Elnare Derziyeva

Elnarə Dərziyeva - (12.05.1980) Əməkar jurnalist

Elnarə Dərziyeva Tovuz rayonunda ziyalı ailəsində anadan olub.

1986-ci ildə rayonunun A.S.Puşkin adına orta məktəbinə daxil olub. Məktəb illərində E.Dərziyeva bədii yaradıcılıqla da məşğul olur və bir sıra şeirlər qələmə alır. Yazıb yaratmağa meyilli olduğundan 1996-cı ildə həmin məktəbi bitirərək Bakı dövlət Universitetinin Jurnalistika fakultəsinə qəbul olub. Universitet illərindən müxtəlif mətbuat orqanlarında çalışıb.

Jurnalistlik fəaliyyətinə 1998-ci ilin martın 5-də "Bu gün" qəzetilə başlayıb. Daha sonra "Elçi", "Faktor" qəzetlərində öz yazıları ilə tanınıb. Əsasən, sosial və kriminal sahədəki araşdırmaları ilə fərqlənib.

2001-ci il sentyabrın 1-də "Lider TV və Radio Azərbaycan" MMC-də jurnalistlik fəaliyyətinə davam edib. İctimai sosial layihə olan "Üçbucaq" verilişində müxbir vəzifəsini icra edir. Həmin vaxtdan Elnarə Dərziyeva öz müşahidə qabiliyyəti, operativliyi, kreativliyi və mövzulara fərqli baxışı ilə seçilir. Bu bacarıqları ilə daim fərqlənən E.Dərziyeva televiziya məkanında ilk kriminal layihə olan "Kriminform" televiziya verilişində fəaliyyətini davam etdirir. Veriliş gün ərzində paytaxt və bölgələrdə baş verən kriminal hadisələrlə tamaşaçılar arasında böyük rəğbət qazanıb. 2004-cü ilin mayından Elnarə Dərziyeva Lider televiziyasının "Səda" informasiya buraxılışında çalışır. Maraqlı reportajları, araşdırma sahəsində ən uğurlu materialları ilə seçilən E.Dərziyeva 2011-ci ildən bu günədək həmin televiziya kanalında prodüser vəzifəsindədir. "Lider Xəbər" departamentində müxbirlərlə iş apara xanım jurnalist indiyədək "Barkod", "Bizim Səda", "Kriminform" kimi tekevizya layihələrinə rəhbərlik edib. Milli Təhlükəsizlik və Daxili İşlər Nazirliyi sifarişi əsasında hazırladığı bir neçə sənədli filmin müəllifidi.

Jurnalist peşəsində çalışdığı 20 il müddətində nazirliklər, idarə və müəssisələr tərəfindən dəfələrlə mükafata layiq görülüb.

Bu mükafatlardan ən alisi isə 2016-cı ildə möhtərəm Prezidentimiz İlham Əliyev tərəfindən imzalanan sərəncamla "Əməkdar Jurnalist" adına layiq görülməsidi. Bundan başqa Elnarə Dərziyeva dövlət başçımızın imzaladığı digər bir sərəncamla, yəni 2017-ci ildə jurnalistlərin yaşam şəraitinin yaxşıaşdırılması məqsədi ilə 2 otaqlı mənzil mükafatına layiq görülüb.

2018-ci ildə isə Zirvə Ziyalı Təşkilatının təyin etdiyi "Best Awards-2017" - "İlin Ən Yaxşı Televiziya Jurnalist" nominasiyasına layiq görülüb.

Hazırda "Lider Televiziyası"nda fəaliyyətini davam etdirən Elnarə Dərziyevanın bir qız övladı var.