Ayna-Zerkalo” qəzetinin analitik yazarı və Sosial Media Mərkəzinin direktorudur. Rəhbəri olduğu Sosial Media Mərkəzi nazirliklərin, aparıcı dövlət qurumlarının, Milli Məclisin deputatlarının, parlament seçkilərində deputatlığa namizədlərin, özəl şirkətlərin, fərdi şəxslərin PR kampaniyalarını təşkil edib. Bir neçə millət vəkilinin mətbuat məsələləri üzrə köməkçisi olub. Azərbaycan Jurnalistlər Birliyinin İdarə Heyətinin üzvüdür.