Həlletmə üzrə 40-cı dünya çempionatı

2016-cı il iyulun 30-dan avqustun 6-dək Serbiyanın paytaxtı Belqrad şəhərində keçirilən 59-cu Ümumdünya Şahmat Bəstəçiliyi Konqresində ölkəmizi 6 şahmatçı təmsil edib: baş məşqçi İlham Əliyev (Sumqayıt), həlletmə üzrə 8-ci Azərbaycan çempionu Araz Alməmmədov (Qəbələnin Vəndam kəndi), həlletmə üzrə 9-cu Azərbaycan çempionu Aqşin Məsimov, beynəlxalq qrossmeyster Zaur Məmmədov, Rəşad Zeynallı (hər üçü Bakı) və Elmar Abdullayev (Şirvan).

Avqustun 1-də 119 şahmatçının starta çıxdığı açıq birincilikdə – "Open-turnir"də həllçilərimiz arasında ən yaxşı nəticələri A.Alməmmədov (28,3 xalla 23-cü yer) və A.Məsimov göstəriblər (25,5 xalla 37–38-ci yerlər). R.Zeynallı (23,5 xalla 44–45-ci yerlər) və Z.Məmmədov (19 xalla 78-79-cu yerlər) isə imkanlarından xeyli aşağı çıxış ediblər. E.Abdullayev həlledənlərimiz arasında ən zəif göstərici ilə yadda qalıb – 12 xalla 102-ci yer. Yarışın qalibləri isə polşalı Kasper Piorun (60 mümkün xaldan 48 xalla 1-ci yer), serbiyalı Vladimir Podiniç (41,6 xalla 2-ci yer) və israilli Ofer Komay (39,1 xalla 3-cü yer) olublar.

Avqustun 2-si və 3-də yubiley yarışı – həlletmə üzrə 40-cı dünya çempionatı keçirilib. A.Alməmmədov, Z.Məmmədov və R.Zeynallı şəxsi-komanda, A.Məsimov isə şəxsi birincilikdə respublikamızı təmsil ediblər. 180 mümkün xaldan 142,6 xal toplayan komandamız bu dəfə yalnız 8-ci yerlə kifayətlənib. Çempion adını isə 168,8 xalla Polşa komandası (K.Piorun, Pyotr Murdziya və Aleksandr Mista) qazanıb. Litva seçməsi (Martinas Limontas, Vidmantas Satkus və Vilimantas Satkus) 157 xalla 2-ci, Serbiya yığması (V.Podiniç, Boyan Vuçkoviç və Miodraq Mladenoviç) isə 155,8 xalla 3-cü nəticə göstərib. Şəxsi dünya çempionu adını 83,8 xalla polyak K.Piorun qazanıb (həllə 292 dəqiqə vaxt sərf edib). Ondan cəmi 1 dəqiqə çox sərf edən komanda yoldaşı P.Murdziya bu dəfə yalnız 2-ci nəticə göstərib. 3-cü yerə isə bütün həll üzrə dünya çempionatlarının iştirakçısı (40 dəfə!) Maryan Kovaçeviç (Serbiya) layiq görülüb – 79,2 xal.

Həllçilərimiz Z.Məmmədov (90 mümkün xaldan 75,9 xal) və R.Zeynallı (65,4 xal) şəxsi birincilikdə uğurla çıxış edərək rusiyalı Danila Pavlovla (65 xal) birlikdə müvafiq olaraq gənclər arasında dünya çempionatının qalibləri olublar. Qeyd edək ki, Z.Məmmədov 2 gedişə mat məsələlərinin həlli üzrə keçirilən "Solvinq-şou"nun da qalibi adını qazanıb.

Çempionatın mükafatlandırma mərasimi xüsusilə yaddaqalan olub: avqustun 5-də Dunay və Sava çayları arasında hərəkət edən gəmidə verilən banketdə qaliblərə qızıl, gümüş və bürünc medallar təqdim olunub!