Elman Qasımov

'Qasımov Elman Şəmil oğlu

20  noyabr 1962-ci ildə Zərdab rayonunun Körpükənd kəndində anadan olmuşdur. 1978-ci ildə Zərdab rayonunun Xasa kənd 8-illik məktəbini  bitirərək Bakı şəhərindəki 1 saylı fizika-riyaziyyat təmayüllü məktəbdə təhsilini davam etdirmiş, 1980-cı ildə həmin məktəbi bitirmişdir.1980-ci ildə Moskva Poliqrafiya İnstitutuna daxil olmuş, 1985-ci ildə ali məktəbi müvəffəq qiymətlərlə tamamlamışdır. 1985-1986-cı illərdə Uzaq Şərqdə Sovet ordusu sıralarında xidmət etmişdir. Hərbi xidmətini başa vurduqdan sonra doğma Vətəninə qayıdan Elman Şəmiloğlu Mətbuat və İnformasiya Nazirliyinin “Qızıl Şərq” mətbəəsində mühəndis, sex rəisi və uzun illər baş mühəndis vəzifəsində çalışmışdır.

Elman Şəmiloğlu orta məktəb illərindən dövri mətbuatda çıxış etmişdir. Onun ilk qələm təcrübələrinə Zərdab rayonunda çıxan “Pambıqçı” və “Azərbaycan pioneri” qəzetlərində yer ayrılmışdır. Elman Şəmiloğlunun çoxlu sayda məqalələri respublikamızın bir sıra mətbu orqanlarında dərc olunmuşdur. Bir neçə ildir ki, 525-ci qəzet, “Ədalət”, “Yeni təfəkkür”, “Bütöv Azərbaycan” və s. qəzetlərlə əməkdaşlıq edir. Dövri mətbuatda səmərəli fəaliyyətinə və aktual mövzularda yazdığı məqalələrə görə geniş oxucu auditoriyasının rəğbətini qazanmışdır.

İti qələm sahibi olan Elman Şəmiloğlu həm də bir sıra kitaba redaktorluq etmişdir. O, eyni zamanda “Körpükənd-yüz illərin arasına körpü salan kənd” adlı kitabın məsləhətçisi, redaktoru və naşiridir.

Elman Şəmiloğlu hazırda Azərbaycanda nəşriyyat sektorunun inkişafında, elmə, təhsilə, səhiyyəyə, müasir texnologiyaya aid çap məhsullarının hazırlanması istiqamətində böyük xidmətlər göstərən “Zərdabi Nəşr” MMC-nin direktoru vəzifəsində çalışır. Müsbət şəxsi keyfiyyətlərə, insani xüsusiyyətlərə malik olan Elman Şəmiloğlu çalışdığı sahədə peşəkarlığı əsas götürməklə , həm də bir növ  Zərdabi ənənələrini təbliğ edir, yaşadır, davam etdirir.

İmzası oxuculara yaxşı tanış olan Elman Şəmiloğlu 2023-cü ildən Azərbaycan Jurnalistlər Birliyinin üzvüdür.

Ailəlidir, 1 övladı, 3 nəvəsi var.